बौ चक्रधर शर्मा व मां रामवाणी शर्माया क्वखं ने.सं. १०५६ स यलया महाद्यःननि वलानिम्ह त्वालय् प्रवन्धकार भाजु ऐश्वर्यधर शर्माया जन्म जूगु खः । वय्‌कःया मेगु नां भाइजुजु नं खः । छम्ह आयुर्वेद शास्त्री जूसां थ्वसपोलया नुगः साहित्यपाखे अतिकं क्वसाः । भाजु शर्माया च्वसा नेपालभाषा व नेपाली साहित्य निताय्‌सं ज्वः । वय्‌कः छम्ह धार्मिक ख्यलय् आस्था तयाबिज्याइम्ह जूगुलिं आपाः धयाथें धार्मिक च्वसुत च्वयादी । धर्म नाप स्वापू दुगु वय्‌कःया न्हापांगु च्वसु ने.सं. १११३ स पलिस्था पत्रिकाय् पिदंगु आःतक लुया वःगु पुलांगु स्वस्थानीया बाखं सफू खः । धार्मिक च्वसु च्वयादीम्ह शर्मां यलया अग्निशाला नाप स्वापू दुगु धार्मिक सफू अगिंमथःया ऐतिहासिक सामग्री ने.सं. ११०४ य् पिथनादीगु दु । अथेहे पुलांगु बाखंया लिधंसाय् स्वस्थानी वि.सं. २०४५ व शिवरात्री पर्व कथा पिथनादी धुंकूगु दुसा मनकामना बाखंयात कयाः श्री मनकामना महात्म्य ने.सं. ११२० भाय् हिलाः पिथनादीधुंकूगु दु । थ्व बाहेक इलय् ब्यलय् धार्मिक च्वसुत च्वयाः पिथनादीगु दु ।