पं. हेमराज शाक्यं च्वयादीगु नेपाल–संस्वृतिया मूलुखा निबन्ध मुना मय्जु चन्द्रलक्ष्मी देवी शाक्यं ने.सं. १०८९ सिल्लाथ्व श्रीपञ्चमीकुन्हु पिथंगु खः । थ्व झिंखुपु निबन्धया मुना खः । निबन्धकार शाक्यं धार्मिक, सांस्वृतिक चिउताः तयाः थःगु अनुसन्धानया बः कयाः थ्व निबन्ध च्वःगु खनेदु । नेपाल–संस्वृतिया मूलुखाय् सांस्वृतिक वस्तुयात व्यवहारोपयोगी जक मखु उकी दुने दुसुलाच्वंगु कलात्मक भावयात उजागर यानातःगु दु । थ्व निबन्ध मुना नेपाल संस्वृतिया अध्ययन याइपिंत लँ क्यना बीगु सफू खः । थ्व निबन्ध मुनाय् अष्टमङ्गल, शिलापत्र, तोरण, गजू, ञँ, रञ्जनालिपि, सप्ताक्षरी कूताक्षर, अवलोकितेश्वर, बुंगद्यःया खः जला, सुकुन्दा, घण्ट, वज्र, चन्द्रहास खड्ग, ॐ मणिपद्मे हूँ, चैत्य व पूर्णकलश विषयय् दुथ्याकातःगु दु । थ्व सफूया लिउने पतिइ हरेक विषयया किपा नं न्ह्यब्वयातःगु दु ।
Leave a Reply