NewaGyanKosh

निबन्ध छपुचः रत्नध्वज जोशीया कृति खः । ने.सं. १०७० इ चित्तधर उपासकपाखें पिथंगु थ्व निबन्ध सफुलिइ ने.सं. १०६४ निसें १०६८ या दुने च्वमिं च्वयादीगु झिपु निबन्ध दु । थुकी च्वयेगु छाय् ? छु च्वयेगु ? उखान, लेखन शैली, गद्य–कविता, सफू, थ्व भाषा, ज्ञान वा भाषा, नखः व तिसा शीर्षकया च्वखँ दु ।

निबन्ध निपुचः सफू पद्य विद्याश्रमया शिक्षक रत्नध्वज जोशीं च्वयादीगु खः । च्वमिं निबन्ध छपुचः पिकायेधुंका च्यादँ लिपा निबन्ध निपुचः पिकाःगु खः । ने.सं. १०७८ य् पिहांवःगु थ्व सफूया पिकाकः धर्मोदय सभा खः । थुकी झिंनिपु च्वखँ दु । थ्व वर्णात्मक व विधारप्रधान निबन्ध सफू खः ।

निबन्ध पुचः भिक्षु सुशीलया कृति खः । ने.सं ११२३ य् प्रकाशमान शाक्यं पिकायादीगु थ्व निबन्ध पुचः सफुलिइ झिपु च्वसा धर्मया खँ, दुःख, आलोचना, मन, चाकरी, यौन व मौन, सफू, आत्महत्या, न्ह्यः समस्या च्वखँ दुथ्याःगु दु ।

निबन्ध रत्न नेपालभाषाया झिंनिम्ह नांजाःपिं च्वमिपिनिगु च्वखँ मुना खः । नेपालभाषा समितिपाखें ने.सं. १०७८ य् प्रकाशित जूगु थ्व निबन्ध मुनाय् नेपालभाषा समितिपाखें न्ह्याकूगु तत्कालिन निबन्ध धेंधेंबल्लाः कासाय् मुंवःगु स्वीन्हय्‌पु निबन्धमध्ये उत्कृष्ट जूगु फणीन्द्ररत्न वज्राचार्यया धौ भेगः नं दुथ्याकातःगु दु । अथेहे रत्नध्वज जोशीया फेशन व वसः, मा. हेमलाल जोशीया नां, ठाकुरमान शाक्यया अनुशासनया विरोधे, सत्यमोहन जोशीया ख्वपया पुलां प्याखं व भगवती प्रसाद श्रेष्ठया झीगु प्याखं, मा. लक्ष्मीभक्त जोशीया थःगु छेँ, रामहरि जोशीया सर्वोदय विचार, भुवनमान कायस्थया नखः, स्वयम्भुलाल श्रेष्ठया वनस्पती जगतया छगू झलक, माधवानन्द वैद्यया नेपाल कला, मा. पुण्यरत्न वज्राचार्य अनुशासन निबन्ध नं थुकी संग्रहित जुयाच्वंगु दु । थथे दुथ्याःगु निबन्ध मध्ये गुलिं फेशन व वसः थेंज्याःगु बस्तुपरक निबन्ध खःसा गुलिं अनुशासनया विरोध थेंज्याःगु आत्मपरक निबन्ध दुथ्यानाच्वंगु दु । अथेहे अनुसन्धानमूलक व सांस्कृतिक विषयया निबन्ध नं दुथ्याःगु दु ।

विचारपरक निबन्धया नायः रत्नध्वज जोशीया मेगु विचारप्रधान संग्रह च्वखँया निबन्ध स्वपुचः खः । ने.सं. १०९९ य् नेपालभाषा परिषद्पाखें पिदंगु थ्व सफुलिइ झिंच्यापु च्वखँ दुथ्याःगु दु । च्वमि जोशीं थ्व निबन्ध सफू पिकायेत शर्मिष्ठा जोशीयागु ग्रन्थ सूची, डा. केशरीया आर्थिक ग्वाहालि लिसे थः याना स्वपुचः संलग्न जूगु जुयाः सफूया नां नं निबन्ध–स्वपुचः तःगु खः ।

निबन्ध–परिचय दर्बार हाई स्कुलया अध्यापक मास्टर काशीलाल दलीं च्वयादीगु चिःहाकःगु न्यय्‌छपु बस्तुगत निबन्धया संग्रह खः । नेपालभाषा परिषदपाखें ने.सं १०७२ य् पिदंगु थ्व निबन्ध–परिचय स्कूलया मचातय्‌त अर्थात् ब्वँमिपिंत लक्षित यानाः च्वयातःगु सफू खः । थ्व निबन्ध सफू स्कुल स्कुलय् पाठ्यपुस्तकया रुपय् दुथ्याकुसें लिपा लिपा नं थुकिया संशोधित संस्करण पिहांवःगु दु । थ्व सफूया मू लक्ष्य मचातय्‌त निबन्ध गथे च्वयेगु धैगु ज्ञानबीगु खः ।