अबु लक्ष्मीकृष्ण श्रेष्ठ व मां तुलसीमाया श्रेष्ठया कोखं बि.सं. २०१९ असोज २४ कुन्हु मध्यपुर थिमि न.पा ४, ख्वपय् जन्म जूम्ह खः कवि भाजु तेजकृष्ण श्रेष्ठ । नेपालभाषा साहित्यया आधुनिक कविताया क्षेत्रय् लिपांगु पुस्ताया कविपिनि झ्वलय् कवि तेजकृष्ण श्रेष्ठ उदयीमान कवि खः । भक्तपुर साहित्यिक समाजया आजिवन दुजः भाजु तेजकृष्ण श्रेष्ठ कविता व गजल च्वज्याय् सक्रिय जुयाः न्ह्यज्याना च्वनादीम्ह कवि खः । वय्‌कःया पिदंगु साहित्यिक कृति जीवन छु खः ने.सं.१११९ य् पिदंगु खः ।

पत्रकार तेजनारायण महर्जनया जन्म अबु अष्टनारायण महर्जन व मां अष्टमाया महर्जनया कोखं वि.सं. २०३४ असार १३ गते येँया भिंद्यःत्वालय् जूगु खः । नेपालभाषाया न्हिपौ नेपालभाषा टाइम्सय् सम्पादक जुयाच्वनादीम्ह वय्‌कः नेपालभाषाया न्हिपौ सन्ध्या टाइम्सया पिदंगु दँ निसें हे नेपालभाषाया पत्रकारिता ख्यलय् ज्या याना वयाच्वनादीम्ह खः ।

नेपालभाषा, नेवाः संस्कृति, नेवाः व्यक्तित्वपिनि बारे तःपु च्वसु च्वयादी धुंकूम्ह वय्‌कलं बाखं नं च्वयादी ।

वय्‌कःया बाखं, अनुवाद बाखं थाय्‌भु, शुक्रवाःया तँसापौ आदिइ पिदंगु दु । अथेहे वय्‌कलं खस नेपाली भाय् न्हिपौ नागरिक, काठमाडौं प्रेस डट कमय् नं नेवाः संस्कृति, नेपालभाषा सम्बन्धी तःपू लेख पिथनादीगु दु । वय्‌कलं च्यानल नेपाल टेलिभिजनपाखें प्रशारण जुइगु नेपालभाषा बुखँ य् नं सहसंयोजक जुयाः ज्या यानादीगु दु । अथेहे वय्‌कःया किपूया थीथी सम्पदाया किपासहित संक्षिप्त परिचय दुगु सफू सम्पदा संरक्षणमा कीर्तिपुर नगरपालिका पिदंगु दु । अथेहे वि.सं. २०७२ सालया तःभुखाचं क्षति स्वयम्भूया कर्मराज महाविहार पुनर्निर्माण सम्बन्धी वृत्तचित्र नं वय्‌कःया निर्देशनय् दयेकूगु दु ।

न्हू पुचः व उपकारी पुचःया सचिव जुयादीधुंकूम्ह वय्‌कः नेवाः पत्रकार राष्ट्रिय दबूया केन्द्रीय ल्यू दांभरिं व सभ्यता नेपाःया सचिव जुयाच्वनादीगु दु । दँय्‌दसं तःजिक जुइगु नेपालभाषा साहित्य नखःया न्हापांगु निसें प्यंगूगु संस्करण तक वय्‌कःया संयोजकत्वय् जूगु खः । वय्‌कःयात ने.सं. ११४२ ज्यापु सांस्कृतिक विकास कोषपाखें ज्यापु प्रतिभा पुरस्कार लःल्हाःगु खः ।

मां शारदादेवी व बौ निरञ्जनलाल ग्वंगःया क्वखं ने.सं. १०५६ बछलागा (वि.सं. १९९३ मार्ग ८ गते) ख्वपया सूर्यविनायकय् तेजेश्वरबाबु ग्वंगःया जन्म जूगु खः । वय्‌कलं स्कूलया विद्यार्थीकाल निसें नेपालभाषाय् च्वसा न्ह्याकादीगु खः । भाजु तेजेश्वरबाबु ग्वंगः नेपालभाषाया निबन्ध ख्यलय् थःगु बिस्कं प्रभाव त्वःतेफुम्ह छम्ह अग्रज निबन्धकार खः । आत्मपरक शैली च्वयातःगु वय्‌कःया निबन्धय् व्यंग्यया नापं बौद्धिकतां नं उलि हे थाय्‌कयाच्वंगु दइ । वय्‌कःया दकलय् न्हापांगु च्वसु साहित्य व साहित्यकार निबन्ध ने.सं. १०७४ स धर्मोदय लय्‌पतिइ पिदंगु खः ।

वय्‌कःया निबन्ध सफू संस्कृतिया पलं ने.सं. १११९ स पिदंगु खः । नापं नेपालभाषाय् निबन्ध मुना कथं पिदंगु पुजाभः (ने.सं. १०८३), मूसः निबन्ध ने.सं. १०८४), खाखेँ पुचः नगू (ने.सं. १०८८), मतजः (ने.सं. ११०१) नेपालभाषा निबन्ध पुचः (ने.सं. ११०३) सफुलिइ वय्‌कःया निबन्ध दुथ्याः । वय्‌कलं नेपालभाषाया नापं नेपाली व अंग्रेजी भासं नं च्वयेगु यानादी । अथेसां नेपालभाषा व नेपाली भाषाय् तेजेश्वरबाबु ग्वंगः निबन्धकार कथं नां जाः । वय्‌कःयात ने.सं. १११४ य् ठाकुरलाल सिरपाः व ने.सं. ११४२ य् दान्यहिरा सिरपाः बियाः हंगु खः । नापं प्रबल गोरखा दक्षिणबाहु (चतुर्थ)पाखें वय्‌कः विभूषित जुइधुंकूगु दु ।

स्वनिगःया मेगु नांजाःगु नेवाः बस्ती तोखा खः । ऐतिहासिक, सांस्कृतिक व पर्यटकीय ल्याखं अतिकं महत्वपूर्णगु तोखायात ‘थःने’ व ‘क्वःने’ यानाः निब्वय् ब्वथलातःगु दु । पञ्चायतकालय् प्रशासनिक विभाजन याःबलय् थनया उत्तरपाखे च्वंगु थःनेयात टोखा चण्डेश्वरी गाउँ पंचायत (लिपा गाउँ विकास समिति) व दक्षिणपाखे च्वंगु क्वःने लागायात टोखा सरस्वती गाउँ पंचायत दयेकूगु खः । थ्व निगू लागाया दथुइ च्वंगु ‘तोखाय्चालँ’ यात सीमारेखा दयेकल । तोखा नगरपालिका दयेकेवं थ्व निगुलिं लागा उगु नगरपालिकाय् दुथ्याः वन । तोखाया पूर्वय् भुइजःसि व खड्का भद्रकाली, पश्चिमय् मनमैजु, साङ्गला व फुटुङ, उत्तरय् झोर महाँकाल, दक्षिणय् धापासी व ग्वंगःबुँ लाः । थःने लागाय् यलाग, थलाग, गँछें, पुखुसि, देमलाछि, पिठेटोल, इकुलाग, तोठीलाग, दुँधीघले, बाले, त्वापचा त्वाः दु । अथे हे हासल, दुनिखेल, सागल, इकगल, लाछीचुक, धसीत्वाः, लाछीचा, ल्होहखल, चोकछेँ, लाम्ने, ससिख्यः, ध्वत्वाचा, वामफल क्वःने लागाया त्वाः खः ।
तोखा प्राचीनकालंनिसें विकास जुया वःगु बस्ती खः । थन संवत् ५१९ या लिच्छविकालीन अभिलेख दु । उकी थ्व थाय्या नां च्वयातःगु मदु । मध्यकालंनिसें तोखा (टोखा) धकाः स्पष्टं च्वयातःगु दु । थनया नांजाःगु तीर्थ ‘स्वप्नतीर्थ’ खः । थनया साङ्गला खुसि व बिष्णुमती खुसिया दोभानयात ‘स्वप्नतीर्थ’ धाइ । तोखा नां प्रचलित जूगुबारे नं थीथी धापू दु । छगू धापू थथे दु– तोयनाथ नांया छम्ह ऋषिं सकल अपाङ्गपिं मनूतय् ल्वय् लनाः शरीर पूर्ण जाया वयेमा धकाः दँय्दसं मेष संक्रान्ति (वैशाख १) कुन्हु ‘स्वप्नतीर्थ’ य् म्वःल्हुइगु धकाः दिन तोके याना ब्यूगुलिं थ्व थाय्या नां तोखा जूगु धाइ । मेगु धापू कथं, नेपालभाषाया ‘तुख्यः’ खँग्वःपाखें तोखा जूगु खः । थ्व थासय् तुबुँ यक्व दु । तु यक्व उत्पादन जुइगु जुयाः थ्व थासय् चाकु दयेकेगु ज्या च्वन्ह्याना वन । चाकु दयेकेत तु यक्व माः । तु माक्व उत्पादन जुइगु जुयाः थ्व थाय्यात ‘तुख्यः’ धायेगु याना हल । वहे ‘तुख्यः’ खँग्वः अपभ्रंश जुयाः आः तोखा धया हल । थ्व थाय्यात मध्यकालय् ‘जयपुली (री) देश’ नं धायेगु याः । तोखा (टोखा) नेवाः भासं वःगु नां खःसा जयपुरी संस्कृत भासं वःगु नां धैगु सीदु ।
थ्व थाय् भौगोलिक ल्याखं भतिचा डाँडा च्वय् लाः । गोपालराज वंशावली हरिशचन्द्रदेव (नायकदेवीया भाःत) या किजा गोपालदेव तोखा किल्ला दुने वंगु खँ च्वयातःगु दु । थुकिं मध्यकालय् तोखायात सामरिक दृष्टिकोणं महŒव बियातःगु सीदु । उबले थ्व थाय् व्यापारिक केन्द्र कथं नं विकास जूगु खः । मध्यकालय् व्यापारीत थ्वहे थासं नुवाकोट जुयाः ल्हासा वये–वने याइगु खः । स्वनिगलय् राजनैतिक विभाजन लिपा थ्व थाय् येँ (कान्तिपुर) राज्य दुने लात । तोखा चण्डेश्वरी देगःया पःखालय् तयातःगु ने.सं. ७९४ (१६७३ ई.) या अभिलेख व तपलाछि त्वालय् तयातःगु ने.सं. ४८१ (१७२० ई.) या अभिलेख निगुलीसं थ्व थाय्यात येँया विजयराज्य धयातःगु दु ।
नीतिशास्त्र हिमवत्खण्डय् चण्डिकेश्वर पिण्डारक–यात तोखा चण्डेश्वरी देवी खः धयातःगु दु । तोखाया मेगु नांजाःगु धार्मिकस्थल सपनातीर्थ खः । मेगु धार्मिक सम्पदात गणेद्यः (सपनविनायक), महाद्यः, नारांद्यः, गणेद्यः, भिंद्यः, सूर्यविनायक, कार्यविनायक, महाँकाल, चण्डिकेश्वर, चुनदेवी, जलेश्वर, सतीदेवी, काली, गौरीशंकर, तलेजु भवानी देवदेवीया झ्वाता व देगः खः । अथे हे पिगंद्यः (पीठ देवता), अगंद्यः, करूणामय, बौद्धस्तुप व बुद्धया झ्वातात नं अन दु । दक्षिण लागाय् दुगु सम्पदा सरस्वती (सस्माद्यः), नारांद्यः, इन्द्रायणी व कोथु गणेद्यः खः ।
तोखामितय्सं चिल्लागा (चैत्रकृष्ण) पिसाच चतुर्दशी कुन्हु थीथी द्यःया जात्रा यानाः पाहांचः¥हे हनेगु याइ । वैशाख (मेष) संक्रान्ति कुन्हु बिस्काः जात्रा हनी । पाहांचः¥हे कुन्हु थंगु यःसिं क्वःमथसें चैत्र मसान्त निसें वैशाख ५ गतेतक चण्डिकेश्वर महादेव, सपनातीर्थ गणेश, च्वय्गणेश, कोटुगणेश, मसानकाली, चण्डेश्वरी व सरस्वतीया खः जात्रा यानाः बिस्काः हनी । पाहांचः¥हे कुन्हु थंगु यःसिंद्यः वैशाख ५ तिनि क्वःथइ । अथे हे वैशाख १ गते बहुमुखी गंगा व दुतमुखी गंगाया त्रिवेणीइ सपनतीर्थ मेला जुइ । वैशाख १ गते मेष संक्रान्ति कुन्हु थ्व खुसिइ म्वःल्हुल धाःसा फुक्कं ल्वय् लनाः स्यंगु शरीर नं हाकनं जाया वइ धैगु मान्यता दु ।

स्वनिगलं पिनें पिदंपिं नेपालभाषाया भाषिक अभियन्तापिं मध्ये भाजु तोरेन्द्रमानसिंह प्रधान नं छम्ह खः । वय्‌कःया जन्म बि.सं.१९८८ इ कोइलाबासय् जूगु खः । वय्‌कःया मांया नां गणेशकुमारी व बाःया नां गजेन्द्रमानसिंह प्रधान खः । वय्‌कःया थाय्‌बाय् बगलामुखी मार्ग विराटनगर खः ।

वय्‌कः आवद्ध जुयादीगु संस्था थुकथं जुल – झी पुचः विराटनगर (संस्थापक संयोजक), गणेशमानसिंह फाउण्डेसन विराटनगर (संस्थापक नायः), नेपाल क्षयरोग निवारण संघ, मोरङ (नहपायाम्ह नायः) लिसें मेमेगु नं यक्व संघसंस्था ।

भाजु त्रिप्रसाद धौभदेलया जन्म अबु शिवप्रसाद धौभदेल व मां ज्वालादेवी धौभदेलया कोखं ई.सं १९५९ य् जूगु खः । थौंकन्हय् वय्‌कः क्यानाडाया अल्वर्टाय् च्वनादी । विदेशय् च्वनाः नं थःगु मांभाय् व नेवाः जातिप्रति उलि हे माया यानादीम्ह थ्वय्‌कः छम्ह नेवाः अभियन्ता खः । भूगर्भशास्त्रय् स्नातकोत्तर यानाः थ्व विषयनाप सम्बन्धित लजगाः ज्वनादीम्ह खया नं त्रिप्रसाद धौभदेलं थः नेपालय् च्वनादीबलय् मांभाय्‌या ममतां नेपालभाषा विषयय् नं एम.ए पूवंकादिल । थःगु विद्यार्थीकालंनिसें नेपालभाषाया थीथी साहित्य सम्मेलन व नेवाः गतिविधिइ ब्वति कयाझायाच्वनादीम्ह थ्वय्‌कलं थःगु देशं पिने अर्थात् क्यानाडाय् नं क्यानेडियन नेवाः गुथि (ऋल्न्)या दुजः जुया नेवाः संस्कृति, नेवाः भाय्‌या प्रचारप्रसारया ज्याय् सक्रिय जुयाः आपालं ज्या यानादीगु दु । साहित्य ख्यलय् छम्ह प्रगतिशील लेखक कथं परिचितम्ह त्रिप्रसाद धौभदेलया च्वसां पत्रपत्रिकाय् च्वसु जक पिदंगु मखुसे नसंफाःगु चाया वैचारिक पक्ष नांगु समिक्षात्मक सफू नं पिदंगु दु । थ्व सफू नांजाःम्ह साहित्यकार रामशेखर नकःमिया नसंफाःगु चा उपन्यासयात कयाः नेपालभाषा एम.ए डिग्री पूवंकेगु निंतिं वय्‌कलं यानादीगु शोधग्रन्थ खः ।

ने.सं.१०७१ गुंलाथ्व नवमीकुन्हु भोलाछेँ, ख्वपय् बौ आशाकाजि शाक्य व मां सप्तमाया शाक्यया क्वखं भाजु त्रिरत्न शाक्यजुया जन्म जूगु खः । वय्‌कः ने.सं १०९८स नसंचा पत्रिकाय् दकलय् न्हापां आखिर आकाशय् छाय् जः मदै धयागु कविता ज्वनाः नेपालभाषा साहित्य लागाय् पिलूझाःम्ह कवि खः।

आधुनिक नेपालभाषा साहित्यया गद्य कविता ख्यलय् भाजु त्रिरत्न शाक्य छम्ह अग्रज कवि जक मखु छम्ह सशक्त हस्ताक्षर नं खः । लिसें वय्‌कः भाषा व जातिय आन्दोलनया छम्ह न्ह्यलुवा नं खः । प्रगतिवादी धारय् कविता च्वयादीम्ह वय्‌कलं थःगु कविताय् शोषित पीडिततय्‌गु सःयात बुलन्द रुपं थ्वयेकाः वयाच्वनादीगु दु । बिराट नेपालभाषा साहित्य सम्मेलन गुथिया थांयागु रुपय् वय्‌कः धिसिलाक्क दनाच्वनादीम्ह वय्‌कः तःदँ तक तःक्वः हे नायः व सचिव जुयाः ज्या यानादीगु दु । वय्‌कः नेपालभाषा एकेदमीया दुजः नं खः । वय्‌कःया कविता सफू स्वंगु पिदने धुंकूगु दु, गुगु थुकथं दु­­— न्ह्योलं पाचिने मफुगु बिश्वास (नेसं.११०९), जंगबहादुरया सल (ने.सं.११३१), ई व जि (ने.सं.११४१)। शोषित, पीडित जनताया पक्षय् उमिगु हकहीतया नितिं सः तइम्ह व उमिगु शक्तिप्रति विश्वास याइम्ह, कवि त्रिरत्नं वर्तमानप्रति न्ह्याक्व हे असन्तोष प्वंकेगु याःसां वय्‌कः कन्हय्‌या भविष्यप्रति धाःसा उलि हे आशावादीम्ह कवि खः ।