भाजु अच्युतानन्द राजोपाध्यायया जन्म बौ चेतानन्द राजोपाध्याय तथा मां चैत्यन्यवानेश्वरी राजोपाध्यायपाखें ने.सं १०४७ कौलाथ्व चतुर्दशीकुन्हु येँया न्ह्योखा त्वालय् जूगु खः । वय्कःया प्रारम्भिक शिक्षा येँया दरवार स्कूल संस्कृत विद्यालयय् जूगु खःसा अनंलि बनारस विश्वविद्यालयपाखें वय्कलं वेदान्त शिक्षाय् आर्चाय पास यानादिल । नेपाः लिहां झाये धुंकाः मिसामचातय्त नं आखः ब्वंकेमाः धैगु बिचाः याःम्ह वय्कः कन्या मन्दिर माध्यमिक विद्यालय स्थापना यायेगु ज्याय् अग्रसर जुयादिल । कन्या मन्दिर विद्यालय् स्थापना जूसांनिसें अवकाश प्राप्त मजूतले अन वय्कलं संस्कृत, नेपाली व चित्रकला विषय ब्वंकेगु यानादिल ।
भाजु अच्युतानन्द नेवाः समुदायया जक पुरोहित मखु हनुमाध्वाखाया तलेजु भवानी देगःया मू पुरोहित खःसा ग्वल देय्या पशुपतीइ च्वंगु दिच्छिनामूर्तिया नं मू पुजारी खः । भाजु अच्युतानन्दया नेपालभाषाया निंतिं दकलय् मूवंगु ज्या धैगु माघ महिनाबलय् कनीगु स्वस्थानी धर्मव्रत कथायात नेपालभाषा देवनागरी लिपिं हिलाः सफूया रुपय् पिकयादीगु खः । थ्व स्वस्थानी सफू फुक्कस्यां ब्वनेमाः धैगु तातुनाः स्वदँ बिकाः अति मिहेनत यानाः ने.सं ११०० य् प्रकाशन यानादीगु खः । थथे देवनागरी लिपिं पिदंबलय् थ्व सफू नेवाः समुदायलय् तसकं लोकप्रिय जुल । थ्व सफुलिं स्वस्थानी बाखं ब्वने अःपुका ब्यूगु जक मखु नेपालभाषाया नं प्रचार प्रसार जुइकेबिल । थौं नेवाःतय्सं थ्व हे सफू ब्वनाः माघ महिनाबलय् छेँ-छेँय् स्वस्थानी बाखं कनेगु यानाच्वंगु दु । अथे हे वय्कलं संस्कृतया हितोपदेशया बाखं नेपालभाषां हीकाः तत्कालिन सितु पत्रिकाय् पिथनादीगु दुसा वयकःया तःपु हे कविता सितु लगायत झी आदि पत्रिकाय् पिदंगु दु । वय्कःया योगदानयात कदर यानाः कन्या मन्दिर माध्यमिक विद्यालयलगायत मेमेगु संस्थां नं सम्मान देछाःगु दु । अच्युतानन्दं ने.सं ११११ य् थःगु नश्वर देह त्याग यानादिल ।