बाः रत्नलाल खेँ व मां चन्द्रकुमारी ख्येँया कोखं उपन्यासकार भाजु रामकुमार खेँया जन्म ने. सं. १०५८ (वि.सं. १९९४ माघ १) य् यलया इखाछेँ त्वालय् जूगु खः । थ्वय्कःया मेगु म्हसिका आर.के. खेँ खः। एस.एल.सी. तक ब्वनेज्या यानादीगु खःसां सरकारी सेवाय् शुभराज्याभिषेक पदकं सम्मानित जुइधुंकूम्ह भाजु खेँया थःगु मांभाय् नेपालभाषाया साहित्य सेवाय् नं उतिकं नुगः क्वसाः । आपाः यानाः समाजयागु चित्रण यानाः सामाजिक उपन्यास च्वयादीम्ह भाजु रामकुमारया न्हापांगु मौलिक उपन्यास ने.सं. १०८१ य् पिदंगु दिपक खः । मतिनाया थीथी पक्षयात न्ह्यब्वयाः थःगु जीवनय् न्ह्याथेंज्याःगु पंगः वःसां थःत ययेकाच्वंम्ह छम्ह क्रान्तिकारी यज्जुं लिधंसा ब्यूवइगु छगू मार्मिक बाखं दुथ्याकाः च्वयादीगु वय्कःया मेगु मौलिक उपन्यास ने. सं. १११९ य् पिदंगु पथिक खः । थुकथं वय्कलं थःगु मांभाय्या सेवा यानाः नेपालभाषा साहित्यय् उपन्यासया धुकू जायेकेगुली थःगु योगदान बियादीगु दु ।