नेवाः कासा निगूगु ब्व सफू मय्जु निजिरोस श्रेष्ठं च्वयादीगु नेवाः कासा सम्बन्धी सफू खः । विजय प्रकाशन पाखें ने.सं ११३० य् पिदंगु थ्व सफुलिइ नेवाःतय्सं थःगु हे कथंया लवःकवः छ्यलाः थःगु हे पहलं म्हितीगु न्यय्निगू कासाया तस्वीरसहित विवरण बियातःगु दु । थथे न्ह्यब्वयातःगु कासा मध्ये गुलि मिसा मिजं निखलकं जानाः म्हितीगु कासा गथे– ताःकासा, ताहाःकासा, हुस्लुं कासा दुसा गुलिं मिजं मचा मिजंमचा जक जानाः म्हितीगु –च्याम्पति कासा, भकुंग्वारा कासा, कुस्ति कासा व मिसामचात जक जानाः म्हितीगु कासा गथे —ध्वाँइ कासा, लैंचाकासा, कुलि कासा आदि दु । अथे हे दुकासा “Indoor Game” पिकासा कासा “Outdoor Game”, मौसम अनुसार म्हितीगु व थःथःगु स्थानीय संस्कृति कथं म्हितीगु कासायात नं दुथ्याकेगु यानातःगु दु । स्वभाविक रुपं सरलभाषं च्वयातःगु थ्व सफुलिइ कासाया विवरण न्ह्यब्वयेगु झ्वलय् कासाय् प्रयोग जुइगु तर थौं उलि प्रचलनय् मदयेधुंकूगु नेवाःखँग्वःनं थ्व सफुलिइ दुथ्याःगुलिं भाषिक अध्ययनया दृष्टिं नं थ्व सफूया महत्व अझ च्वन्ह्याः ।