कृष्णभक्त बोडेया तःजिगु संकलन थ्व हाइकुया जातः सफू ने.सं. ११३५ म्हपूजा कुन्हु कुतः पिकाकःपाखें पिदंगु खः । थुगु सफुलिइ ने.सं ११११ निसें ११३५ दुनेया हाइजिनपिनिगु म्हतिं निपु निपु यानाः ९२ म्हेसिया १८४ पु हाइकु दुथ्याकातःगु दु । लिसें जापानी हाइकु प्यपु व खस भाय्या प्यपु हाइकुनं दुथ्याकातःगु दु । नापं थ्व सफुलिइ जापानयाम्ह न्हापांम्ह हाइजिन मोरीताके (सन् १४५२–१५४०) निसें थौंतकया (ने.सं.११३५ तकया) हाइकुया इतिहास दुथ्याकातःगु दु । नेपालभाषाय् हाइकु दुहां वःगु, नेपालभाषाया हाइकुया अवस्था, हाइकु छु खः, हाइकुया किगो, हाइकुया प्रकृति आदि विषयया सैद्धान्तिक खँ नं थ्व सफुलिइ न्ह्यथनातःगु दु ।