बा पद्मानन्द बज्राचार्य व मां पद्मकुमारी बज्राचार्यया कोखं येँया ध्वाखाबहाः त्वालय् साहित्यकार सानुमानन्द बज्राचार्यया जन्म ने.सं. १०५८ (वि.सं. १९९५ आश्विन ९) य् जूगु खः । एम.ए., बि.एड. ब्वनेज्या यानादीम्ह भाजु बज्राचार्य नेपालभाषा साहित्य ख्यलय् चिनाखँ व च्वखं च्वयाः मांभाय्‌या सेवा यानादीम्ह खः । नेपालभाषा व नेपाली नितां भाषाय् वय्‌कःया ल्हाः न्ह्याः । नेपालभाषाया साहित्यिक पत्रिका झी (ल्याः ४०, ने.सं. १०८३) लय् जीवन गथः नांगु चिनाखँ पिथनाः नेपालभाषा साहित्य ख्यलय् पलाः न्ह्याकादीम्ह वय्‌कः बज्राचार्य संघया सचिव नं खः । ब्यंकेज्या यानादीम्ह भाजु बज्राचार्यया चिनाखँ व च्वखँ नेपालभाषा साहित्यया थीथी पत्रिकाय् पिदंगु दु । थीथी च्वसु च्वयाः मां भाय्‌या सेवा यानादीम्ह बज्राचार्य ने.सं. १११५ (वि.सं. २०५१ मार्ग ७) य् दिवगंत जूगु खः ।