मय्जु ज्वला स्थापितया जन्म अबु नारायण स्थापित व मां दानमाया स्थापितया कोखं येँया भिंद्यः त्वालय् ने.सं १०७५ स जूगु खः । नेपालभाषा विषयय् स्नातकोत्तर यानाः नेपालभाषा विषयया प्राध्यापनया ज्याय् थःत फ्यानाझाःम्ह मय्जु ज्वालां थःगु च्वसा नं नेपालभाषाया अध्ययतापिंत ज्याख्यलय् जुइगु विषयय् न्ह्याकेगु यानादीगु दु । वय्कःया अप्वः थें कृति नेपाल लिपि तथा प्राचीन हस्तलिखित ग्रन्थ सम्वन्धी हे जूगु दु । वयकःया प्रकाशित सफू थुकथं दु —हितोपदेश (सम्पादन, वि.सं २०५६), वेताल पंचविशति (सम्पादन, वि.सं २०५७), बसुन्धरा प्याख्यान (वि.सं. २०६० लिप्यान्तर), भुजिंमोल लिपि छगू अध्ययन (वि.सं. २०६१), नेपाल लिपिविज्ञान (सामान्य परिचय – वि.सं २०५७) आदि । थुपिं सफू बाहेक वय्कलं कुलां, न्हू हिसु, पौभाः आदि थीथी पत्रपत्रिकाय् तःपु हे लिपिसम्वन्धी च्वसु पिदंगु दु ।
सफू च्वयेगु बाहेक मय्जु ज्वालां नेपालभाषा विषय समितिया अध्यक्ष, पाटन संयुक्त क्याम्पसया उपप्रमुख, नेपालभाषा मिसा खलःया दुजः आदि जुयाः नेपालभाषाया ख्यलय् ज्या यानादीगु दुसा शिक्षा पुरस्कार, दीर्घ सेवा पदक, शिक्षा सम्मान आदि नं प्राप्त यानादीगु दु ।
Leave a Reply