NewaGyanKosh

नेपालभाषाय् दकलय् न्हापां चिबाखं सफू पिथनादीम्ह मिसाच्वमि नःलि बज्राचार्य मां प्रमिला व बा नातिबज्र बज्राचार्यया कोखं ने.सं. १०९४ य् जन्म जुयादीम्ह म्ह्याय् मय्‌जु खः । समाजय् विद्यमान विकृति बिसंगतियात चिबाखंया रुप बिइत पोख्तम्ह थ्वय्‌कलं नेपालभाषा साहित्य धुकुतिइ उपन्यास छगू नं तनादीगु दु । थौंकन्हय् मांभाषाय् वःगु विचलन, मिसापिंत जुइगु अन्याय, थौंकन्हय् मनूतय्के खनेदयावःगु स्वार्थीपन आदि थ्वय्‌कःया लेखनया मू विषय जूगु दु । थ्वय्‌कःया च्वसां जिगु नुगःया किचः (ने.सं.१११५) नांगु बाखं सफू व कथहं (ने.सं.११४१) उपन्यास पिदने धुंकूगु दु । थ्वय्‌कःयात लुमिन श्रेष्ठ नेपालभाषा सिरपाः (ने.सं. १०२२) लःल्हाये धुंकूगु दु ।

नःलि स्वना सफू भाजु प्रा. डा. कमलप्रकाश मल्लया सम्पादनय् ने.सं १०८७ इ च्वसापासाया लुखां सिद्धिदास बुन्हिया लसताय् भाजु चिनिकाजि श्रेष्ठया आर्थिक ग्वाहालिं पिदंगु नेपालभाषाया न्हापांगु थीथी च्वमिपिनिगु समालोचनात्मक लेखया संग्रह खः । थ्व सफुलिइ रत्नध्वज जोशींनिसें कृष्णचन्द्र सिंह प्रधान, माधवलाल कर्माचार्य, ईश्वरानन्द श्रेष्ठाचार्य, झुलेन्द्रमान प्रधान, चित्तरञ्जन नेपाली, जनकलाल वैद्य, सुन्दरकृष्ण जोशी, कमलप्रकाश मल्ल व माणिकलाल श्रेष्ठ नापं यानाः झिम्ह नांजाःपिं तत्कालिन समालोचकपिनिगु झिंछपु समालोचनाया च्वसु दुथ्यानाच्वंगु दु । थ्व सफूया अझ तःधंगु महत्ता थ्व सफूया सम्पादक प्रा.डा. कमलप्रकाश मल्लं सफू—न्ह्यथना धकाः भूमिकाया रुपय् च्वयातःगु नेपालभाषाया समालोचना सम्बन्धी अतिकं ग्यसुग्यंगु अनुसन्धानमूलक ताःहाकःगु लेख खः । थ्व लेखय् नेपालभाषाया समालोचनया इतिहास, विकास, प्रमुख समालोचकपिं, उमिगु मूलभूत प्रवृति, समस्या व वर्तमान स्थिति न्ह्यब्वयातःगु दु । नेपालभाषाया समालोचनायात कयाः थथे दुग्ययेक अध्ययन अनुसन्धान यानातःगु थ्व नेपालभाषाया न्हापांगु च्वसु खः । थ्व बाहेक थुकी नेपालभाषाया समालोचनात्मक लेख पिदंगु तत्कालिन थीथी पत्रिकाया नां व उमिगु अंक समेत न्ह्यब्वयातःगु दु ।