तुयु पुंया थुगु निपलाः सफू ने.सं. ११२० य् पिदंगु खः । थ्व सफूया पिकाकः साहित्यया मूलुखा खः । थ्व सफुलिइ निगू विधा दुथ्यानाच्वंगु दु। निगू विधायात निपलाः कथं न्ह्यब्वयातःगु दु । छपलाखय् हाइकु खःसा निपलाखय् क्वाः मुनातःगु दु । छपलाखय् दुथ्यानाच्वंगु न्यय्छपु हाइकु दुने देशय् शान्ति तनाः बुद्धं ख्वबि हायेकाच्वंगु लु दु । भाषाय् स्वतन्त्रता मदुगु खँ दु । प्रकृति व गरिबीया अवस्था लिसें मेमेगु बिचाः प्वंकातःगु दु ।
NewaGyanKosh
-
निपाः ख्वाःपाः
नेपालभाषाया संकिपा ‘निपाः ख्वाःपाः’ आर. के. प्रोदक्शनया पाखें निर्माण जूगु खः । ने.सं.११०७ दँय् प्रदर्शन जूगु थुगु संकिपाया निर्देशक श्यामकृष्ण श्रेष्ठ व किरणलाल श्रेष्ठ अले कलाकारपिं किरणलाल श्रेष्ठ, तुलसी डंगोल, मोहनकृष्ण श्रेष्ठ, सुलोचना मानन्धर, शबनम रन्जित व श्यामकृष्ण श्रेष्ठ खः । थुकी श्यामकृष्ण श्रेष्ठ व किरणलाल श्रेष्ठया बाखं, छायाँकार राजभाई सुवाल व एम एस माइकल, संगीतकार गोविन्द ह्युमत खः । थुगु संकिपाय्– सुं नं मनूया खनेदुगु ख्वाः व सुलाच्वंगु ख्वाः नापं यानाः निपाः ख्वाः दयेयः धकाः क्यनातःगु दु ।
-
निप्वाः पाल्चा
निप्वाः पाल्चा सफू मुकुन्दकृष्ण नेवाः नं च्वयादीगु खः । थ्व च्वसू व कविता मुना निबन्ध सफू खः । ने.सं ११२४ य् हेटौंडाय् च्वंम्ह मैयाँदेवी अमात्य थ्व सफू पिकयादीगु खः । थ्व मुकुन्दवृष्णया निगूगु सफू खः । थुकी च्वमिं थःगु नुगः दुनेया भावनाया किचः ब्वयेगु कुतः याःगु दु ।