साय्मि जि मथुरा नेपालभाषाया नांजाःम्ह आख्यानकार मथुराकृष्ण साय्मिं च्वयादीगु वय्कःयागु आत्मकथाया सफू खः । ने.सं ११४० य् कुतः पिकाकःपाखें पिदंगु थ्व सफुलिइ न्यय्स्वंगू अध्याय दु । थःत जन्म ब्यूपिं मां न्हुछेकुमारी मानन्धर व अबु इन्द्रनारायण मानन्धरपिनिगु गुण स्मरण यानाः वय्कःपिंत देछायाः च्वयातःगु थ्व सफुलिइ जिगु जन्मस्थल– थःगु छेँ निसें मनूया म्ह आत्मा व जीवन अर्थात् थःगु जन्म निसें थःगु जीवन दर्शन सम्बन्धी खँ न्ह्यब्वयातःगु दु । थ्व सफुलिइ वय्कलं थःगु जीवननाप सम्बन्धित थीथी किपाया नापं छसिकथं थःगु जीवनया घातप्रतिघात, थथ्याः क्वथ्याःयात जक सरर्र ब्वयेगु यानामदिसे थःगु जीवनय् प्रभाव लाकूगु घटना, थःगु च्वसा न्ह्याकेगुली प्रेरणा ब्यूपिं व ग्वाहालि याःपि व्यक्तिपिंप्रति कृतज्ञता प्वंकेगु लिसें थःगु जीवनय् तःतःधंगु दुर्घटना अर्थात् निम्ह निम्ह तिरी मय्जुपिंसं मत्यवं थःत त्वःतावंसां जीवन नाप हारे मचासे, थःगु कर्म व दायित्वपाखें विचलित मजुसे थःगु मातृभाषा व थ्वया साहित्य थकायेगु ज्याय् समर्पित जुयाः “Life in Death” सिद्धान्तयात पालना यानागु खँ न्ह्यथनातःगु मथुराकृष्ण साय्मिया थ्व आत्मकथा सफू मेमेपिनिगु नितिं नं उलि हे प्रेरणादायी जूगु दु ।