मां लुमंकाः नेपालभाषा व नेपाली भाषाया नांजाःम्ह च्वमि चित्तरञ्जन नेपाली अर्थात् नारायणप्रसाद राजभण्डारीजुं च्वयादीगु शोककाव्य खः । थ्व सफू तत्कालिन नेपालभाषा प्रकाशनी समितिपाखें स्वीकृति कयाः ने.सं १०७० य् भाजु अनिस नेपालीं जोरगणेश प्रेसपाखें पिकयादीगु खः । थ्व काव्य भाजु चित्तरञ्जन नेपालीं थःत जन्म ब्यूम्ह मामं थःत सदां सदांया नितिं त्वःता वनाः थःत लाःगु विरह बेदना व मांया गुण लुंमंकाः च्वयातःगु झिंगुपु कविताया संग्रह खः । थ्व संग्रह ब्वनेबलय् केवल कविया जक मखु ब्वँमिपिनिगु नुगः नं ख्वबिं प्याकाबी व नुगः थुंदीकाबी, थः थः मांपिनिगु क्वाःगु मतिना स्मरण जुइके बी । थ्व हे कविया लेखन शिल्प नं खःसा थ्व हे काव्यया विशेषता खः । मां लुमंकाः कविता संग्रह भाजु चित्तरञ्जन नेपालीं थः मदुम्ह मांयात लुमंकाः च्वयातःगु कविता संग्रह जक मजुसे पश्चिमी शैलीया भ्भिनथ कथं च्वयातःगु थ्व शोककाव्य नेपालभाषाया काव्य ख्यलय् पश्चिमी शैलीया शोककाव्यया अर्थात् भ्भिनथया दुतिना नं खः ।