अबु भक्तविलास वज्राचार्य व मां असलमाया बज्राचार्यया कोखं ने.सं. १०६६ (वि.सं. २००३ भदौ १२) गते येँया मखं बहालय् प्राध्यापक सिद्धिविलास वज्राचार्यया जन्म जूगु खः । गणितशास्त्र तथा बौद्ध अध्ययन निगू विषयय् स्नातकोत्तर व विएड यानादीम्ह वय्‌कलं नेपालभाषा साहित्य ख्यलय् तःपु च्वखँ च्वयादीगु दु । ने.सं. ११२० य् नेपालभाषाय् अर्थसहित च्वयातःगु गुरुमण्डल वय्‌कःया न्हापांगु सफू खः । वय्‌कलं बुद्धधर्मनाप स्वापू दुगु च्वसु यक्व च्वयादीगु दु । बुद्धधर्मनाप स्वापू दुगु नेपालभाषाया अर्थसहितया वय्‌कःया मेगु सफू सम्यक सम्बुद्धलाभ खः । थ्व सफू बौद्ध साहित्य अध्ययनया ख्यलय् मूवंगु ज्वलं सिद्ध जूगु दु ।