थथिंजाःगु रसवस सफू नेपालभाषाया नांजाःम्ह च्वमि भूषणप्रसाद श्रेष्ठजुं च्वयादीगु नेपालभाषाया न्हूबाखं मुना खः । ल्याय्म्ह पुचः प्रकाशन पाखें ने.सं ११४१ य् पिदंगु थ्व सफुलिइ नीप्यपु बाखं दुथ्यानाच्वंगु दु । सफूया देबलय् न्हूबाखं मुना धयातःसां थ्व न्हूबाखं दुने नं तःपु हे चिबाखं (लघु कथा )नं दुथ्यानाच्वंगु दु । ने.सं १०९५ निसें ११०४या दुने च्यागू बाखं /चिबाखं सफू पिकयादीम्ह च्वमि भूषणया थ्व थथिंजाःगु रसबस तःदँ लिपा अर्थात् झण्डै पीदँ लिपा पिदंगु बाखंपुचः खः । उकिं थ्व सफू जिगु न्हूगु बाखं स्वये–ब्वने आय्बुइक पियाच्वंपिंत धकाः देछायादीगु दु । अनुभूतिया तीक्ष्णता नुगलय् थुंदिक्क प्रस्तुत यायेगु भाषा शैली थ्व संग्रहया विशेषता जूगु दु ।