ख्वपया जगाति योगा त्वालय् ने.सं. १०५७ य् जन्म जूम्ह पशुपतिमान पःमां छम्ह नेपालभाषाया अनुरागी खः । थी थी स्कूलय् शिक्षक, प्रधानाध्यापक जुयाः तःदँ शिक्षा ख्यलय् थःगु जीवन पानादीम्ह थ्वय्कलं नेपालभाषाय् श्रीश्रीश्री स्वस्थानी (ने.सं ११३४) नुगः घाः (ने.सं ११३६), नेवाः वाँउभक्तु (ने.सं ११४१) मलखं कःगु छेँ (ने.सं ११४१)यानाः प्यंगू बाखंसफू च्वयादीगु दुसा मचासाहित्यया ख्यलय् भिंम्ह मनू थेंज्याःगु मचा नाटक व मचा बाखंत नं पिकयादीगु दु । थ्वय्कःया तःपु बाखं नेवाःतय्सं नेवाः भाय् त्वःताहःगु आदि विषययात कयाः च्वयातःगु दुसा थः मचातय्त थःगु मांभाय् ल्हाकेमाः धैगु सन्देश बियादीगु दु ।
