नेवाः उखान बखान व खँत्वाः खँभाय् सफू वांगमय शताव्दी पुरुष सत्यमोहन जोशीं सम्पादन व मुनादीगु ने.सं ११३९ य् लोकसाहित्य परिषद्पाखें स्व. युवा कवि दयारामभक्त माथेमाया पुण्यस्मृतिइ दया फाउण्डेशनया आर्थिक गवहालिं प्रकाशित जूगु नेपालभाषाया छुनाखँ, खँत्वाः खँग्वः “Proverb & Idioms” धुकू खः । २८६८ पु छुनाखँ, खँत्वाः खँग्वः दुथ्याना च्वंगु थ्व सफू भाजु सत्यमोहन जोशीं थःगु न्हापा पिदने धुंकूगु छुनाखँ व खँत्वाः खँभाय् सफुलिइ च्वंगु छुनाखँ, खँत्वाः खँभाय् नापं भाजु शंकरमान राजवंशीं मुनादीगु खँत्वाः खँभाय्या लिसें मेमेपिं पासापिंसं मुनादीगु छुनाखँ, खँत्वाः खँभाय् नं दुथ्याकाः पिथंगु नेपालभाषाया वृहत् खँत्वाः खँभाय्या धुकू खः । नेवाःतय्गु अमूर्त सम्पदाया छगू ज्वलं खः । थ्व सफुलिइ भूमिकाया रुपय् दुथ्यानाच्वंगु मय्जु प्रेमशान्ति तुलाधरया नेपालभाषाया छुनाखँ व खँत्वाः खँभाय्या इतिहास व विशेषता सम्बन्धी लेखं थ्व सफूया महत्ता अझ च्वन्ह्याकाब्यूगु दु ।थथे मौखिक रुपय् जक न्ह्यानाच्वंगु छुनाखँ, खँत्वाः खँभाय्यात लिखित रुपय् तयेगु ज्या गुगु सत्यमोहन जोशीजुं यानादिल थ्व नेपालभाषाया अर्मूत सम्पदाया संरक्षणया निंतिं तःजिगु पलाः खः ।