पूर्वज लुमंकाः

पूर्वज लुमंकाः प्रा.डा. कमलप्रकाश मल्लं च्वयादीगु संस्मरण नापं मध्यकालिन नेपाःया इतिहास सम्बन्धी छगू खोजमूलक सफू खः । थःनेया थकुजुजु खलः थायमदु येँ पाखें ने.सं ११०० य् पिदंगु थ्व सफू डा.मल्लं थः मदुम्ह अबुजु योगेन्द्रप्रकाश मल्लया लुमन्तिइ श्रद्धाञ्जली स्वरुप च्वयादीगु सफू खः । थ्व सफू तसकं म्हो इलय् अर्थात् अबु मदयाः दुःखं च्वनाच्वंगु झिंनिन्हुया दुने च्वये सिधयेकूगु सफू खः । थ्व सफुलिइ पूर्खाया बारे न्यँखँ व इतिहासनापया स्वापू, नेपाःगाः इतिहासय् थकूजुपिं, जिमिगु खलः फम्पिनाप जिमिगु स्वापू व थँहिटी थकूचूकय् थकुजुपिनिगु बस्तिया प्रभाव, अबु योगेन्द्रप्रकाश मल्लयात छपासः श्रद्धाञ्जली, तँसा, थःनेया थकुजुपिनि वंशवृक्ष यानाः न्हय्‌गू द्या दु । थुकथं थ्व सफू मल्लजुं थः अबुजुया लुमन्तिइ श्रद्धाञ्जली स्वरुप च्वयादीगु सफू जूसां च्वमिं थुकी केवल प्रथम विश्वयुद्धय् नेपाः पाखें सामेल जूम्ह मदुम्ह अबुजु योगेन्द्रप्रकाश मल्लया जीवनी इतिवृतान्त जक च्वयेगु यानामदीसे नेपाःया मध्यकालिन इतिहास नाप स्वापूदुपिं तत्कालीन नेपाःया प्रशासन व आर्थिक कारोबारया ज्याय् अहम् भूमिका दुपिं थकूजुजुपिनिगु बारे थीथी अभिलेख व जनस्तुतिया पाखें आपालं खँ लुइकाः इतिहासय् उल्लेख मजूनिगु आपालं तथ्य प्रकाशनय् हयादीगु दु । उकिं थ्व पूर्वज लुमंकाः सफू च्वमिया अबु प्रति श्रद्धाञ्जलीया छपासः स्वां जक मजुसे नेपाःया मध्यकालिन इतिहासया छगू पाना नं खः ।