वैकुण्ठप्रसाद लाकौल स्मृतिग्रन्थ नेपालभाषा एकेडेमिया न्हापांम्ह चान्सलर नेपालभाषा शिरोमणि वैकुण्ठप्रसाद लाकौलया लुमन्तिइ च्वयातःगु स्मृतिग्रन्थ खः थ्व स्मृतिग्रन्थ वैकुण्ठप्रसाद लाकौल स्मृतिग्रन्थ प्रकाशन समिति, नेपालभाषा केन्द्रीय विभागपाखें प्रा. डा. सुन्दरकृष्ण जोशीया संयोजकत्वय् व ईश्वरीमैंया श्रेष्ठया सम्पादनय् ने.सं ११२८ य् पिदंगु ग्रन्थ खः । स्वीनिगू अध्यायय् ब्वथलातःगु थ्व ग्रन्थय् नेपाली, नेपालभाषा व अंग्रेजी यानाः स्वता भाषाया लेखयात दुथ्याकातःगु दुसा दकलय् अप्वः लेख नेपालभाषायागु झिंच्यापु च्वसु दुथ्याःगु दु । अथेहे विषयगत रुपं गुलिं वय्क:या जीवनी नापं वय्क:या जीवनया थीथी पक्षयागु बारे चर्चा यानातःगु लेख दुसा गुलिं वय्क:नापया समय हनागुया लुमन्तियात कयाः छेँजः व थःथितिपिंसं च्वयातःगु रचना दु । अथे हे गुलिं वय्क:या थीथी ज्या व कृतिया समिक्षात्मक विश्लेषणया लेख दुथ्यानाच्वंगु दु । अथेहे वय्क:या कृति धलः, वय्क: संलग्न जूगु थीथी संस्थाया नां धलः, वय्क:यात प्राप्त जूगु थीथी मानपदवीया किपा व वय्कलं स्वनादीगु थीथी सिरपाः, वय्कलं दयेकादीगु लाकौल वंशावली, वय्क: मदयेधुंकाः थीथी संस्था व पत्रपत्रिकां पिकाःगु समवेदना पत्र व बुखँ आदिया फोटो दुथ्याःगु दु । थुकथं १०१ दँ म्वानाः, थःगु ताःआयुति हे सार्थक जीवन हना झाःम्ह नेपालभाषा, नेपाली व अंग्रेजी भाषां स्वंगू दर्जनं मयाक सफू च्वयावंम्ह नेपालभाषा शिरोमणि वैकुण्ठप्रसाद लाकौलया थ्व स्मृतिग्रन्थ वयकःया विषयय् अध्ययन अनुसन्धान याइपिंत आपालं ग्वाहालि जुइगु ग्रन्थ खः ।