दँय्दसं न्यायेकावयाच्वंगु नखःचखः (सालाना मनाउँदै आइरहेको चाडपर्व) सफूया च्वमि भाजु विनोदमान राजण्डारी खः । मय्जु गीता राजभण्डारीं ने.सं.१०३२ य् पिकयादीगु थ्व सफुलिइ नेवाःतय्सं हनीगु दच्छियंकंया नखःचखःया परिचय बियातःगु दु । थीथी नखःचखःया परिचय बीबलय् व नखः गबलय् हनी, व नखः हनेगुया अर्थ, व नखःबलय् छु छु पुजा जुइ, छु छु नसात्वँसा नयेगु याइ आदि खँ न्ह्यब्वयातःगु दु । छगू पानाय् नेवाःभाय् मेगु पानाय् नेपाली भाय् छ्यलाः नेवाःभाय् सःपिंसं जक मखु नेपाली भाषीपिंसं नं थुइमा धकाः च्वयातःगु सफू खः । नेवाःतय्गु मंकाः संस्था नेवाः देय् दबूया कोषाध्यक्ष जुयाच्वनादीम्ह विनोद राजभण्डारीं नेवाः भाय् मसःपिं स्वनिगः पिनेच्वंपिं नेवाःतय्सं नं नेवाः जातीं हनीगु दच्छियंकंया थीथी नखःचखः म्हसीमा नापं थ्व सफू थःपिनिगु जातीय नखःचखः हनेत छगू निर्देशिका थें जुइमा धैगु तातुनाः अति संक्षिप्तं सरल भाषं च्वयातःगु सफू खः।