गाजलं दाःगु चा ने.सं १०८६य् ख्वपया सकलें दँ प्रकाशन पाखें पिदंगु तत्कालीन थीथी युुवा कविपिनिगु आधुनिक कविताया संकलन खः । नेपालभाषाया काव्यख्यलय् आधुनिक कविताया सुत्रपात जुइकेब्यूगु छगू कविता संग्रह थ्व गाजलं दाःजु चा नं खः ।
पूर्ण वैद्यया सरासु कविता संग्रहयात नेपालभाषाय् आधुनिक कविता सुत्रपाट याःगु काव्य धकाः थ्वयात श्रेष्ठ सिरपाः देछाःसां सरासु कविता संग्रह सफूया रुपय् थ्व गाजलं दाःगु चाः पिदने धुंकाः दच्छि लिपा अर्थात् १०८७ जक पिदन । झिंच्यापु कविताया संग्रह थ्व सफुलिइ —कवि आनन्द जोशी, रमेश मधु, श्यामसुन्दर सैंजु, सुन्दर मधिकःमि, मुकुण्डराज वैद्य, ईश्वरानन्द श्रेष्ठार्चाय, सत्यभामा यानाः न्हय्म्ह कविपिनिगु म्हतिं निपु निपु यानाः झिंप्यपु कविता अले इन्दमाली, योगेन्द्र प्रधान, बासुशशी, पूर्ण वैद्य यानाः प्यम्हेसिगु म्हतिं छपु छपु यानाः प्यपु कविता व पुष्प चित्रकारया थुपिं कवितासम्बन्धी छगू अलग्ग हे ग्यसुग्यंगु समिक्षात्मक च्वसु थ्व संग्रहय् दुथ्याना च्वंगु दु । छन्द मात्राया प्रतिबन्धं मुक्त, स्वतन्त्र गद्य शैलीया प्रयोग, प्रतिकात्मक विम्वात्मक अभिव्यक्ति आदि थुपिं कविताया शैलीगत विशेषता खया नं विचारगत रुपं थ्व संग्रह थीथी कविपिनिगु ल्वाकःबुकःगु सः खः ।
गिरिजाप्रसादया समालोचना सफूयागु शीर्षकयात स्वयेबलय् थ्व सफू महाकवि गिरिजाप्रसादयात समालोचना यानातःगु थें अनुभव जुइफु । तर थ्व अथेमखु, महाकवि गिरिजाप्रसादजुं इलय् ब्यलय् झीगु नेपालभाषा साहित्यया थीथी विधायात कयाः यानादीगु समालोचनाया मुना खः थ्व सफू । थ्व सफू कुतः पिकाकःया लुखां ने.सं.११४१ य् पिदंगु खः । थ्व सफुलिइ धुस्वां नं पासायात अन्याः याःगु दु, उवर्शि खय्नी व नेवाःनी, नेपालभाषाया बाखनय् भाषा, जीवन दृष्टि व सौन्दर्य, मिखां मछूपिं आलोचक थाय्माः गःपिं कवित, मुल्याहाःम्ह याकः काय् तनावंगु लागाय्, धुस्वांया निभाः उपन्यास दुने कविताया सवाः आदि नीपु च्वसु दुथ्यानाच्वंगु दु ।