पलाः नेपालभाषाया छम्ह पुलांम्ह बाखंच्वमि मय्जु प्रमिला साय्मिया च्वसां पिदंगु बाखं पुचः खः । च्वसापासाया लुखां ने.सं ११४१ य् पिदंगु थ्व सफू च्वमि मय्जुं थः स्व. मां अबुपिंत श्रदाञ्जली कथं देछायातःगु सफू खः । आपालं न्ह्यः हे जि जुजु थेंज्याःगु मचा मनोवैज्ञानिक बाखं च्वयाः नेपालभाषाया बाखं ख्यलय् थःगु म्हसीका त्वःतादीम्ह मय्जु प्रमिलां थ्व पलाः बाखं संग्रह आपालं लिपा जक पिथनादीगु खः । थ्व संग्रहय् दुथ्याःगु झिंप्यपु बाखं मध्ये न्हय्पुबाखं न्हापा हे थीथी पत्रिकाय् पिदने धुंकूगु खःसा मेगु कुलांगार कोरोना, मतया जलय् मां आदि न्हूगु बाखं लिपा वय्क: अमेरिका वनेधुंकाः जक च्वयादीगु खः ।
थ्व हे कथं पुलांगु बाखनय् थौं स्वयाः पीदँ पीनिदँ न्ह्यःया समाज व सांस्कृतिक परिवेशया चित्रण दुसा न्हूगु बाखनय् थौंया समस्या अर्थात् कोराना माहामारीया कारणं पिदंगु समस्या, थः स्वजनपिं नाप बायाः विदेशय् च्वनेमाःपिनिगु पीडाया वर्णन् दु । पलाः बाखं संग्रहय् दुथ्याःगु अप्वः थें बाखंया पात्रत मचात जूगु दु । मचातय्गु बालमनोभाव व स्वभावयात सहज व स्वाभाविक रुपं ब्वयातःगु दु ।
Leave a Reply