चाकुक दयेकातःगु छगू कथंया नसायात चाकु धाइ । थीथी कथंया प्रबिधि छ्यलाः तुया तिं चाकु दयेकी । तुया तियात लय्ति धाइ । थ्व दयेकीगु थाय्यात तुसाः धाइ । तुसालय् ज्या यायेत थुलि हे मनू मुनाः यायेमाः धयागु दु । थन दुने थःगु हे कथंया नीति दयेकातःगु दइ । मूनायः, दुवाःनायः, च्यःदुवाः, यम्बाःनायः, च्वकाबाः नायः, त्याकः, घेवानायः, दथुकरा, धोका पहरा, तु छ््याइम्ह, च्वकाबजिकाः व थाहांकुहांजु यानाः भिंmनिम्ह दइ । सालय् यायेमाःगु दक्वं ज्या ब्वथलाः सकसिनं थःथःगु भालाकथं यायेगु याइ । ज्या सिमधःतले सुं गनं वने दइ मखु । नयेत्वने द्यने दक्वं अन हे याइ । नये बलय् थःसिकं थँजिपिन्त भागि याइ । सुयानं गनं मवंसे हे मगाःगु अबस्था जुल धाःसा पलेसा तयाः जक वनेगु याइ ।
फागुणं वा भचा भचा वलकि तु पिनाः बालाचःह्रेया बखतय् तु लयेगु याइ । तिंतु, मिश्रीतु, गैदातु तुस्याःतु आदि पीगु याइ । च्वका छत्वाःचा ध्यनाः यच्चुकी । सालय् यंकाः तिसी मत्यःतले भचा भचा जक चा प्याःथाय् गाः म्हुयाः कले कले चिनाः ल्हाकातइ । तःन्हुतक तयेमाल बाय् लः दत धाःसा ध्वगीगु भय दइ । अथे जुइबलय् लिकयाः मेथाय् तइ । तुसाः तुब्व दुथाय् सतिक बाय् अन हे नं दयेका तइ । चाकु दयेकेगु ज्या याइबलय् नायः पुजा, थाहांवाने पुजा, क्वाहांवने पुजा व तुसाः पुजा यायेगु याइ ।
तु तिसीत त्याकःख्वँतय् तयाः म्हुकुछिति हाकः जुइक त्याकः चुपिंपालाः तु कुचा याइ । पाचुकेत न्हाय्कं सिं च्वकी । तु कुचायात छ्याइ । छ्यायेगु व तु तिसिनाः लय्ति पिकायेगु थाय्यात पिने धाइ । लय्ति दायेकेगु भुतू, नयेत्वने यायेगु व च्वनेगु थाय्यात दुने धाइ । दुने ल्वहं निगः जवंखवं व दथुइ ख्येँय् छगः तयाः छथाय् अजिमाद्यः मानय् यानाः पुज्याना तइ । पिने छथाय् थासय् लाकांसिँ तयाः उकी साः कयातःगु चुइख्वः निख्वः धंकी । ञसिँया छखे च्वतय् ह्वः खनाः उकी बःचा ग्वःगु सिँ दुतछ्वयाः निखेयागु च्वः चुइख्वःया सालय् तइ । ञसिँया दुछिं भतपञ्जः थें ज्वनेछिंक पं तयातइ । मेखेपाखे बुइबाः निगः बल्लाक धंकी । थुकी निखें च्वःया भचा क्वय् निथासं साः कयातइ । साः ह्वतय् थताः व क्वताः निगः तइ । थताखय् यनाःया प्वः पाखेया च्वः काकाः यखाया तइ । मेगु च्वतय् नाः चिनाः ञसिँनाप स्वाकातइ । यनाःयात गनेद्यः मानय् याइ । छखेया च्वः चुइख्वतय् व दथुया ब्व क्वताय् लाकाः स्वथँ तयातइ । यनाःया प्वःपाखेया क्वसं स्वथँया दथुइ च्वंगु तुपिखय् छ्यानातःगु तु तइ । ञसिँ त्यलाः यनाः क्वकाइ । क्वहां वःगु यनाः व स्वँथ ल्वाकाः तुपिखय् च्वंगु छ्यानातःगु तु काकाः ति पिकायेगु याइ । थताः नं यनाः फुस्कय् जुइ मफयेक पनातइ । तु ख्वलां तुख्वः दयेकी । गुख्वः तुख्वःयात चुल्छि धाइ । तुख्वःया ल्याःकथं चुल्छि, बानि, स्वचुलु व न्हिसाल यानाः न्हिज्या क्वचायेकी ।
दुने छथाय् थासय् प्यप्वाः भुतू दयेकाः कसि व बं द्यछुइ । लय्ति वःलिसे कसी तयाः क्वाकी । बँथय् तयाः दायेकी । पाख वं मवं सुमिचां तुयाः ल्हातिं स्वइ । ग्वाराक वल धायेव पाख वंगु याइ । बंयात बबूचां कताकाः पाख वंगु चाकुचलाखय् प्वंकी । बँथय् कवय् थाःसा कवय्चां प्वलाः लिकाइ । चाकु ख्वाउँकेत गदाचां संकी । ख्वाउँल धायेव चुइतां तुयाकयाः पा पा ज्यानाः चाकुपा दयेकी । चाकुइ पतिंचां त्यलाः बान्कि तइ ।
छन्हुया छम्हसिगु यानाः छसीनिसें ज्याकुपाः फइ । थःथःपिनिगु भालाकथं ज्या याइ । मयात धायेव बं पुइकेगु याइ । म्हुतु ल्हायेगु कथंया बचन ल्हात धायेव नं बं पुइकी । सान कयाः तुति यखानाः च्वन धायेव नं बं पुलेमाली ।
कवय्
बँथय् क्वपुनाः थाइगु ख्वं । लय्ति दापाः वनाः ताकुइ धुंकूसां लिकाये ल्वःमनकि क्वपुनी । क्वपुंगु लिमकासे मेगु लय्ति तइ मखु । मि यक्व तच्वः जूगु मखन धायेव नं क्वपुने यः । मेगु ज्याय् अलमलय् जुइबलय् नं क्वपुनेयः ।

कवय्चा
कवय् प्वलाकायेगु ज्याभः । बःचा पुगु डण्डिइ सिँया चु तयातइ । छखेपाखे भचा क्वलः लुइकाः च्वका भचा फालाचिंका तइ । बुलुहुं क्वतय् यानाः कवय् लिकाइ ।

क्वताः
३—३.५ फुटति दुगु सिँ । १० इञ्चति फाः व ४ इञ्चति ब्या जुइ । बुइबाःया च्वय् पाखेया ह्वतय् निखें च्वः पिकया कसय् जुइक तयातइ ।

क्वहा‌ंवने पुजा
ज्या सिधयेकाः याइगु पुजा । तु काकेगु व चाकु दयेकेगु दक्वं ज्या सिधल धायेव ज्या सिधःगु लसताय् द्यः पुज्यानाः भ्वय् नयेगु याइ । थुगु पुजाय् खलःपिं भिंmनिम्ह जक च्वनी ।

गदाचा
चाकु संकाः ख्वाउँकेगु कुत्याति हाकःगु सिँयागु ज्याभः । छखेपाखे म्हुलिं थुइ । मेखेपाखे भचा तपु जुइ । चाकु ख्वाउँकाः पा ज्यायेत चलाय् च्वंगु चाकु संकेगु याइ ।

गैदातु
तपुगु तु । भचा ह्याउँ ह्याउँ धाइ । गौ तापाइ । यक्व ताहाकः जुइ मखु । ख्वला भचा ख्वातुसां तासय् याये अःपुइ । न्ह्यतुसे चाकुइ मखु ।

घेवाःनायः
तु छ्याइपिनि नायः । पिने च्वनाः तु छ्यायेगु याइ । इलय् ब्यलय् थ्वँ त्वंकेगु व बजां त्वंकेगु नं याइ । माली बलय् यम्बाःतय्त ग्वाहालि नं याइ ।
चला
तग्वःगु चाया भारा, गुलुभ्यगःया आकार जुइ । प्यं भचा ग्वलाः थें जुइ । हः चकनी । बंलय् तयाः दायेकातःगु चाकु थुकी तयाः ख्वाउँकेगु याइ ।

चुइख्वः
ञसिंँ दिकेत बँय् लाकांसिँ लायाः धंकातःगु निगः सिँ । १—१.५ फुतया हाकः जुइ । ३—४ इञ्चतिया ग्वः व १० इञ्चतिया फाः जुइ । छखे च्वतय् साः कयातइ । मेखे च्वतय् ग्वलाकार जुइक कियातइ । लाकांसिँया जवंखवं निथाय् साःह्वः दयेकातइ । निगू साःह्वतय् निगः चुइख्वः कसय् जुइक तयाः धंकातइ । च्वय्या च्वःया क्वसं निगलय्सं ह्वः छह्वः छह्वः खनातइ । थुकी कसय् जुइक ञल्हाः तयाः चुइख्वः बाया मवनीगु यानातइ । थुकी ञसिँ दिकेगु याइ ।

चुइता
चलाय् चाकु तुइगु ज्याभः । खुर्पि आकारया नयागु चतंचा थें जुइ । म्हूचा लाक चु तयातइ । चाकु पा ज्यायेत चलाय् चाकु तुयाः कायेत ज्या काइ ।

चुल्छि
ज्या याइबलय्या न्हापांगु छगू पाख । गुख्वः तुख्वःया ल्याखं तु तिसी सिधल धायेव छगू पाख वंगु याइ । थुकियात चुल्छि नं धाइ । चुल्छि क्वचाल धायेव थ्वँ त्वनेगु याइ ।

च्यःदुवाः
दुवाः नायःया क्वसं च्वनीम्ह मनू । दुवाः नायःयात ग्वाहालि याइ । चाकु दयेकी । दुवाः नायलं ब्वःगु ज्या याइ । बँ पुनाः नीलः कयाहइ ।

च्वकाबजिकाः
दकलय् सिथय् च्वनाः तु छ्याइम्ह । मेगु छुं ज्या याइ मखु । सकसितं हनाबना तयेगु याइ । न्ह्याम्हसिनं ज्या ब्वःसां यानाबीगु याइ ।
च्वकाबाः नायः
ञसिँ गयाः तु तिसीम्ह । ञसिँया च्वकापाखें गइ । भतपञ्जः थें तयातःगु पं बःकयाः ञसिँ क्वत्यलेगु याइ । ति स्वब्यात धायेव तिं न्हुयाः क्वहाँ वइ । तिंन्हुइबलय् यम्बाः नायःनाप पाःलाकी ।

ज्याकुपाः
तुसालय् फइगु पाः । छसीनिसें फयेगु याइ । सुयागु पाः लात वकुन्हु वयागु हे तु काकाः चाकु दयेकेगु याइ । वकुन्हुयात नसाबजि ज्याकु पाःलाःम्ह हइ । थुकिया निंतिं भिंmनिकुले जाकि, भिंmनिकुले बजि, प्यता घासा, सकसितं गाक्क वः व थ्वँ छघः हइ । चि चिकं मसलाया निंतिं छपाँय्या बगल दुगु निपाँय् व चासि नयेत म्हं बाचकंतिया ल्याखं मख्वःनिगु चाकु काइ । नक्व पतिं द्यःयात तइ । छन्हुया छम्हसिगु पाः याइ । सकसिगुं पाः क्वचाल धायेव हानं दोहरय् याइ ।

ञसिँ
यनाः सालाः तु काकेत तयातःगु सिँ । चसिँयागु दयेकी । भिंmन्याकु नीकु हाकः जुइ । ४ इञ्चति फि जुइ । छखेपाखे २ इञ्चति यानाः च्वकाय् तुति तयेगु थाय् दयेकातइ । थुकियत लंचापं धाइ । मेखेपाखे १२— १४ इञ्चति ब्या दइ । सिथय् ग्वलाकार यानातइ । थन च्वकाया भचा क्वय् ह्वः छह्वः खनातइ । थुकियात ञसिँप्वाः धाइ । थुकी ञल्हाः दुतछवयाः चुइख्वःया दथुइ तयातइ । थुकिं भचा दथुपाखे ग्वारा छग्वारा दइ । थन नाः चीगु याइ । थुकियात ञगलः धाइ ।

तिंतु
चिचीपुगु तु । तुयूगु व हाकुनःगु दइ । यक्व तमा जुइ मखु । गौ भचा ख्वातुइ । ति यक्व वइ । न्ह्यतुसे चाकुइ । तु पाले व छ्याये अःपुइ । थुकियात द्यःतु नं धाइ ।

तुख्वः
तु तिसी धुंकूगु तुया ख्वला । म्हुकुछिति हाकः जुइ । कले कले यानाः कसय् जुइक चिनातइ । निगू क्वलां न्ह्याये दक्वया छकले याइ । छकलेयात छख्वः धाइ । तुख्वः गंक पानाः च्याकेगु याइ । मचाबूपिन्त क्वथाय् तयाः चिकं बुकीबलय् तुख्वः च्याकाः बुकी । थुकिया राप तच्वः चिच्वः मजुसे मधूर जुइ । कुँ उसुसे पालुसे जुइ मखु । मि सीधुंकाः नं क्वथा क्वानाः लुमुसे च्वनाच्वनी । ततःधंगु पुजा यानाः मार च्याकीबलय् तुख्वतय् मार तियाः च्याकी ।

तुछ्याइम्ह
तुयात पति चिंकीम्ह । सालय् तु काकाः ति पिकायेत तु पँ पँ म्हुइक छ्याइ । त्वाकलय् द्यःने तयाः सिँमुगलं छकः छखे च्वतय् व छकः मेखे च्वतय् यानाः छ्याइ । कुचागु तु काकलं सालाकाइ ।

तुपि
तु काकाः लय्ति पिकायेत स्वँथय् तु तयेगु थाय् । बुइबाःया नापसं लाइ । भचा थथ्याः थे जुइ । छक्वलं यक्व तइ मखु, भचा भचा यानाः तइ ।

तुसाःपुजा
ज्या क्वचायेकाः न्यायेकीगु पुजा । द्याः त्याः दक्वं हर हिसाब याये सिधयेकाः थुगु पुजा याइ । खलःपिनि जहान परिवार दक्वं थ्याकी । आम्दानिया अबस्थाकथं भ्वय् न्यायेकेगु याइ ।

तुस्याःतु
भचा हाकु हाकु नःगु तु । पु तपु जुइ । गौ भचा तापाइ । तसकं चाकुइ मखु, भचा न्यालु पहः वइ ।
छ्याये बलय् ति छ्व छ्व म्हुइ । छ्याये नं थाकुइ ।

त्याकः
तु कुचा याइम्ह । लुखाया नापसं खलय्
च्वनी । त्याकःख्वँतय् तयाः चुपिं पालाः तु कुचा
थली । हाकः म्हुकुछिति जक याइ । पालेत तु नं वं हे सालाकाइ ।
त्याकःख्वं
तु पालाः कुचा यायेत दिकेगु सिँ । ग्वय्छासिँ बाय् बल्लाःगु सिं दयेकी । म्हुकुछि फि, निकु हाकः व कुछिति ब्या याइ । थुकियात जन्मकाःसिँ नं धाइ ।

त्याकःचुपि
नँयागु चुपि । म्हूलाक सिँयागु बाय् नत्याःयागु हे चु दयेकातइ । भचा झ्यातुइ । पाँय् तयाः धाः दयेका तइ । छक्वलं प्यपु न्यापु तु पाले जीकातइ ।

थतां
३—३.५ फुटति दुगु सिँ । १० इञ्चति फाः
व ४ इञ्चति ब्या जुइ । बुइबाःया क्वय् पाखेया ह्वतय् निखें च्वः पिकयाः कसय् जुइक तयातइ ।

थाहांक्वहांजु
उखेथुखे वनेमाःगु ज्या याइम्ह मनू । सुथय् बहनी सकसितं जा थुयाः नकी । माःमागु ज्वरजाम याइ । बजां व थ्वँ त्वंकेत नं ग्वहालि याइ ।

थाहांवने पुजा
ज्या यायेत याइगु पुजा । ज्या यायेन्ह्यः ज्या सुथांलाक क्वचायेमा, छुं बिघ्न बाधा मजुइमा धकाः अनया इस्तदेवयात आराधना यानाः पुजा याइ ।

थुकरा
घेवाः नायःक्वसं च्वनाः तु छ्याइम्ह । मेपिन्सं
तुछ्याःगु मिलय् जू मजू स्वइ । घेवाः नायःयात ग्वाहालि याइ । काकलं तुकुचा सालाकाइ ।

दुवाःनायः
नायःया क्वय् च्वनाः ज्या याइम्ह नायः । ज्याया ब्यबस्था मिलय् यायेगुली नायःयात ग्वाहालि याइ । चाकु दयेकेगुली स्वइ । भुतुली मि च्याकेबी ।

धोका पहरा
लुखाया नापसं च्वनाः तु छ्याइम्ह मनू । ज्या दितकि बहनी सुकू बाय् भीत तयाः लुखा तीगु व भौप्वाःचा तीगु ज्या नं वं हे याइ । कुचा यानातःगु तु नं काकलं सालाः न्ह्याकाबी ।

नाः
छ्यंगुलिं दयेकातःगु खिपः थें ज्याःगु चिखि । मेय्या छ्यंगुलिं दयेकातइ । म्हुलिं थू ज्वलंया त्याः जुइ । छखेया च्वः यनाखय् व मेखेया च्वः ञसिँइ ची । ञसिँ क्वत्यलीबलय् थुकिं यनाः सालाः तु काकेगु याइ ।

नायः पुजा
ज्या यायेन्ह्यः नायलं याइगु पुजा । थःपिनि इस्तदेव अथबा अन नापसंया द्यःयात लुमंकाः छुं कथंया बिघ्न बाधा मजुइमा व ज्या सुथां लायेमा धकाः याइगु पुजा ।

न्हाय्कंसि
तु कुचा यायेत पालेबलय् पाचुकेगु सिँ । तग्वः जुइ । न्ह्यःनेपाखे बछि त्याकःख्वंया नापं माथंवंक बराबर यानाः तइ । ल्यूनेया बछि तु च्वका उति ग्यंकेत थकया तइ ।

न्हिसाल
न्हिछिया ज्या क्वचाःगु अबस्था । गुख्वः गुख्वः प्यथाय् तु काके सिधल धायेव न्हिसाल धाइ । न्हि साल धायेव चासि नकी । न्हि मसाःसा चासि नकी मखु । न्हि मसाःगु तुख्वःया ल्याः मेगु पालय् सायेके बी ।

प्यप्वाःभुतू
न्ह्यःने निप्वाः ल्यूने निप्वाः यानाः प्यप्वाः दुगु भुतू । आपा तँ चिनाः भुतू अतःबुतः लाकाः दयेकातइ । चां इलाः पिचुका तइ । सामान्य भुतू सिकं भचा तःधं जुइ । न्ह्यःने मि दुइत छप्वाः व जवपाखे नौ घ्वायेत छप्वाः प्वाः दइ । ग्वं ग्वंगु सि दुइछिंक भुतूप्वाः भचा तप्वाः याइ । ल्यूनेयागु प्वालय् कसि द्यछुइ । तु काकाः लय्ति वःलिसे थुकी तयाः क्वाकी । न्ह्यःनेया प्वालय् बं द्यछुइ । क्वानाच्वंगु लय्ति थुकी तयाः दायेकी ।
बं
लय्ति तयाः दायेकीगु चायागु भारा । क्वंचा बां जुइ । तग्वः जुइ मखु । छायेके क्वं पाय्ग्वः जक जुइ । तफि यानाः बुक्क उनातःगु जुइ । भुतुली द्यछुनाः क्वाकी । तसकं क्वात धायेव कसी तयाः क्वाकातःगु लय्ति थलचा छगलं तुयाः थुकी तयाः दाबुक दायेकेगु याइ । छक्वलं तइ मखु ।
छकःया बामाना स्वचकंया ल्याखं जक तइ । न्हापा तयागु ग्वारा काल धायेव जक मेगु तइ । भचा न्हापा लात धायेव दासि वयाः वाइगु भय दइ ।

बबूचा
बं ल्ह्वनेत न्वकीगु ज्याभः । भुस्याः बां वयेक सुं थानातइ । लथ्याये जीक नाइसे च्वंकातइ । ल्यूने ज्वने छिंक ग्वाराचा वयेकातइ । लय्ति दापाः वन धायेव थुकिं न्वकाः चलाय् प्वंकी ।

बानि
निगू पाख तु काके सिधःगु ई । गुख्वः गुख्वः निथाय् तुख्वःया ल्याखं तु काकेधुन धायेव बानि वन धाइ । बानि वन धायेव बजि नकी । बजि नके न्ह्यः द्यः पुजा यानाः सिन्हः तिकेगु याइ ।

बुइबाः
छगू फुट फाला, १० इञ्चति ब्या व १०—१२ फुटति हाकःगु निगः सिँ । ग्वय्छासिँ बाय् फयां फक्व छाःगु व बल्लाःगु सिं दयेकी । निगलं सिँ दथुं भचा च्वय् व वयां निकुति क्वय् यानाः पिचायेक निप्वाः प्वाः खनातइ । कुत्याति पाकाः चाय् गाः म्हुयाः बल्लाक धंकी । च्वय्या ह्वतय् थताः व क्वय्या ह्वतय् क्वताः च्वः छहाकःचा पिहां वयेकाः कसय् जुइक तइ । क्वतालय् स्वथँ दिकी ।
मिश्रीतु
तुयागु छता जात । तुइसे भुयू नइ । गौ ससती । पु तपु जुइ । यक्व ताःहाकः जुइ मखु । ति यक्व वइ । न्ह्यतुसे चाकुइ । गौ सतीगुलिं छ्यायेबलय् थाकुइ ।

मूनायः
तुसाःया दकलय् मुख्यम्ह मनू । दक्वभनं मिखा ब्वयाच्वनी । अय्भय् दक्वं वं हे स्वइ । ज्या ब्वये माःपिन्त माः माःकथं ज्या ब्वइ । ज्या याःगु मिलय् जू मजू स्वइ । लवःकवः मिलय् मजूसा मिलय् यानाबी । सुयां छुं खँ न्यनेमाःसां वयाके हे न्यनी । हौसला बियाः ज्या याकी । छुं नं न्हूगु खँ निर्णय याये माःसा थःयां क्वय्यापिं नायःपिंनाप सल्ला साहुति यानाः निर्णय यायेगु याइ ।

यनाचा
तु काकाः लय्ति पिकायेगु सिँ । सूसिँयागु दयेकी । ४ फुट हाकः व ३—४ इञ्चति ब्या दइ । १ फुटति फाला जुइ । छखेपाखे सपःचा थें ग्वारा दइ । मेखे भचा चाः तुइका तइ ।

यम्बाःनायः
ञसिँया प्वःपाखें थहां वनाः ञसिँ क्वत्यलीम्ह मनू । भचा बल्लाःम्ह जुइ । भतपञ्जः थें यानाः तयातःगु पं बःकयाः थहां वनी । तिसी गात धायेव तिंन्हुयाः क्वहां वइ । तिंन्हुइबलय् च्वकाबाः नायःनाप पाःलाकी ।

सुमिचा
पाखवंगु चाकु तुइगु ज्याभः । चिकिचा धंगु चतंचा थें च्वनी । चु भचा ताःहाकः जुइ । दाबुइ गाःगु चाकु भतीचा तुयाः चाकु पा ज्यायेत ज्यू मज्यूनि स्वयेत ज्या काइ ।

स्वःथँ
तु कुचा तयाः तु काकेगु सिँ । ग्वय्छासिँ बाय् छाःगु सिँया दयेकी । ७—८ फुटति हाकः, १— १.५ फुटति ब्या व ३—४ इञ्चति फि जुइ । भचा भेसें लुयेकातइ । तुपिया क्वय् सिथय् निखें धःचा थें दयेकाःतइ । च्वकाया नापसं ति क्वकायेत ह्वः छह्वः खनातइ ।

स्वचुलु
स्वंगू पाख तु काके सिधःगु अबस्था । स्वचुलु सिधल धायेव ई स्वयाः न्हापां लाःथें जूसा दिपाः कयाः थ्वँ व बजां त्वनेगु याइ ।

साय् (साँचो)पाखें धातु मूर्ति तयार जुइधुंकाः दकलय् न्हापां मूर्ति क्वय्या भागय् धातु लुइत दयेकातःगु नलि अर्थात नौ फ्वःयात कःति वा कतामं चायेगु याइ । व धुंकाः बां (आकृति)यात थाय्थासय् धातु वनीगु नलिया कथं ज्या कायेत तयातःगु चनुत नं कतामं चायेगु याइ । थीथी सुमिचा थीथी वःचां व खाक्ंिस मूर्ति छगुलिं सुयाः वा बुलाः मूर्तिया बांं प्रस्ट व पिचुकेगु याइ ।

पञ्चधातु
ली, सिजः, लँु, वहः, नँ आदि न्याता धातु ल्वाकःछ्यानाः दयेकातःगु धातुयात पञ्चधातु धाइ । थथे न्याता धातु मिश्रण यानाः दयेकातःगु मूर्तियात पञ्चधातु मूर्ति धाइ ।

भ्वंचा
भ्वंचा धयागु खु (धातु) नायेकेत दयेकातःगु ८०० निसें १३०० डिग्रीतकया तापक्रमय् नं स्यनी मखुगु गथुचां दयेकातःगु चाया छताजि थल ।

लिसं तयेगु
साय्पाखें तयार जूगु कोरा धातु मूर्तिइ गनं गनं बां पूमवंगु वा धातु फ्वः मचाःगु दाग वा ह्वः नं जुइफु । थथे जूगुु मूर्तिइ लिसं तयेगु वा ग्यास वायरिंग यानाः मूर्तिया बां पूवंकेगु याइ ।

ली
सिजः, जस्ता, क्यलं ल्वाकछ्यानाः दयेकातःगु धातुयात ली धाइ । थ्व धातु नायेकाः मूर्ति, प्रतिमा, बसजाः ज्वलं आदि दयेकेगु याइ ।
वःचा
धातु मूर्ति वा अनेक कथंया धातुया सामान पिचुकेगु व आकार प्रकार मिले यायेया निंतिं नँया बलालिं मसिनगु धार तयाः दयेकातःगु थीथी साइजया छताजि ज्याभः ।

सिजः
सिजः छगू खनिज धातु खः । थ्व धातु नायेकाः मूर्ति, प्रतिमा, बसजाःज्वलं आदि दयेकेगु याइ ।

सुमिचा
धातु मूर्तिया बां पिचुकेगु ज्याय् छ्यलेगु निंतिं दयेका तःगु नँया ६ इञ्च ताःहाकःगु च्वका चाःतुइकाः उकी धार तयाः दयेकातःगु छताजि ज्याभः ।

स्वाग
धातु नायेकेत ग्वाहालि याइगु छताजि वस्तु ।

कतां कीगु
धातु मूर्तिकलाय् छगू महत्वपूर्ण विधि मध्यय् कतां कीगु विधियात कयातःगु दु । मूर्तियात सिँया त्वाकलय् दिकाः छपा ल्हातं चिग्वःगु नँया मुगलं व मेगु ल्हातिं ज्वनातःगु कतामय् दायाः मूर्तिइ दुगु बुट्टात कियाः स्पष्ट यायेगु व थीथी बुट्टा थपू यायेगु ज्यायात कतां कीगु धाइ । थुगु ज्याया निंतिं हरेक कथंया नँया चिचीधंगु कतां थीथी साइजया क्वायेगु मुगःत दयेकातःगु दइ । धारपाखें च्वामूगु, तप्यंगु, चन्द्राकार लूगु, पतिचिंगु, धार मदुगु, गाःवंगु, दमोछ्याःगु इत्यादि कतां बुट्टा अनुसारया दयेकाः छ्यलेगु याइ । मूर्ति अनुसारया बुट्टा नं फरक फरक जुइ । शाक्यमुनि बुद्ध, बैलोचन बुद्ध, अक्षोभ्य बुद्ध, मेडिसियन बुद्ध, लक्ष्मी, सरस्वति आदि, शान्त मुद्राया मूर्तिइ घाँय् बुट्टा, अस्त मंगल, स्वांफ्वः बुट्टा नापं बुद्ध जीवनी तकं कीगु याइ । अथे हे क्रोध मुद्राया मूर्ति कालि, भगवति, भैरव, महांकाल, कुवेर, चक्रसम्बर आदि मूर्तिइ मुद्रा अनुसारया बुट्टा तयेगु ज्या जुइ । थथे कतां की न्ह्यः मूर्ति खालि थासय् झौ जायेकेमाः । गुकिं यानाः मूर्तिइ कतां कीबलय् बुट्टा पतचिनाः ह्वगनी मखु । छगू धातु मूर्तिइ मुक्कं यानाः प्यंगू शैलिं बुट्टा तयेगु वा बुट्टा कीगु याइ । १) मूर्ति दुगु बुट्टा बांलाकेगु २) मूर्तिइ दुगु बुट्टात भिंकेगु व थप बुट्टा तयेगु ३) थकयाः बुुट्टा कीगु ४) कियातःगु बुट्टा छपातं लुँ पाता वा वहः पातां त्वपुयाः मूर्तिइ च्वंगु बुट्टायात लँुया वा वहःया थें खने दयेकेगु । अले छगू धातुया मूर्तिइ कतां कीधुंकाः स्पष्ट व जीवन्त थें खनेदइ ।

कतांकीम्ह
छुं नं धातुया बां वा मूर्तिया आकार प्रकार कथयां मूर्तिया बां प्रष्ट यायेगु नापं मूर्ति अनुसारया थप बुट्टा लुइकाः मूर्तियात जीवन्त याइम्ह ।

झौ
अप्पायात निनाः कापतय् चाले यानातःगु अप्पाचुं (सुर्कि) व सिलाय् (साल धुप) नं अथे हे निनातःगु निताजि चुं मात्राकथं ल्वाकछ्यानाः उकी चिकं तयाः बाताचाय् संकुसंकुं दायेकाः तयार यायेगुयात हे झौ दयेकेगु धाइ । झौ क्वाकल धाःसा जक नाइसे च्वनी । झौयात कतांकीगु नापं अनेक ज्याय् छ्यलेगु यानातःगु दु । कतां कीगु निंतिं मूर्तिया खालि थासय् झौ जायेकेमाः । गुकिं यानाः मूर्तिइ कतां कीबलय् बुट्टा पतचिनाः ह्वगनी मखु । हाकनं कतां किये क्वचायेकाः झौ क्वाकाः लिकायेगु याइ ।

धातु मूर्ति पुलां यायेगु विधि
साधारणतयाः धातुमूर्ति पुलांगु थें खने दयेकेगु व मूर्तिइ दुगु थीथी कथंया बुट्टा प्रष्ट यायेगु निंतिं लाकामय् पायेगु हाकुगु रोगन पालिसं बुट्टात गनगन दु, अन अन रोगनयात ब्रसं पानाः अगूचा वा मकलय् क्वाकेगु याइ । अले रोगन क्वानाः ति जुयाः मूर्तिइ दुगु बुत्ताय् दुहां वनी । अले छकू नाइसे च्वंगु कापतं मूर्ति छगुलिं हुइगु याइ । थथे मूर्तिइ दुगु सकतां बुत्ताय् हाकुगु रोगन लानाः बुट्टा प्रष्ट व मूर्ति पुलांगु थें खनेदइ । थुलि जक मखु रसायन पुलां यायेगु धकाः मेगु थीथी कथं नं पुलां यायेगु चलन दु ।

नँया मुगः
धातु मूर्तिइ बुट्टा क्वायेत, दायाः माथं वंकेत छ्यलीगु छखें पिचुकातःगु मेखे च्वकाः लुइकातःगु, दथुइ ह्वः तयाः कथि स्वचाकाः ज्वनाः क्वायेत ज्याछिंक दयेकातःगु चिग्वःगु, तग्वःगु अनेक साइजया छताजि नँया ज्याभः ।

बफ नकेगु
कतां कियाः तयार जूगु धातु मुर्तियात कापः फिफि तयाः दयेकातःगु चक्का घोदाय् (चाःहिलीगु मेसिनय्) तयाः चाःहीकाः कोरा पालिस व लाल पालिस नितां पालंपाः तयाः बफ नकेगु याइ । गुकिं मूर्ति पिचुुसे च्वनीगु नापं प्वालाप्वाला थीगु जुइ ।

मूर्तिया बुट्टाय् लुँ वा वहः तायेगु
लुँ वा वहःयात सालुक्क पाता दयेकाः (पेले यानाः) धातुया मुर्तिइ थाय्थासय् भूमिं वा कियातःगु बुट्टायात त्वपुयाः बांलूगु कथं कतामं लिहां मवइकथं पातायात स्वचाकाः कतामं क्वानाः काकेगु याइ । थथे काकेधुंकाः मूर्तिया बुट्टा छगुलिं लुँ वा वहःया थें च्वंक खनेदइ । थुगु विधियात मूर्तिइ लुँ तायेगु वा वहः तायेगु धाइ ।

सिँया त्वाकः
धातु मूर्तिइ बुट्टा तयेत मुगलं कतां क्वाये ज्याछिंकः मूर्तियात लिधंसाकथं दिकेत दयेकातःगु मूर्ति अनुसारया सिँया ग्वं वा सिँग्वं ।

लुं सीगु विधि
धातु मूर्तिकलाय् लँु तयेगु वा लुं सीगु धकाः न्हापां लुँयात सालुक्क पाता दायाः वा पेले यायेगु याइ । व धुंकाः चिचीकू जुइक कैचिं चाइ । थथे चानातःगु लँु छब्वय् पाःलाः (मर्करी) झिब्व ल्वाकछ्यानाः फि वा चिमया खाः लुँनापं ल्वहंमाय् तयाः धू जुइक नीगुयात लुँ नीगु धाइ । लुँ धू मजूतले खाःचुं वा फि ततं नीगु याइ । थुकथं लुँ नी धुंकाःया पाःलाः (मर्करी) व लुँ ल्वाकज्यानाः तुइसे च्वंगु धू थें जुइ । फि वा खाःचुं फुक्क सिलाः वांछ्वइ ।
पाःलाः (मर्करी) व लुँ ल्वाकज्यानाः तुइसे च्वंगु पेस्ट कयःया रिकापिइ तयाः चिपुगु ब्रस वा नतूचाया ग्वाहालिं धातु मूर्तिइ गुगु गुगु थासय् लँु तयेमाःगु खः उगु उगु थासय् तइ । मूर्ति वा प्रतिमायात तेजाबय् थुनाः धातुया ब्रसं थानाः दुगु खिति फुक्क सफा याइ । व धुंकाः मूर्तिया लुँ पायेगु याइ । थथे लँु पायेधुंकाः मूर्तियात गनस्टोभं क्वाकेगु याइ । मूर्ति क्वाःलिसे लुँइ ल्वाकज्यानाच्वंगु पाःलाः (मर्करी) ब्वया वनी, अले म्हासुक लँु खनेदयावइ । थथे यानाः नं लँु खने मदयेकः पाःलाः (मर्करीं) त्वपुयाः त्वइसे च्वनाच्वंगु दुसा अन छकू कपाय् कयाः कपाय्या ग्वाहालिं बुलुहुं हुयाः लुँ खनेदयेकेगु याइ । थ्व धुंकाः लुँ तयातःगु मुर्ति लः दुगु बाताय् थुनाः हथं तयाः लसां थानाः लुँ तयातःगु सकतां भाग तल्के यायेगु याइ ।

कैंची
तःधंचीधं हरेक साइजया धातु चायेगु वा लुं सीगु ज्याया निंतिं सालुगु लुँ चायेत छ्यलेगु नँया छताजि चायेगु ज्याभः ।

खाः
चिम, ट्युबलाइट आदि तछ्यानाः वइगु खाः । मूर्ति, प्रतिमा लुं सीगु निंतिं लँु धू जुइक नीगु निंतिं ग्वाहालि याइगु छताजि वस्तु ।

तारया ब्रस
थीथी साइजया धातुया मसिनगु तारं दयेकातःगु ब्रस । मूर्ति, प्रतिमायात सफा यायेगु निंतिं छ्यलीगु वस्तु ।

तेजाब
धातुया वस्तु सफा यायेगु निंतिं छ्यलीगु एसिड । माःकथं प्लाष्टिकया बाताय् लःनापं तेजाब ल्वाकछ्यानाः थुकी धातुया मूर्ति थुनाः सफा यायेगु याइ ।

पाःलाः
पाःलाः (मर्करी) थ्व छगू झ्यातुगु तरल धातु
खः । धातुया बां, मूर्ति, प्रतिमाय् लुं सीगु निंतिं लँुनापं ल्वाकछ्यानाः तइगु छताजि वस्तु ।

फि
खुसिं चुइका हइगु चिचीग्वःगु ल्वहंचुं । मूर्ति, प्रतिमा लुं सीगु निंतिं लँु नीत ग्वाहालि याइगु छताजि वस्तु ।

लुँ सीम्ह
गुगुं नं धातुया बां, मूर्ति, प्रतिमा लुँया हे थें खनेदयेक लुँ पाइगु ज्या याइम्ह वा लुं सीगु ज्या याइम्हेसित लुँ सीम्ह धाइ ।

ल्वहंमा
ल्वहंया स्वकुंलाःगु दथुइ गाःवंक दयेकातःगुयात ल्वहंमा धाइ । नापं ल्वहंया हे चिग्वःगु ल्हातं ज्वनाः नीत ज्याछिंक दयेकातःगुयात ल्वहंमचा धाइ । मूर्ति, प्रतिमा लुं सीगु निंतिं लँु ल्वहंमाय् तयाः नीगु याइ ।

हथं
हथं छताजि प्राकृतिक वनस्पति खः । थुकिया ख्वला लखय् तयाः ब्वब्वस्यात धाःसा साब्वं वा सरफ थें चुलुसे च्वनाः फिँज वइ । लुं सीधुंकाः मूर्ति, प्रतिमायात हथंलखं थानाः लुँ तयातःगु सकतां भाग तल्के यायेगु याइ ।

मूर्तिइ ख्वाः च्वयेगु विधि
छगू धातु मूर्ति सफा यानाः थीथी बुत्तायात कतामं थपू व प्रष्ट यायेधुंकाः दकसिबय् लिपा लुं ख्वाः च्वयेगु याइ । थथे लुं ख्वाः च्वयेगु धकाः मसिनगु ब्रसया ग्वाहालिं ख्वाः छपातं लुँ पायेगु याइ । नापं मूर्तिया मिखा, मिखाफुसि, म्हुतुसि, न्हाय्, सँ आदियात थीथी रंगं च्वयाः मूर्तियात थप जीवन्तता बी । थ्व ज्या क्वचायेधुंकाः छगू धातुया मूर्ति तयार जुइ ।

ब्रस
लुँयात धू यानाः (पाउदर) दयेकातःगु व मूर्तिया मिखा, म्हुतु, सँ आदि च्वयेगुया निंतिं मूर्तिया साइजकथंया थीथी मूर्तियात आकर्षण यायेगु याइ ।

रंग
प्राकृतिक रंग वा लःनापं ल्वाकछ्याना मूर्तिया ख्वालय् नापं थीथी भागय् माःकथं रंग दयेकाः पायेगु याइ ।

लँुचुं
लुँयात धू यानाः (पाउदर) दयेकातःगु छताजि मूल्यवान वस्तु । थुगु लुँचुं नं मूर्तिया ख्वालय् पायेगु याइ । थथे लुँ पानातःगु ख्वाः लुँयागु थें खनेदइगु खः ।

माज्या
धातुया छकू पातायात झलिइ तिकाः कतां कियाः थीथी मूर्ति, ख्वाःपाः, बुट्टा नापं अनेक कथंया आकृति दयेकेगु याइ । सिँया त्वाकलय् गेना, खलु वा कोणय् दिकाः न्यकू वा नँया तःग्वःगु, चिग्वःगु, च्वकालूगु अनेक कथंया थीथी मुगलं क्वा जक क्वानाः हे छगू कलाकारया मनोभावनाकथं द्यः, मूर्ति, प्रतिमा इत्यादि तयार याइ । थुगु प्रविधिइ आकृतियात मिइ छुयाः लिसं तयाः छगुलिं मेगु ह्वनाः दयेकेगु याइ । थथे कलाया शैली भावयात रेखांकन यानाः तःधं, चीधं अनेक साइज कथंया देगः, मूर्ति, प्रतिमा, बां व बुट्टा, तयार यायेगु विधियात माज्या धाइ । थथे दयेकातःगु मूर्ति आपालं हलुका जुइ । थासंथाय् लुँया पाता ह्वनातः थें धातुया पातात लिसं तयाः ह्वनातयेगु याइ । थज्याःगु धातुया मूर्ति वा प्रतिमा गनं हात धाःसा पतिचिने नं फु । थथे धातुया मूर्ति दयेकेगु प्रविधियात थ्वज्या (थ्वयाः दयेकेगु ज्या) धकाः नं धायेगु चलन दु । नेपाःया थीथी देगः, देगलय् मूर्ति, प्रतिमा, झल्लर, ली वा सिजःया पौ, ध्वाँय् थ्व हे प्रविधिं दयेकातःगु खः ।
कुचा ह्वनाः दयेकीगु थज्याःगु मूर्ति व प्रतिमात पाताया जक मजुसे म्ह पातायागु अले छ्यं, ल्हाःतुति व आसन धालय् यानाः दयेकाः तयेगु नं चलन दु । सिँयागु व प्रस्तर मूर्तियात नं धातुया पातां आकृति अनुसारया बां लुइकाः उकी द्यःने भुनेगु नं माज्याया हे छगू विधि खः । गुकिं यानाः प्रस्तर वा मेमेगु वस्तुया आकृति नं धातुया हे आकृतिकथं खने दयाच्वनी । थथे प्रमाणकथं दयेकातःगु मूर्ति प्रतिमा, जनावर हरेक देगः, देगलय् द्वारपालकथं तयातःपिं सिंह, किसि, थीथी जुजु पिनिगु प्रतिमा व दातापिनिगु प्रतिमा आदि खः ।

कोण
थ्व नं अंग्रेजी ‘ति’ आकारया ज्याभः खः । ६ इञ्च ताःहाकःगु गुकी क्वय्या ब्व च्वामुसे च्वनी । च्वय् निथाय्या जवंखवं छथाय् च्वकाः लूगु व मेथाय् माथं वंगु ज्याभः खः । थ्व ज्याभः सिँग्वलय् तानाः मेगु च्वकाय् पाता दिका पाताय् लुइकातःगु बांयात मुगःचां क्वानाः मिले यायेगु याइ ।

थ्वज्या
मूर्तिकारया मनोभावकथं छुं नं धातुया छकू कुचा पाताय् सिसाकलमं आकार च्वयेगु याइ । व धुंकाः उगु पातायात खलुइ तयाः नँया वा न्यकूया मुगलं क्वा जक क्वानाः थीथी कथंया आकार प्रकार लुइकेगु याइ । थथे थकयाः मूर्ति प्रतिमा, अनेक कथंया बुट्टा, ख्वाःपाः जनावर आदि दयेकेगु प्रविधियात थ्वज्या धाइ ।

नँ ग्यना
थ्व नँया तग्वःगु १०। १२ किलोया मुगःयात दथुइ चानाः निकू कुचा मध्यया छकू कुचाया दयेकातःगु ज्याभः ख । अले थुगु ज्याभः सिँग्वलय् तानातयेगु याइ । पातायात आकार प्रकार, तःफि, चिफि वा बराबर यायेगु निंतिं थुकी द्यःने तयाः नँया मुगलं छ्यायेगु याइ ।

नँयागु खलु
नँया २ फिट ताःहाकःगु १ इञ्च ग्वलाःगु च्वकाय् भचा चाःतुइकाः माथं वंकातःगु धातुया पाताय् छुं नं बां लुइकेगु ज्याया निंतिं छ्यलेगु छताजि ज्याभः ।

न्यकू मुगः
मेय्या न्यकूयात चानाः दयेकातःगु छखें पिचुगु व मेखें च्वामुगु दथुइ ह्वः तयाः ह्वतय् कथि स्वचाकाः दयेकातःगु ज्याभः । थुगु ज्याभलं धातु क्वानाः अनेककथं बां लुइकेगु याइ ।

पाता
लुँ, वहः, सिजः, लीया धातुयात दायाः वा पेले यानाः माःकथं तफि, चिफि तःपाः, चिपाः यानाः पिचुकाः दयेकातःगु पाता । गुकी छम्ह मूर्तिकारं थःगु मनोभावं च्वयागु कथं बां दयेकेगु याइ ।

सिँया खलुत्वाकः
थ्व सिँयागु अंग्रेजी ए (ब्) आकारया ज्याभः खः । थुगु त्वाकलय् नँयागु खलु दिकाः खलुइ द्यःने पाता दिकाः मुगलं क्वानाः थीथी मूर्तिया बां आकृति दयेकेगु याइ ।

सिँया त्वाकः
१–२ फिटया सिमाया ग्वः चानातःगु त्वाकः । थुगु सिँया त्वाकलय् कोणचा व नँया ग्यना तानातयेगु याइ । कोणय् तयाः आकृति बांयात मिले यायेगु याइ । ग्यनाय् पातायात आकार प्रकार तःफि, चिफि बराबर यायेगु निंतिं थुकी द्यःने तयाः नँया मुगलं छ्यायेगु याइ ।