स्वतन्त्र संसार महर्जन – नेवाः सांस्कृतिक ज्ञानकोश

नेपालभाषाया संकिपा ख्यलं लूम्ह स्वतन्त्र संसार महर्जन बहुप्रतिभां जाःम्ह कलाकार खः । अबु तेजबहादुर महर्जन व मां कान्छीमाया महर्जनया कोखं ने.सं. ११०३ सिल्लाथ्वः पुन्हि, सुक्रबारखुन्हु यल महानगरपालिका २१ वडा, ख्वनाय्‌ वय्‌कःया जन्म जूगु खः ।
ने.सं. ११२६ दँय्‌ वय्‌कःया मू भूमिकाय्‌ न्हापांगु संकिपा ‘निफ्वः स्वां’ पिदंगु खः । अनंलि ‘जिपिं बदमाश मखु’, ‘इहिपाः’ संकिपाय्‌ वय्‌कलं अभिनय यानादीगु खः । संकिपाया नायः जुयाः स्वकुपिनिगु नुगलय्‌ बांलाःगु छाप त्वःतादीम्ह स्वतन्त्रं थीथी म्यूजिक भिडियोय्‌ नं मोडल जुयाः म्हितादीगु दु । वय्‌कलं खुपु नेवाः म्ये व झिपुं मल्याक खस भाय्‌या म्यूजिक भिडियो म्हितादीगु दु । ‘ग्वाज्यःचा’ संकिपा निर्माण व निर्देशन, ‘अय्‌ जि यःम्ह’, ‘हसना’, ‘पियाच्वना’ संकिपाया निर्देशन नं यानादीम्ह वय्‌कः छम्ह ग्राफिक्स् डिजाइनर अले संसार अनलाईन टेलिभिजन, संसार अनलाईन न्यूज डटकमया संचालक संचारकःमि नं खः । एम्स् इन्टरटेन्टमेन्टया पलिस्था नायः, संसार क्रियशन्स् नेपालया प्रमुख वय्‌कलं थीथी संघसंस्थाय्‌ च्वनाः संकिपा, संगीत, म्यूजिक भिडियो ख्यःया विकासया निंतिं ज्या याना च्वनादीगु दु ।
वय्‌कःयात ज्यापु महागुथिपाखें संकिपाकःमि सम्मान द्यछाःगु दुसा लहना मिडियापाखें संकिपा ख्यलय्‌ नापं संचार ख्यलय्‌ योगदान यानादीगुलिं हंगु दु ।

Leave a Reply Cancel reply