फुतिफाति ठाकुरमान शाक्यं च्वयादीगु आत्मपरक निबन्धया संग्रह खः । ने.सं. १०९० य् आशा पुस्तक भण्डारपाखें पिदंगु थ्व सफुलिइ च्वमिं थीथी इलय् च्वयादीगु झिंनिपु च्वखँ समावेश जुगु दु । गथे — मानववादी बुद्ध (ने.सं.१०७४), ताफू (ने.सं.१०७३), प्रेम (ने.सं.१०७५), कल्पना (ने.सं.१०७४), तपुली (ने.सं.१०७६), अपहत्या (ने.सं.१०७७), अनुशासनया विरुद्ध (ने.सं.१०७७), थःगु ख्वाः धमं स्व (ने.सं.१०७६), परिवर्तनशील संसार (ने.सं.१०७५), जिगु एकान्त (ने.सं.१०७६), व न्हिल (१०७६) व छपु सुपः (ने.सं.१०७८) निबन्ध दुथ्याःगु दु । थ्व सफुलिइ च्वमि शाक्यं थःगु जीवनया अनुभवया लिधंसाय् थौंया परम्परा, सामाजिक मान्यताप्रति निबन्धया माध्यमं थःगु प्रतिक्रिया प्वंकादीगु दु । थःगु बुद्धि बिबेकयात छखे वांछ्वयाः परम्पराया नामय् मिखा तिस्सिना न्हयाःवनेगु पक्षय् वय्क: मदु ।