मां ज्वालादेवी व अबु वेदानन्द बज्राचार्यया म्ह्याय् मय्जु डा. चुन्दा बज्राचार्यया जन्म ने.सं. १०७४ सालया सिल्लाथ्व ८ कुन्हु मरुत्वाःया ख्यःक्यबय् जूगु खः । अर्थशास्त्र व नेपालभाषा विषयय् एम.ए. पास यानादीम्ह थ्वय्कः त्रि.वि.पाखें नेपालभाषाया नाटकया बारे विद्यावारिधि यानादीम्ह न्हापांम्ह मय्जु अनुसन्धानकःमि खः। संस्कृतिविद् व अनुसन्धाता कथं नांजाःम्ह थ्वय्कःया ल्हाः समालोचना लिसें ऐतिहासिक व सांस्कृतिक विषयया प्रबन्ध च्वयेगुली नं उलि हे न्ह्याः । थ्वय्कलं गोपालीतय् विषयय् नं अनुसन्धान यानादीगु दु । नेपालभाषाया नापनापं नेपाली भासं नं च्वयेगु यानादीम्ह थ्वय्कःया न्हापां पिदंगु प्रबन्ध च्वसु नसा, त्वँसा, रीतिथितिइ झीगु जातीय विभाजन (ग्वय्स्वां दँपौ, ने.सं.११०२) खः ।
त्रि.वि. नेपालभाषा केन्द्रीय विभागया प्राध्यापक जुयादीम्ह डा. चुन्दा बज्राचार्यं नेपालभाषाय् थ्वय्कःया तःपु हे फुटकर रचनाया लिसें क्वय् न्ह्यथनागु मौलिक व सम्पादित कृति पिदंगु दु— मल्लकालया छुं संस्कृति (११०५), मध्यकालया छुं घटनावली : छगू अध्ययन (११०७), नेपालभाषाया आधुनिक नाटकय् मिसा समस्या (१११८), रणजित मल्लया इहिपाः यात भम्चा काःवंगुया धरःपौ (११०९), जितामित्र मल्लकालीन धरःपौ (वि.सं.२०५३), भिक्षु सुदर्शनया नाटक विधा (१११८), ७) नेवाः तजिलजिइ नखःचखः (११२०), नेवाः तजिलजिया च्वखँ मुना (११२१), थक्वाः देशया आदिनारायण (११२५), नेपालभाषा नाटक साहित्यया इतिहास ने.सं ११०८ दँ तक्कया उपन्यासया छगू परिचय (११२९), समालोचनाया च्वसु मुना (११२९), नेपालमण्डल व नेवाः (११३२) । थ्व बाहेक मोतिलक्ष्मी उपासिकाया जीवनी छपुलु सफू नं थ्वय्कलं च्वयादीगु दु ।
थ्वय्कः नेपालभाषा मिसा खलः व आदिवासी जनजाति महिला महासंघया संस्थापक लिसें उगु संघय् छगू कार्यकाल अध्यक्ष नं जुयादीगु दु । अथेहे राष्ट्रिय संवाद समाजया संस्थापक उपाध्यक्ष नं खः । त्रिभुवन स्मारक समितिया सदस्य सचिव जुयादीधुंकूम्ह मिसा न्ह्यलुवाः खः । थ्वय्कः मेमेगु नं तःगूमछिं संघसंस्थानाप आबद्ध जुयादीगु दु । ने.सं. ११२१ स पश्चिम लागा नेवाः पुचःपाखें विशेषकथं हंम्ह थ्वय्कःयात ख्वपया नेपाल साहित्य मन्दिरपाखें जरीमैयाँ सिरपाः बियाः सम्मान याःगु दु ।
Leave a Reply