समालोचक माणिकलाल व समालोचना साहित्यया च्वमि नांजाःम्ह बाखंच्वमि व उपन्यासकार श्रीलक्ष्मी श्रेष्ठ खः । ने.सं. ११२६ य् भावना पिथना, येँ नेपाःपाखें पिदंगु थ्व सफू मय्जु श्रीलक्ष्मीं थः नेपालभाषा एम.ए ब्वनादीबलय् प्रा.माणिकलाल श्रेष्ठया विषयय् गुगु अनुसन्धानपत्र च्वयादीगु खः उकी हे मेमेगु खँ नं तनाः सफूया रुपय् पिकयादीगु खः । थ्व सफुलिइ बहुआयामिक व्यक्तित्व दुम्ह समालोचक भाजु माणिकलाल श्रेष्ठया जीवनी, वय्कःया प्रकाशित कृतिया धलः, थीथी व्यक्तित्वपिनिगु मिखाय् माणिकलाल श्रेष्ठ आदि बाहेक नं च्वमि मय्जुं विश्व साहित्यया इतिहास, पश्चिमी व पूर्वीय साहित्यय् खनेदुगु समालोचनाया धाः व विकासक्रम अले नेपालभाषा साहित्य ख्यलय् समालोचनाया प्रवृत्ति व शैलीयात नं संक्षिप्तरुपं थ्व सफुलिइ न्ह्यब्वयादीगु दु । थुकथं थ्व नेपालभाषा शिक्षण व नेपालभाषा साहित्यया ख्यलय् प्रा.माणिकलाल श्रेष्ठया योगदानया नापं समालोचनाया इतिहासया नं जः ह्वलीगु सफू जूगु दु ।