NewaGyanKosh

डायरी बाखंच्वमि चित्तधर हृदयया ताःहाः व चीहाकःगु यानाः झिपु बाखं दुथ्यानाच्वंगु सफू खः । ने.सं. १०९० य् च्वमि स्वयं हे पिथनादीगु थ्व सफुलिइ आदेश, देलमि, द्यःया बरदान, वयागु किपा, मचा, अजि, वाउँ सचिका, हाकु मय्ना, स्वयंवरया स्वांमा व छम्ह मिसाया डायरी नांगु बाखंत दुथ्याकातःगु दु । थुकी दुथ्याःगु बाखं मध्ये गुगुं झी लय्पतिइ पिदनेधुंकूगु खः । व्यवहारिक, लजगाः व जीवन नाप स्वानाच्वंगु बाखं थुकिइ दुथ्याना च्वंगु दु ।

डायरी पानाय् बुयावःगु कविता कुतः पिकाकःपाखें ने.सं ११४० य् पिदंगु डा. बालगोपाल श्रेष्ठया कुलामय थ्वयाच्वंगु सः (१११५) लिपाया निगूगु कविता सफू खः । वि.सं २०३८ (१९८१ व १९८२) दँय् न्हिथं थःगु डायरी पानाय् कियातःगु ११५ पु कविता थ्व संग्रहय् मुनाच्वंगु दु । न्हि डायरीयात थथे कविताया रुप बियातःगु नेपालभाषाया थ्व न्हापांगु सफू खः । थन मुनाच्वंगु कविताय् उगु ईया सामाजिक, सांस्कृतिक, धार्मिक, आर्थिक, राजनीतिक सकतां परिघटनाया किचः नापं शासक, प्रशासक, राजसत्ता, जुजुपिनिपाखें जुयाच्वंगु मनिंगु, मछिंगु ज्याखंयात गनं तप्यंक, गनं कवितात्मक भासां प्रहार यानातःगु दु । नापं कवियाके लुयाच्वंगु दुःख, निराशा, तं, आक्रोश, विरोध व बिद्रोहया सः नं ल्यहेंपुयाच्वंगु दु । उत्पीडित वर्गया पं लिना सृजित कविता संग्रह डायरी पानाय् बुयावःगु कविता वैचारिक रूपं जनपक्षीय जक मखसे प्रगतिवादी कविता मुना खः ।