सिमात फफः स्वः भाजु रामशेखरया च्यापु बाखं मुनातःगु सफू खः । ने.सं. १०९५ य् पिदंगु थुगु सफूया पिकाकः पल्पसा साहित्य ख्यः खः । अगति, छगू देसय्, स्वर्ग नरक, बाखं, न्हुछे अरा, पासापिं, भैलः खः व सिमात फफ स्व थुकी दुथ्यानाच्वंगु बाखं खः । थ्व सफुलिइ दुथ्यानाच्वंगु छपु बाखं सिमात फफः स्वः बाखनय् जुजुं थः झिंनिदँया मेलाय् वयेगु नामय् अन कुण्डय् वःपिं जनतायात म्वःल्हुके हे मबिसे पुलिसं पनातःगु व दमन याःगु खँ न्ह्यथना तःगु दु । न्हापा जुजु वःगु स्वयेत लय्ताया च्वंपिं सिमा, स्वांमा, खुसि, लः, फय् जुजुया थ्व निरंकुश ज्यां लय्मताल । अले जुजुया थज्याःगु निरंकुश ज्याप्रति विद्रोह स्वरुप सिमात फफः स्वत, स्वांमातय्सं मिखा तिसित धकाः प्रतिकात्मक रुपं च्वमिं सामन्ततय्गु निरंकुशता प्रति विद्रोह प्वंकेगु यानातःगु दु । थ्व हे बाखंया नामं सफूया नां छुनातःगु दु ।