जनआन्दोलन कविता चिनाखँ मुना सफू नेपालभाषा चिनाखँ ख्यःया छगू ऐतिहासिक सफू खः । प्रतिभा साहित्यिक परिवारं ने.सं. १११० स पिदंगु थ्व चिनाखँ सफुलिइ ०४५/०४६ सालया जनआन्दोलन विषयया जक स्वीनिम्ह कविपिनिगु स्वीनिपु हे चिनाखँ दुथ्याःगु दु । थ्व सफूया संकलन व सम्पादन यायेगु ज्या तत्कालीन प्रतिभा साहित्यिक परिवारया नायः राजभाइ जकःमिजुं यानादीगु खः । ने.सं. १११० तछलागाः १ (२०४७ जेष्ठ २६ गते) प्रतिभा साहित्यिक परिवारया ग्वसालय् भाषाविद व साहित्यकार ईश्वरानन्द श्रेष्ठाचार्यया सभापतित्वय् नेपाल राजकीय प्रज्ञा प्रतिष्ठानय् जूगु जनआन्दोलन कविता गोष्ठीइ दुथ्याःगु चिनाखँ मुनातःगु सफू खः । थुकी जनकवि दुर्गालाल श्रेष्ठ, फणीन्द्ररत्न बज्राचार्य, नारायणदेवी श्रेष्ठ, पुर्ण वैद्य, बुद्ध साय्मि, सुन्दर मधिकर्मि आदिपिनिगु चिनाखँ दुथ्याःगु दु ।