NewaGyanKosh

गुलित फसात बिय तेना कृष्ण

दरशन बिव जित कण ताव ।।धु।।

चैत्रस अजुरस्वां होयाच्वन वनस

वैशाख चुवा स्वान, गुलाफ वचुरस्वां

जासेवल सिमाया चुलि वसन्तया यौवन

गथे सहयाय प्रभु छि विनान रे ।। १।।

जेष्ठस चमेली चस्वान जिल स्वां

आषाढ सिन्हाज्या होयाचोन चंपास्वां,

ग्रीष्मया तापन सहलपे मफया

याना बिव प्रभु छिन शीतल ननान रे ।।२।।

श्रावणमास सुकुंन्दरराज

भाद्रव पलेस्वान उफोल चवो स्वां

वर्षाया ऋतुस न्ह्यावल समु

मिखास खोबि हाल छिगु बिरहन रे ।। ३ ।।

आश्वीन तुलसी, लवंजिफो स्वान,

कार्तिक ग्यानथकु गोदावरी स्वान,

शरद ऋतुस चन्द्रमाया तेजन

उइनि थे नेन प्रभु छिगु विरहन रे ।। ४ ।।

मंसीर केवल नं होयाच्वन दाफोस्वां,

पौषस बखुमद सिन्हास मधुस्वां

हेमन्त ऋतुस चिकु सहयाये मफु

सहयाना चोना प्रभु छिगु आशान रे ।।५।।

माघस मीकूस्वां, फागुण तकुस्वां

शिशिरया सिमाहः फसं हायका बिल रे

रंग म्हिते मन छिके जुल प्रभु

पूरन याना बिव जि मनया आशा रे ।। ६।।

(राग मालुवा, ताल लं )

करमस चोसे हलगु विहलपे माल थनि

जोगी जुसे देशान्तर वने ।।धु।।

किजा उमकुशयात राज्य अभिषेक बिये

मामयाके बेला फोने सुदर्शना मालवने

विरहन विदेशस वने ।।१।।

विभुतिन म्हस बुले गेरू वसतन तिये

जोगी रूप कयाव जि भ्रमरथें थनि वने

बिरहन विदेशस वने ।।२।।

ल्हाकम्ह अनाथ जन भगवानया शरणस

थव मचा भालपाव यँव सुखावति थ्यनक

विरहन विदेशंस वने ।। ३।।

संक्षेप

जोगी जुइमालीगु खँ कर्मय् हे च्वयाहःगु दु । उकिं किजा द्रमकुतयात राज्य लःल्हाना बी, मांयाके बिदा काये । अले गेरु वसतं पुनाः भम्बः थें चाःचाःहिलाः सुदर्शना माःवने ।

(राग कोला ताल परताल )

सितलामाजु वहुने परजाया गथिन हवाल ।। धु् ।।

न्यना मदु खना मदु कचिमचा तय मदु

महाराजया हुकुम जुल ।।१।।

नायखिन बाजन थायका सिपाहीन घेरे याका

कचिमचा पितिनाव छोत ।।२।।

नसा बजि व्यकुच्यासे कचिमचा लुकुछिसे

वनेमाल तामाखुसि पारि ।।३।।

छम्ह मचा लुकुंछिसे छम्ह मचा ब्यकुंच्यासे

छम्ह मचा लुतुलुसे यने ।।४।।

यँ देशं दना वना खोप देशे बास जुल

तलेजु माजु दरसन याये।।५।।

खोपदेशं दना वना वदेपास बास जुल

चण्डेश्वरी दरसन याये ।।६।।

बदेपानं दना वना पलांचोस बास जुल

भगवती दरसन बाये ।।७।।

पलांचोकं दनावना दोलाघाते बास जुल

भीमसेन दरसन याये ।।८।।

दोलाघात दना वना तामाखुसि बास जुल

वने मानि तामाखुसि पारि ।।९।।

दोलखा देश दनावना तामाखुसि पारि थ्यन

महादेव दरसन याये ।।१०।।

नय यात नसा मदु तिय यात वसः मदु

चोने यात बास जित मदु ।।११।।

लखि मखु पसि मखु न्हाकप्वाच दाया हल

सिपाहीन घेरेयाना हल ।।१२।।

कइ बीम्ह कछला माजु लख जायकीम्ह सितला माजु

यनकीम्ह बछला माजुयाके फोने ।।१३।।

थ्व हे मचा रहे जूसा जोलिंजोल बखुन बोयके

लुँयागु वहःयागु द्वाफो स्वान छाय ।।१४ ।।

सुरज कोमजो धाल चिकुं पुना मचा सित

माम बुबां नुग दाया खोल ।।१५।।

सीम्ह मचा उयमदु मचा गाले थुनेमदु

परजाया गथिन हवाल ।।१६ ।।

बाम्ह मचा मामं जोँसे बाम्ह मचा बुबां जोँसे

तामाखुसि कुतकाव छोत ।।१७।।

स्वामि जुजुया धर्म मदया कचिमचा वाके छोत

वनेमाल तामाखुसि पारि ।।१८।।

नेपालया छत्रपति श्री रणबहादुर

परजान अति दुःख सिल ।। १९ ।।

मते मते सितला माजु सहश्र विनति छिके

याहुने लोक उधार ।।२०।।

संक्षेप

कचिमचात तयेमदु धकाः जुजुं हुकुम जूबलय् जनताया नितिं सर्गतं क्वच्यूं वः थें जुल । नाय्खिं च्वयेकाः सिपाहीतय्‌सं ज्वज्वं न्हाय्‌कं प्वाचं दादां कचिमचा पितिनाछ्वत । नसाबजि ब्यकुं च्यानाः, कचिमचा लुकुंछिनाः मांबौपिं तामाखुसि पारि वन । लँय् उमिसं तसकं दुःख सिल । येँ देशं वनाः ख्वपय् च्वन । अनं बनेपा, पलाञ्चोक, दोलखा जुनाः तामाखुसि पारि थ्यंकः वन । थाय्‌थासय् मुलद्यःपिं तलेजु, चण्डेश्वरी, भगवती, भिद्यः व महाःद्यः दर्शन यानाः मचातय्‌गु सुरक्षाया वर फ्वफ्वं वन । मचा जक छुं मजूसा बखुंज्वः ब्वयेकेगु व लुँ, वहः, द्वाफोस्वां सितला माजुयात छायेगु नं संकल्प यात । अय्‌नं मचात कै वयाः पुकुपुकु सित । सीम्ह मचायात बाम्हं मामं ज्वनाः बाम्ह बौनं ज्वनाः खुसिइ चुइकाछ्वयेमाल ।

(राग भूपालि, ताल पलेमा )

हाय हाय प्रभु स्वामि छि गन झाया

छन्त धन्दा छाय मिसा ज्याखँ याना चोना ।

छिव जिव चोना प्रभु सल्हा साहुति मदु

गन झाया चोना प्रभु गन वना दिया।

सिलु तीर्थ मोल ल्हुय अति पुण्य लाइ

सिलु तीर्थ वनेयात पासा माल वना ।

पासा माले मते प्रभु छिव जिव वने

निम्हतेपु सिलु वने अति पुण्य लाइ ।

छव जिव वनेयात जोसी जोतिस केने मानि

जोतिस केने स्वया जिन बाये मालि धाल

जोतिस केने छाय प्रभु छिव जिव वने

छिव जिव मोल हुय अति पुण्य लाइ ।

हथ्या बियमते मिसा छव जिव बाइ

बुझे याना बुझे मजु अवश्य नं बाइ।

थव छेंस दना वना धमाथुलि बास

धमाथुलि थ्यंका स्वया तिरि लिसे वल ।

वये धाये मते मिसा छेंस लिहां हुनि

हथ्या बिय मत मिसा छव जिव बाइ ।

नापं वने नापं चोने गथ बाय मालि

धमाथुलि दना वना न्यागमनि बास

न्यागमनि थ्यंका स्वया तिरि लिसे वल ।

वय धाय मते मिसा छव जिव बाइ

नापं वने नापं चोने गथे बाय माली ।

न्यागमनि दना वना जेफलपौवा बास

जेफलपौवा थ्यंका स्वया तिरि लिसे वल

वय धाय मते….

जेफलपौवां दना वया रानीपौवा बास

रानीपौवा थ्यंका स्वया तिरि लिसे वल ।

वय धाय मते….

रानीपौवां दना वना चतुरालिपौवा बास

चतुरालीपौवा थ्यंका स्वया तिरि लिसे वल ।

वय धाय मते…..

चतुरालिपौवां दना वना नक्वाब्यासि बास

नक्वाब्यासि थ्यंका स्वया तिरि लिसे वल ।

वय धाय मते…..

नक्वाब्यासि दना वना थैबु तने बास

थैबु तने थ्यंका स्वया तिरि लिसे वल ।

वय धाय मते….

थैबु तने दना वना भिमलपाक्व बास

भिमलपाक्व थ्यंका स्वया तिरि लिसे वल ।

वय धाय मते….

सितु तीर्थं लिहाँ वया भिमलपाक्व थेन

भिमलपाक्व थ्यंगु बेले तिरि लुमंसे वल ।

भिमलपाक्वं दना वया नक्वाब्यासि बास

गन वना नाप लाय तिरि लुमंसे वल ।

नक्वाब्यासि दना वया रानीपौवा थन

रानीपौवा दना वया न्यागमनि थेन ।

न्यागमनि दना वया पशुपति थेन

नीलकण्ठ महादेव दरसन याय ।

गनांगने मफु …..

पशुपतिं लिहां वया थवछेंस थेन

थगु छेंस थेंगु बेले माम बुबां न्वात ।

दाजु किजा सकसिनं हेला जित यात

थगु छेंस चोने छाय जोगि जुया वने ।

गनां गने मफु….

जोगियागु भेष कासे हिला माला स्वया

राज्य हिला माला स्वयां छति ग्यंम्ह मदु ।

झिनिदँ तप व्रत जिन याना चोने

झिनिदँ तप यासां थ्वति ग्यंझ दैमखु ।

गनां गने मफु….

धन्दा काय मते रानी सुर्ता काय मते

थुलिमछि कुमारी केती चाकर नोकर बिय ।

हीरा मोति जुहार पन्ना तिसा वस बिय

नु रे रानी छव जिव त्रिपासा छको म्हिते ।

थ्व खँ ल्हाये मते राजा जिगु बिन्ति न्यँव

चतुर्मास अवसं चोना व्रत सिंधयके मानि ।

चतुर्मास अवसंयात छंत छु छु माल

घ्यल साख चाकु दुरू सकतान माल ।

प्रजागन सकलयात भोजन याके माल

स्वराजया जोगि दक्व सामेल याके माल

जोगि प्रजा दक्व थेन जि प्रभु मझानि

स्नान याना बेले जिमि प्रभु थ्यंक झाल ।

धन्दा काय मते प्रभु सुर्ता काय मते

मातानिया भेस कया छल याना वय

हाय हाय कुमारी केती चरविस पिथा वने

चरबिस झाय मते रानी झारी कोपरा दिके ।

थथिंजागु कोठास जि गये पिथा चोने

चरबिस वने धका कोठा पिहाँ वल

एकान्तन छखे वना वस्त्र दक्व तोल

विभुतिन म्हस बुसे गेरु वस्त्रं पुन 

मातानिया भेस कासे छले याना वन ।

जि वयधुन प्रभु स्वामी धन्दा काय मते

निम्हं नाप वने मज्यू छिनि न्हापा झासँ

बिच हिला छित जिन नाप लाक वय

धन्य धन्य जिगु कर्म स्वामि नाप लात

थन चोने मखु प्रभु थव छेंस वने ।

नेवाः लोकवार्ता ने.सं ११३० य् नेपालभाषा केन्द्रीय विभागया लुखां पिदंगु नेवाः लोकवार्ताया विविध पक्षयात कःघानाः च्वयातःगु सफू खः । थ्व सफुलिइ लोकसाहित्यया परिभाषां निसें लोककला, लोककासा, लोकअभिव्यक्ति आदि तक यानाः झिंगुंगू अध्याय दु । थ्व सफू नेपालभाषा केन्द्रीय विभागय् स्वन्हुयंकं जूगु लोकवार्ताया गोष्ठीइ तत्कालिन विद्वानपिंसं प्रस्तुत याःगु झिंगुपु ज्यापौ संकलन खः । थथे उगु गोष्ठी प्रस्तुत जूगु झिंगुंगू ज्यापौयात १९ अध्यायय् ब्वथलातःगु खः ।

नेवाः व नेवाः लोक साहित्य सत्यमोहन जोशीया च्वखँ मुना खः । वाङ्मय शताब्दी पुरुष जोशीया च्वखँ मुनेगु ज्या मदन सेन वज्राचार्यं यानादीगु खः । ने.सं. १११४ य् सत्यमोहन जोशी हनेज्या ग्वसाः खलः पाखें पिदंगु थ्व सफुलिइ जोशीया थीथी पत्रिपत्रिकाय् पिहां वयेधुंकूगु व पिमदंनीगु च्वसु संग्रहित जुयाच्वंगु दु । थ्व सफुलिइ मुक्कं झिंच्यापु च्वसू दुथ्याःगु दु । जोशीया च्वसु बिना सम्पादन गथे खः अथेहे दुथ्याःगु धाःगु दु । पिन्यादँ न्ह्यःनिसेंया च्वसु दुगु जूगुलिं थ्व अवधिया शैलीया अध्ययन यायेत नं थ्व सफू महत्वपूर्ण जू ।

सुवर्ण शाक्यया वृति नेवाः व व्यवहार सफू छगू च्वसु मुना खः । थुकी दुथ्याःगु अप्वः च्वसु थीथी पत्रपत्रिकाय् पिहां वयेधुंकूगु खः । ने.सं. ११२६ न्हूदँ कुन्हु ओलम्पस क्लबं पिकाःगु थ्व सफुलिइ झीसं थःगु संस्कृति व थःगु मांभाय् नेपालभाषा ल्वःमंके मज्यू धैगु सन्देश बियातःगु दु । अथेहे नेवाः व नेवाःतय्‌सं हनाच्वंगु बुद्धधर्मबारे नं च्वसु दु । नेवाः व व्यवहार विषयगत निबन्ध खः । थुकी पीछपु च्वसु दुथ्याःगु दु ।