यलया ओकुबहाः (रुद्रवर्ण महाविहार)या लुखां जवय् च्वंगु बहीयात उबाहाःबही (जशश्री महाविहार) धाइ । आकारया ल्याखं चिकूसां थुगु बही कलात्मक खनेदु । बहिलिइ दुहां वनेवं दुने पुलांपहःगु द्यःछेँ दु । नितँ जाःगु थुगु बहीछेँया मूलुखा कलात्मक अले लिं भुनातःगु दु । लुखाया जःखः निम्ह सिंह फ्यतुनाच्वंगु व पुलांगु ध्वाँय् धंकातःगु दु । छखे गं छगः व मेखे माने तयातःगु दु । खवपाखे अमोघपास लोकेश्वरया मूर्ति नं दु । अथे हे मूलुखाया दुने लुँ सियातःम्ह अभिताभ पलिस्था यानातःगु दु । लुखाया फुसय् अक्षोभ्य बुद्ध दथुइ तयाः जवंखवं भिक्षु व पञ्चबुद्धया मूर्ति नं दुगु तोरण तयातःगु दु । द्यःछेँया न्हापांगु तल्ला
न्हय्पाः तिकिझ्याः तयाः कलात्मक ढंगं दयेकातःगु दु । थन हे बहीया आगं नं दु । वयां च्वय् पल्लिइ धातुया पौ दुगु देगःचा थज्याःगु पुल तयाः उकिया द्यःने चैत्य आकारया गजू छुनातःगु दु । द्यःछेँ दुने गन्धुरी देवता कथं व्याकरण मुद्राया दनाच्वंम्ह बुद्ध दु । अथे हे बहीया मूलुखाया जवय् छगू फल्चा दयेकातःगु दु । उकिइ वैरोचन बुद्ध दुगु तोरण तयाः अन छ्वासकामिनीया मूर्ति तयातःगु दु । अथे हे खवय् अंगलय् बज्रसत्व दुगु तोरण तयाः अन महांकालया मूर्ति नं तयातःगु दु । बहिलिइ लिच्छविकालीन चैत्य व परिभोग चैत्य यानाः निगः चैत्य तयातःगु दुसा उकिइ धर्मधातुमण्डल नं तयातःगु दु ।
थुगु बही उकुबहाःया नापनापं हे दयेकूगु धाइ । अभिलेखया आधारय् धायेगु खःसा थन जुजु जयस्थिति मल्लं ने.सं. ५११य् भिक्षु श्री जयसिंह वीरभद्र संस्कारित धकाः थुगु बहिलिइ नां बियाः थन गन्धुरी द्यःया न्ह्यःने लक्षाहुति यज्ञ याःगु खँ उल्लेख जूगु सुवर्णपत्र थनया मूलुखाया फुसय् तयातःगु दु । अथे हे मेमेगु थनया अभिलेखं थन ने.सं. ६७२य् गन्धुरी द्यःया सुवर्ण प्रतिमा दयेकूगु, ने.सं. ७८८य् बही जीर्णोद्धार याःगु आदि नं उल्लेख दु । थ्व ल्याखं थ्व बही म्होतिं नं खुसः दँ पुलांगु धकाः धायेगु लँ दत ।
थुगु बहीया संघ ओकुबहाःया दुजःत हे जानाः दयाच्वंगु खः । न्हापा थुगु बहीयात बहीविहार संघया परम्पराकथं झिबही संघय् दुथ्यानाच्वंगु खः । लिपा बही विहारसंघया परम्परा हे न्हनावंगु जुल । थुगु बहीया संघपाखें थन नं मेमेगु बहिलिइ थें बन्दे लुइगु व पञ्चस्थविर आजुपिनिगु व्यवस्था दुगु खः । लिपा थ्व बुलुहुं म्हो जुयावन । उकिया पलेसा थनयापिं शाक्य बन्दे लुइगु ज्या आः मूबहाः उकुबहालय् न्ह्यानाच्वंगु दु । अथे हे थन बहिलिइ बहीद्यः पाः फयेगु व पुजाकर्म इत्यादि जुयावयाच्वंगु दु । अथे हे थन आः धर्मगोष्ठीया ज्याझ्वः न्ह्यानाच्वंगु दु । थनया धर्मगोष्ठीया दुजःतय्सं गन्धुरी द्यःयाथाय् खेचायेकेगु, नित्यपुजा यायेगु आदि पाःकथं यानावयाच्वंगु दु । उगु नियमकथं न्हवंपुन्हिकुन्हु बहीद्यः बुसाधं यायेगु, मोहनिया दशमिकुन्हु दशमि पुजा यायेगु व गुंलाबलय् चलन कथं बहीद्यः ब्वयेगु आदि नं यानावयाच्वंगु दु ।