गजलया सिद्धान्त व नेपालभाषाया गजल नांगु सफूया च्वमि नेपालभाषाया नांदंम्ह कवि राजेन्द्रकुमार पुता खः । सन्ध्याटाइम्स पिथना प्रा.लि.पाखें ने.सं १०४०य् पिदंगु थ्व सफुलिइ गजल सम्बन्धी सैद्धान्तिक ज्ञान अर्थात् गजलया परिभाषा, गजलया इतिहास, गजल च्वयेगु तरिका आदिया बारे चर्चाया नापं नेपालभाषा गजलया काल विभाजन नापनापं नेपालभाषा गजल च्वमिपिगिु नां धलः व नेपाल संवत् ११३० जःखःतक पिदंगु नेपालभाषा गजल सफूया धलः नं दुथ्याः । नेपालभाषाय् दकलय् न्हापां पिदंगु गजल सफूया च्वमि शैलेन्द्र श्रेष्ठया गजलया कलकल (ने.सं. ११०७) निसें नरेन्द्रप्रसाद जोशीया स्वां छंगु क्यबया गजल सफूया दुनेच्वंगु गजलया विश्लेषण दु । अथेहे गजलया शास्त्रिय मान्यता व संरचनागत सिद्धान्तयात बःकयाः नेपालभाषाया प्रत्येक गजल सफू दुनेच्वंगु गजलया बारे कुलेगु ज्या थ्व सफुलिइ जूगु दु ।