नेपालभाषा साहित्य ख्यलय् न्हू च्वमिकथं खनेदयेकः झाःम्ह रीता महर्जन मां लक्ष्मी व अबु चिरीकाजी महर्जनया कोखं ने.सं. १०९० य् जन्म जूम्ह खः । थ्वय्‌कःया ल्हाः बाखं, चीबाखं, हाइकु व उपन्यासय् न्ह्याःगु दसुकथं बाखं सफू ऋतु (ने.सं. ११४१), उपन्यास हामा (ने.सं. ११४१) व हाइकु सफू भावनाया किचः (ने.सं. ११४२) ब्वमिपिनिगु ल्हातय् लःल्हानादी धुंकूगु दु । समाजय् खनेदुगु बिकृति, बिसंगति, रोजगारया निंतिं विदेशय् वनीपिनिगु समस्या, मानवीय मूल्य–मान्यता म्हो जुयावंगु आदि समस्यात थ्वय्‌कःया बाखंया विषयवस्तु जुयाच्वनी । नेवाः समाजया दुग्यंगु चित्रण हे थ्वय्‌कःया बाखं उपन्यासया छगू विशेषता जूगु दु । मानवीय भावनाया विश्लेषण यायेगु कुतः नं थ्वय्‌कःया उपन्यासय् खनेदु । थ्वय्‌कः श्याम याताजः चिबाखं हःपाः सिरपाः (ने.सं. ११४१) व बौद्ध बाखनय् हःपाः सिरपाः (ने.सं. ११४२) त्याकेत ताःलानादीगु दु ।

नेपालभाषाया छम्ह नांजाःम्ह भाषाह्यमिया नापं च्वमि मयजु रुक्मणी श्रेष्ठया जन्म ने.सं १०६४ स मां नीरकुमारी श्रेष्ठ व अबु छत्रमान श्रेष्ठया कोखं जूगु खः ।भूगोल विषयस स्तातक यानादीम्ह खयाः नं थ्वय्‌कःया नुगः नेपालभाषा साहित्य संस्कृति विषय सम्वन्धी अध्ययन अनुसन्धान तथा पत्रिका प्रकाशनपाखे न्ह्याःगु खनेदु । थ्वय्‌कलं ताः इलंनिसें दिनाच्वंगु थौंकन्हे लय्‌पौ पत्रिकाया सम्पादक तथा प्रकाशक  जुयाः ताः ईतक ज्या यानादीगु दु । वय्‌कः छम्ह मिसा जुयाः नं  वय्‌कलं पत्रिकाया ख्यलय्‌ यानादीगु ज्यायात कदर यानाः वय्‌कःयात तःगू संस्थां सिरपाः तथा सम्मान देछागु दु । अथे हे मय्‌जु रुक्मणी नेपालभाषा नापं नेपालीभासं साहित्य, संस्कृति तथा स्वास्थ्य सम्बन्धी तःगू हे ग्यसुग्यंगु सफू च्वयाः पिथनादीगु दु । थ्वय्‌कःया पिदंगु सफू खः — १. नसात्वंसा वासः नं खः (विे.सं २०६४, निबन्ध मुना), २. नसात्वंसा वासः नं खः (विे.सं. २०६६ भाग १ नेपालभाषा÷नेपाली), ३. नसात्वंसा वासः नं खः (वि.सं२०६४ भाग २ नेपालभाषा ÷नेपाली), ४. व हे लँपु (वि.सं. २०६९, बाखं मुना), ५. नेवाः संस्कृति छपुलु (वि.सं. २०७१), ६. झीगु नेवाः संस्कृति (नेसं ११४३), ७. जीवनया अमूल्य धन निरोगिता (वि.सं २०८०), ८. चीरहरण द्वापर युगय्‌ जक (ने.सं. २०८०) ९. लुमंकेबहपिं हलिंया विशिष्ट व्यक्तित्वपिनिगु चर्तिकला ( वि.सं. २०७६) आदि ।

थ्वय्‌कलं नेपालभाषाया पत्रकारीता तथा साहित्यया ख्यलय्‌ यानादीगु ज्यायात कदर यानाः थ्वय्‌कःयात थीथी संस्थां थीथी सिरपाः तथा सम्मान देछाःगु दु गथे —शुभराज्यभिषेक पदक, जनपद सेवाः पदक, धर्मादित्य धर्माचार्य सिरपाः,  चित्तधर सिरपाः, नेपाल साहित्यिक पत्रकार संघपाखें सम्मान, भारती जनमत साहित्यिक पत्रकारिता सिरपाः, मोति पत्रकारिता सम्मान, नेवाः एफ.एम. पत्रकारिता सम्मान, वांगमय शताव्दी पुरुष सत्यमोहन जोशी पत्रकारिता सिरपाः, जरिमैंया साखः लुमन्ति सिरपाः, दान्यहिरा सिरपाः, प्रज्ञा मातृभाषा साहित्यिक पत्रकारिता पुरस्कार आदि आदि ।

हेटौंडाया भाषासेवी रुद्रहरि जोशीया जन्म वि.सं. १९८९ फागुन महिनाय् यलय् जूगु खः । वय्‌कः मकवानपुर जिल्लाय् लाःगु हेटौंडाया भाषासेवी खः । वय्‌कः हेटौंडाया नेपालभाषा खलःया पुलांम्ह नायः जुयादी । वय्‌कः ने.सं. ११०९ निसें निगू कार्यकाल खलःया नायः जुयादीगु खः । वय्‌कलं खलःया नायः जुयाः हेटौंडाय् ‘नेवाः पुस्तकालय’ पलिस्था यानादीगु खःसा हिटौंदाय् नेवाः संस्कृति नेवाःभाय्‌या प्रवद्रधनया निति नं आपालं ज्या यानादीगु दु ।

मय्‌जु रेखा शाक्यया जन्म मां मञ्जु शाक्य व अबु राजमान शाक्यया कोखं येँया इतुंबहालय् जूगु खः । थ्वय्‌कःया मेगु नां राजमति नं खः । नेपालभाषा विषयय् स्नातकोत्तर यानादीम्ह रेखा शाक्य नेपालभाषाया छम्ह स्वतन्त्र पत्रकार व स्वतन्त्र फोटोग्राफर खः ।

पत्रकारीताया ख्यलय् वय्‌कलं दकलय् न्हापां स्वनिगः वाःपतिइ ने.सं १११९ गुँलाथ्व ७ य् ल्याय्‌म्ह ख्यःया स्तम्भकार, अनं लिपा ने.सं ११२० त्यपू जीवनया स्तम्भकार जुयाः ज्या यानादिल । वय्‌कलं वि.सं २०५५ सालंनिसें रेडियो नेपाल अन्र्तगत एफएम स्वनिगः सच्छि मेगाहर्जय् न्हापां नेपालभाषां ज्याझ्वः न्ह्याकेगु यानादिलसा अनं लिपा वि.सं २०५६ य् केएटीएच, एफ.एम.अन्र्तगत नं नेपालभाषां ज्याझ्वः न्ह्याकेगु यानादिल । वि.सं २०५८ निसें २०६० साल तक हेटौंडाया मनकामना एफएम व पोखराया माच्छापुच्छ्रे्र एफएमय् न्हापांगु खुसिइ नेपालभाषाया ज्याझ्वः न्ह्याकेगु ज्या नं मय्‌जु रेखां यानादीगु दु। अथेहे वि.सं २०५८ निसें २०७२ साल तक टाइम्स एफ.एम.य् ज्याझ्वः न्ह्याकामि, समाचारवाचिका, कार्यक्रम निर्माता, स्क्रीप्ट लेखक, विज्ञापनय् सः बिइगु, न्हूपिं ज्याझ्वः न्ह्याकामिपिंत टे«निंग बीगु व कलाकारपिंत अन्र्तवार्ता कायेगु ज्या यानादिल ।

पत्रकारिताया ख्यलय् पलाः तयेन्ह्यः हे नेपालभाषां च्वसा न्ह्याकादीम्ह मय्‌जु रेखां चिनाखँ, च्वखँ, बाखं, म्ये, मुक्तक आदि नापं नेवाः जात्रापर्व व समसामयिक विषयय् लेख च्वयेगु यानादीगु दु । नेपालभाषां जक मखु नेपाली भाषं नं च्वसा न्ह्याकादीम्ह मय्‌जु रेखाया नेवाः संस्कृति सम्बन्धी नेपाली भाषं स्वंगू सफू पिदंगु दु गथे— श्री पचली भैरव तथा राजभण्डारी दुर्दाइ गुथि (वि.सं २०७४), जीवन्त संस्कृतिहरू (वि.सं २०७५, स्वनिगः व स्वनिगः पिने जुइगु थीथी जात्रा मध्ये २५ गू नेवाः जात्राया विवरण व रंगीन तस्वीर सहितया सफू), नेपालमण्डलका केही जात्राहरू (वि.सं २०७८, स्वनिगः व स्वनिगः पिने जुइगु थीथी जात्रा मध्ये १२ गू जात्राया विवरण व रंगीन तस्वीर सहितया) सफू पिदंगु दु । थ्व स्वंगुलिं सफू डा. हेरम्बबहादुर राजभण्डारी व स्नेहलता राजभण्डारीपिंसं पिकयाब्यूगु खः । अथेहे वय्‌कलं वि.सं २०७४ व २०७५ सालय् न्हूदँया लसताय् रंगीन क्यालेण्डर नं प्रकाशन यानादीगु दु । थथे मय्‌जु रेखां थीथी ख्यलय् बियादीगु योगदानयात कदर यानाः वय्‌कःयात थीथी संस्थां थीथी सिरपाः व सम्मान देछाःगु दु । वय्‌कःयात २५ क्वःगु महानगर दिवसया उपलक्ष्य महानगरीय सुशासन पत्रकारिता सम्मान, ११० औं अन्तर्राष्ट्रिय श्रमिक दिवसया लसताय् नेपाल महिला पत्रकार महासंघ पाखें सम्मान, वि.सं २०७७ सालय् नेवाः पत्रकार राष्ट्रिय दबू केन्द्रपाखें बाबुराजा फोटो पत्रकारिता सम्मान, नेपाल खड्गी सेवा समितिया ७ औं राष्ट्रिय महाधिवेशनया अवसरय् नेपालभाषा व संस्कृतिया उत्थान व सर्वद्धनय् योगदानया कदर यासें सम्मान देछाःगु दु ।

मां राधा व बा रामलाल श्रेष्ठया कोखं ने.सं. १०९१ इ जन्म जूम्ह रेणु श्रेष्ठ मूलतः न्हूपुस्तायाम्ह चिबाखं च्वमि खः । थ्वय्‌कःया ल्हाः बाखं, चीबाखं बाहेक हाइकु व उपन्यास विधाय् नं जाः । थ्वय्‌कःया च्वसां निगू चिबाखं सफू पिमज्वःगु सः (ने.सं. ११३२) व ख्वाःपाः (ने.सं. ११३९), हाइकु सफू जीवन घःमाः (ने.सं. ११३६) व उपन्यास हाथ्या (ने.सं. ११४१) पिदनेधुंकूगु दु । थः ब्वलंगु समाजया चाकलय् जुयाच्वनीगु थीथी घटनां अभिप्रेरित जुयाः मगाः–मचाः, मभिं–मनिंयात थःगु च्वसाया माध्यमं नुगलय् थिइक न्ह्यब्वये फुगु थ्वय्‌कःया लेखनया मूलभूत विशेषता खः । झीगु समाजय् विद्यमान लैंगिक विभेद, नारीवादी चेतना, मांभाय्‌या अनुराग, ल्याय्‌म्ह पुस्ता विदेश पलायनं हःगु समस्या, वर्ग विभेद आदि विषयय् थ्वय्‌कःया बाखं, चीबाखं उपन्यास आदिया मू विषयवस्तु जुयाच्वंगु दु । ब्वमिया नुगलय् तरङ्ग हयेफइकथं बाखं उपन्यास क्वचायेकेगु कलायात छ्यलाः छम्ह बांलाःम्ह चिबाखं च्वमि जुइत थ्वय्‌कः ताःलानादीगु दु । थ्वय्‌कःयात न्हूगु विश्वभूमि सिरपाः (ने.सं. ११११) व आशामान सिरपालं छाय्‌पी धुंकूगु दु । अथेहे विराट नेपालभाषा साहित्य सम्मेलन ने.सं. ११३३ य् बाखं विधाय् लियांल्यू सिरपाः त्याकादीगु खः ।

मां चन्द्रमाया व बौ बासुदेवानन्द वैद्यया क्वखं येँया न्यतपाचोय् ने.सं. १०५२ चौलागा १ कुन्हु रेवति रमणानन्द श्रेष्ठ वैद्यया जन्म जूगु खः । साहित्य लेखनय् सुरुइ रे.र.न स्यस्यः नामं च्वयादीम्ह वय्‌कलं ने.सं. ११०८ लिपा पिदंगु रचनांनिसें वय्‌कलं थःगु पुरा नां च्वयेगु यानादिल । वय्‌कःया दकलय् न्हापां पिदंगु च्वखँ नेपालया पौराणिक इतिहासया छगू झलक (ने.सं. १०७२ या थौंकन्हे पत्रिकाया ल्याः ३/४ स पिदंगु) खः । अथे हे ने.सं. १०७३ य् जूगु हनुमानध्वाखाया ऐतिहासिक साहित्य सम्मेलनय् वय्‌कलं सत्य छन्त स्वागत थेंज्याःगु निबन्ध न्यंकाः दर्शकपिनिगु तारिफ प्राप्त यानादीगु खः ।

बहुमुखी प्रतिभाया धनी रेवति रमणानन्द श्रेष्ठया पिदंगु कृति कथं वय्‌कः— कवि, कथाकार, निबन्धकार, समीक्षक, अनुवादक नापं सम्पादक नं खः । वय्‌कःया पिदंगु साहित्यिक सफू खः – मलख (कविता मुना, ने.सं. १०७५), उलः (कविता मुना ने.सं. १११३), उफोस्वां (म्ये जाःगु बाखं, ने.सं. १०७३), कपं (बाखं मुना, ने.सं. १०७६), झिपु ह्वनाखँ (निबन्ध मुना, ने.सं. १११५) आदि । रेवतीरमाणन्द श्रेष्ठया मलख कविता संग्रह नेपालभाषाय् कवि केदारमान व्यथितया छ्वास काव्य धुंकाः पिदंगु मेगु सनेट शैंलिं च्वयातःगु कविता संग्रह खः । रेवति रमणानन्द श्रेष्ठ धर्म, दर्शन सम्वन्धि नं आपालं अध्ययन दुम्ह च्वमि खः धयागु खँ वय्‌कलं च्वयादीगु —नेपाल धर्म दर्शनया खँत (ने.सं.१११३), जिगु छुं धार्मिक च्वखँ (ने.सं.१११६, ईश्वर गीता (ने.सं.१११८), धर्म दर्शनया सीकेबहगु खँ, (ने.सं. ११२२) आदि सफुलिं पुष्टि याःगु दु ।

रेवति रमणानन्द श्रेष्ठ नेवाः जाति, भाषा, नेपाल संबत्‌या आदिया विषयय् नं तःगू सफू च्वयाः नेवाः जातियात म्हसीकेगु ज्या यानावंम्ह च्वमि खः । थज्याःगु विषयय् वय्‌कःया पिदंगु सफू खः – प्राचीन नेपालय् जुयावं खँ (ने.सं. ११११), नेपाल संबत्‌या बारे जिं छु छु च्वया, थौंकन्हय् लय्‌पौ व छुं सम्पादकीय आवाज (ने.सं. १११६), नेवाः (ने.सं. ११२१), नेवाः भावना (कविता च्वखँ व खँल्हाबल्हा, ने.सं. ११२१), नेपालभाषाया छम्ह तपस्वी छत्रबहादुर कायस्थ (समीक्षात्मक सफू, ने.सं. १११६) आदि ।

रेवति रमणानन्द श्रेष्ठ छम्ह अध्ययनशीलम्ह सम्पादक नं खः । वयकलं सम्पादन यानादीगु नेपालभाषाया सफू खः न्ह्यखा (च्वमिपिनिगु निबन्ध मुना, ने.सं १०७६), शिव लुमन्ति (च्वमिपिनिगु च्वखँ मुना, ने.सं. १११३), माणिकलाल श्रेष्ठ, व्यक्तित्व व कृतित्व (च्वमिपिनिगु च्वसु मुना, ने.सं. १११९), छ्वासः अजिमा (लेखक धु्रवनारायण कायस्थया च्वखँ मुना, ने.सं. १११६) आदि । थ्वय्‌कलं सम्पादन यानादीगु न्ह्यखा निबन्ध संग्रह नेपालभाषाया न्हापांगु प्रतिनिधि निबन्धकारपिनिगु च्वखँ पुचः खः । रेवति रमणानन्द श्रेष्ठ साहित्य लेखनय् जक मखु नेपालभाषाया थीथी संघ, संस्थाय् व पत्रपत्रिकाय् गनं कार्यसमितया दुजः जुयाःसा गनं सल्लाहकार, संरक्षक आदि जुयाः थःत फ्यानादीम्ह छम्ह मातृभाषा अनुरागी नं खः । वय्‌कः संलग्न जुयादीगु संस्था खः— च्वसापासा, नेपालभाषा परिषद्, नेपालभाषा विकास मण्डल व नेपालभाषा एकेडेमि (मू दुजः), नेपालभाषा मंकाः खलः यल, नेपाल संस्कृति लय्‌पौ, मणिगल लय्‌पौ, साहित्यया मूलुखा, ज्वलान्हाय्‌कं, शान्ति विजय पत्रिका (सल्लाहकार) । अथेहे वय्‌कः नेपालभाषा पत्रिका न्हिपौ, झी लय्‌पौया सह–सम्पादक नं खः । वय्‌कःया थज्याःगु ज्यायात कदर यानाः थीथी संस्थां वय्‌कःयात हनापौ, सम्मान आदि देछाःगु दु । गथे— नेपाल संस्कृति लय्‌पौ पाखें अभिनन्दन पत्र (ने.सं. १११६), साहित्य मुलुखां ने.सं. हनापौ (ने.सं. ११२१) नापं भाषाज्योति उपाधि देछाःगु दु । थथे भाषा साहित्यया ख्यलय् ज्या यायां ने.सं ११२२ य् वय्‌कलं थःगु नश्वर देह त्याग यानादिल ।

मां फिनी मास्के तथा अबु सनकमान मास्केया म्ह्याय् रेवती राजभण्डारीया जन्म येँया ने.सं. १०५८ य् जेष्ठ शुक्ल १३ थिंलागा सप्तमी कुन्हु जूगु खः । थ्वय्‌कः नेपालभाषाया नापं नेपाली भाषाया नं नांजाःम्ह च्वमि खः । थ्वय्‌कलं साहित्यया विविध विधा गथे —बाखं, चिनाखँ, निबन्ध तथा बालसाहित्य आदिया ख्यलय् च्वसा न्ह्याकादीगु दु । नेपालभाषाया ख्यलय् थ्वय्‌कःया दकलय् न्हापां पिदंगु च्वसु जिमिगु धैगु छुं हे मन्त (गं ३, ने.सं ११०५) नांगु कविता खः ।

बाखं विधाय् थ्वय्‌कःया ज्यामि नांगु सामाजिक बाखं संग्रह (ने.सं. १११५), वं ख्वबि हायेकेगु त्वःतल (ने.सं.११३७) सामाजिक बाखं, न्हाय्‌मदु बाज्या (ने.सं ११२१) नांगु लोकबाखं संग्रह व ऋतु (ने.सं ११२६)नांगु मचाबाखं पुचः पिदंगु दु । थुकथं थ्वय्‌कःया गुलिं बाखं सामाजिक समस्याय् केन्द्रीत जूगु दुसा गुलिं लोकबाखंयात थौंया परिवेशनाप पाय्‌छि यानाः प्रस्तुत यानातःगु दु । न्हाय्‌मदु बाज्या थज्याःगु लोकबाखंया दसु खः । अथे हे ऋतु मचा मनोभाव तथा मचातय्‌त शिक्षाबीगु तातुनाः च्वयातःगु मचा बाखंया सफू खः ।

काव्य ख्यलय् थ्वय्‌कःया प्याःगु फोंग (ने.सं ११२८) शोक काव्य संग्रह पिदंगु दु । थ्व प्याःगु फोंग कविता संग्रह थः मदुम्ह जहानया लुमन्तिइ च्वयातःगु कविता संग्रह खः । निबन्ध विधाय् थ्वय्‌कःया नेपालभाषाय् सफू पिमदंसां सांस्कृतिक च्वसुत थीथी पत्रपत्रिकाय् पिदंगु दु । मय्‌जु रेवतिं थथे साहित्यया थीथी विधाय् जक च्वसा न्ह्याकादीगु मखुसे नेपालभाषा मिसा खलःया आजिवन सदस्य, नेपाली नारी साहित्य सेवा केन्द्रया उपाध्यक्ष जुयाः नं ज्या यानादीगु दु । मय्‌जु रेवतीयात वय्‌कःया च्वज्याया कदर स्वरुप थीथी संस्थां थीथी सम्मान व सिरपाः देछाःगु दु । गथे— सर्वश्व नेपाल पाखें सम्मान व अभिनन्दन (ने.सं ११२२), साहित्यिक पत्रकार संघपाखें लोकप्रिया पुरस्कार (ने.सं.११२४), ईलोहं प्रकाशनपाखें ईलोहं ज्ञानज्योति सिरपाः (ने.सं ११३०) आदि ।

नेपालभाषा व अर्थशास्त्रय् एम.ए यानादीम्ह मय्‌जु रोशना शाक्यं वि.सं. २०३९ सालय् सरस्वती कलेजय्, अनं लिपा वि.सं. २०४२ सालय् पद्मकन्या कलेजय् नेपालभाषा ब्वंकादीगु खः । वय्‌कः वि.सं. २०११ श्रावण १२ गते इतुंबहालय् जन्म जूगु खः । नेपालभाषा ब्वंकेगु ज्या न्ह्याकाच्वंच्वं वय्‌कलं विद्यार्थीपिंत ग्वाहाली जुइगु पाठ्यक्रम सम्बन्धी तःपु समिक्षात्मक च्वसु, पुलांगु म्ये (षडदर्शन, जयजय भैरव, सीलं आदि) बारे थीथी पत्रपत्रिकाय् च्वसु पिथनादीगु दु ।

रोहिणीबहादुर याकः नामं म्हसीका दुम्ह भाजु रोहिणीबहादुर कायष्ठया जन्म ने.सं १०६० इ अबु नरबहादुर कायष्ठ व मां ज्वालादेवी कायष्ठया कोखं यलया बखुंबहालय् जूगु खः । थ्वय्‌कः नांजाःम्ह साहित्यकार छत्रबहादुर कायष्ठया दाजु खः । कविता, बाखं व निबन्ध विधाय् ल्हाल् न्ह्याकादीम्ह भाजु रोहिणीबहादुर कायष्ठया न्हापां पिदंगु रचना झी झी (सितु, २४ ने.सं १०८८) नांगु कविता खः । थ्वय्‌कः नेपालभाषा साहित्य थकायेगु नितिं थःत फ्यानादीम्ह छम्ह सच्चाम्ह मातृभाय्‌या अनुरागी व भाषिक अभियन्ता खः, गुम्हेस्यां थम्हं च्वयाः सफू पिकायेगु स्वयाः मेपिनिगु सफू पिकायेगु व पत्रिकाय् मेपिनिगु लेख पिकायेगु ज्याय् थःगु जीवनया अमूल्य ई फ्यानादिल। थ्वय्‌कलं थः किजा छत्रबहादुर कायष्ठ नाप जानाः नेपालभाषा व थ्वया साहित्य थकायेगु तातुनाः साहित्य मूलुखा नामं छगू साहित्यिक संस्था स्वनादिल ।

नेपालभाषाया समाचार रेडियो नेपालं लिकाःगुया विरुद्धय् त्वाःत्वालय् साहित्य सम्मेलन यानाः न्ह्याकूगु २०२२ सालया भाषिक आन्दोलनय् नं वय्‌कलं महत्वपूर्ण भूमिका म्हितादिल । थुकिं यानाः वय्‌कः तःकः पुलिस कारवाहिलय् नं लात । साहित्यया मूलुखा मार्फत थ्वय्‌कलं ज्वला न्हाय्‌कं (ने.सं. १०८८) नांगु साहित्यिक पत्रिका पिकयादीगु दुसा स्वांयाःपुन्ही अर्थात् २५११ बुद्ध जयन्तिया लसताय् शान्ति विजय (ने.सं १०९०) नांगु पत्रिका थःगु हे सम्पादनय् पिकयादिल । अथेहे वय्‌कलं नेपालभाषा स्तोत्र पुचः (ने.सं ११०५) नांगु सफू छगू नं सम्पादन यानाः पिकयादीगु दु । थथे थः फुसां मफुसां वय्‌कलं थुपिं पत्रिका पिकायेगु दिकामदी । थुकथं हे ३७ दँया दुने थःपिंसं नीस्वंगु साहित्य मूलुखा संस्था पाखें नं तःधंगु चीधंगु यानाः ५० गुलिं मयाक सफू पिकायेत वय्‌कः ताःलाःगु दु । थथे पत्रिकाय् पिदंगु रचना तथा साहित्य सम्मेलनय् ब्वंगु लेखयात कयाः तत्कालिन पञ्चायत सरकारं वय्‌कःयात तःकः हे ज्वनाः कारवाही नं यात तर वयकः छपति हे विचलित मजुसे थःगु मातृभाषाया नितिं ज्या यानांच्वन ।