NewaGyanKosh

ने.सं .१०८० इ पिदंगु भृकुटी धर्मरत्न यमिया निगूगु उपन्यास खः । थ्व भृकुटी उपन्यास नेपाःया राष्ट्रिय गौरब, राष्ट्रिय स्वाभिमानयात न्ह्यब्वयातःगु नेपालभाषाया हे न्हापांगु ऐतिहासिक उपन्यास धकाः थ्व उपन्यासयात च्वसापासां श्रेष्ठ सिरपाः देछाःगु खः । नीछगू द्याय् ब्वथलातःगु थ्व भृकुटी उपन्यास छगू चरित्र प्रधान उपन्यास नं खः । थौं इतिहासकारपिंसं भृकुटीयात अंशुवर्माया म्ह्याय् मखु उदय्‌देबया म्ह्याय् खः धयाच्वंगु दुसां थ्व उपन्यासय् भृकुटीयात महासामन्त अंशुवर्माया म्ह्याय् यानाः न्ह्यब्वयातःगु दु । उपन्यासया सम्पूर्ण घटना भृकुटीया क्रियाकलापनाप हे केन्द्रीत जुयाच्वंगु दु । उकिं थ्व भृकुटी उपन्यास लानिमैजु भृकुटीया जीवनी धाःसां पाइमखु । नेपाःया राजकुमारी भृकुटीया इहिपाः सँदेया सम्राट श्रोङ्गचेनगम्पो नाप जुल धैगु गुगु ऐतिहासिक खँ खः थुकियात हे मू आधार नालाः च्वमिं थःगु कल्पना, तर्कना भावनायात नं गाक्कं दुथ्याकाः च्वयातःगु उपन्यास खः थ्व । सामाजिक विषयवस्तु सामाजिक समस्यां जक थाय् कयाच्वंगु नेपालभाषाया उपन्यास ख्यलय् ऐतिहासिक विषयवस्तु ऐतिहासिक पात्रयात कयाः उपन्यास च्वयेगु परम्पराया प्रादुर्भाव भृकुटी उपन्यासं निसें जुल । अथेहे उपन्यास मार्फत राष्ट्रिय स्वाभिमान राष्ट्रिय गौरव ब्वयेगुया नापं जातीय संस्कृति जातीय स्वाभिमान ब्वयेगु ज्या नं न्हापां थ्वहे उपन्यास निसें जुल ।

भृकुटी भाजु मोहनकृष्ण डंगोलं च्वयादीगु छगू ऐतिहासिक पूधाः प्याखं खः । प्रेममोहन सिरपाः गुथि पाखें ने.सं ११३४ पिदंगु थ्व सफू दबू प्याखं च्वमि व निर्माता मोहनकृष्ण डंगोलया थासा आखलं सफूया रुपय् पिदंगु न्हापांगु प्याखं खः । च्वमि डंगोलया धापू कथं थ्व पूधाः प्याखं धर्मरत्न यमिया भृकुटी उपन्यासं प्रभावित जुयाः च्वयादीगु खः । थ्वहे कथं भाजु डंगोलजुं थ्व नाटकया विषयवस्तु नं धर्मरत्न यमिं थःगु उपन्यासय् दुथ्याःगु विषयवस्तु थें ल्हासा देय्‌या जुजु श्रोङचेङगम्पोया आक्रमणं नेपाः देय्‌यात बचे यायेगु निंतिं तत्कालिन नेपाःया महासामन्त अंशुबर्मां थः म्ह्याय् भृकुटीया इहिपाः श्रोङचेङगम्पोनाप याना ल्हासादे नाप दौत्य सम्बन्ध स्थापना याःगु व राजकुमारी भृकुटिं ल्हासा देय्‌या सम्राटनाप इहिपाः यानाः केवल नेपाः देय्‌यात जक बचे याःगु मखुसे अन नेपाःया धर्म संस्कृतिया प्रचार प्रसार यानाः सांस्कृतिक विजय प्राप्त यायेत सफल जूगु क्यनेगु यानादीसां नाटककार डंगोलं थाय्‌थासय् थःगु नं मौलिकता न्ह्यब्वयेगु यानादीगु दु । झिंगुंगू लु दुगु थ्व पूधाः प्याखनय् न्हापांगु लुइ नेपाःया मचातय्‌सं म्हितीगु कुने सु वल धाप्ल्यां ख्याः धैगु कासा गुगु कासायात नाटककारं न्हयसःलिसः कासा धयादिल व कासा लानीमैजु भृकुटी पासापिं नाप म्हितूगु कथं न्ह्यब्वयातःगु दुसा दकलय् लिपायागु लुइ (१९ गूगु लु) ल्हासाया जोखाङ्ग बहिस नेपालं हःम्ह वगतया मूर्तियात तःधंक समारोहया यानाः विधिपूर्वक पलिस्था याकाः नाटक क्वचायेकातःगु दु ।