आखे विश्व साहित्यय् पिदंगु नांजाःपिं बाखंच् वमिपिनिगु उत्कृष्ट बाखं ल्ययाः उकियात नेपालभाषां अनुवाद यानातःगु बाखं संग्रह खः । थथे विश्वय् नांदंगु बाखं ल्ययाः उकियात नेपालभाषां भाय् हिउम्ह अनुवादक तीर्थराज तुलाधर खः । ३६३ पौ दुगु थुगु अनुवादया सफू ने.सं. १०८५ स नेपालभाषा परिषद्ं पिथंगु खः । मुक्कं २९ पु बाखं थुकिइ दुथ्याना च्वंगु दु । थुपिं २९ पु बाखंया चीहाकलं म्हसीका तयाः सुलचं लं नामं च्वयातःगु चित्तधर हृदयया भूमिका नं थ्व सफुलिइ दुथ्याकातःगु दु । थथे थ्व अनुवाद बाखं संग्रह दुने — न्यापु बाखं फ्रान्सी, न्यापु बाखं रूसी, प्यपु अंग्रेजी, निपु अमेरिकी, छपु जर्मनी, छपु इटली, छपु ग्रीस, छपु हंगेरी, छपु बुल्गेरी, छपु चेकोस्लाभाकी, छपु युगोस्लाभी, छपु स्वीडेनी, छपु स्पेनी, छपु जापानी, निपु चीनी, छपु भारती बाखं दुथ्यानाच्वंगु दु । थुकथं थ्व सफुलिइ फुक्कं हे विश्व साहित्यया हस्ती बाखंमिपिनिगु उत्कृष्ट बाखंत दुथ्याका तःगु दु । बाखं शुरु यायेन्ह्यः सफुलिइ बाखंमिपिनिगु चीहाकलं म्हसीका नं बियातःगु दु ।
Leave a Reply