NewaGyanKosh

मिं मनः पौ ने.सं १०८८इ पिदंगु कविकेशरी चित्तधर हृदयजुया स्वंगूगु बाखं सफू खः । थ्व वय्‌क:या न्हापा न्हापाया बाखं स्वयाः पाःगु उपन्यास धायेबहःगु ताहाकःगु बाखं खः । थम्हं हे प्रकाशित यानादीगु थ्व बाखं सफूयात हृदयजुं थः म्ह्याय् धकाः नालादीगु दु । थ्व बाखं ल्हासा नेवाःतय्‌गु सामाजिक सांस्कृतिक परिवेशय् निर्माण यानातःगु बाखं खः । नारी जाति प्रति श्रदा सद्भाव तयादीम्हं हृदयजुं थ्व बाखं सफुलिइ नं छम्ह मिसापात्रया जीवनया मार्मिक बाखं न्ह्यब्वयाः पौया रुपय् बाखं न्ह्याकातःगु दु । वास्तवय् थ्व तत्कालिन ल्हासा नेवाःतय्‌गु छेँय्‌या भौमचातय्‌गु मार्मिक बाखं खः । ल्यासेगु वैशय् थःत त्वःताः भाःत सँदेय् वंगुलिं थःगु शारीरिक प्याःचाः तृप्त यायेमखनाः जूगु छतपतया मनोवैज्ञानिक यथार्थ थ्व बाखनय् वानाच्वंगु दु ।

कृष्णभक्त बोडेया निगूगु हाइकु सफू कथं पिदंगु मिचल दुने सफू ने.सं. ११२५ पोहेलागा ४ कुन्हु विराट ने. भा. सा. स. गुथिया लुखां पिदंगु खः । थुगु सफुलिइ १०३ पु हाइकु दुथ्याकातःगु दु । थुकी झीगु भाषा व जातियात जुयाच्वंगु दमन व शोषण न्ह्यब्वयातःगु दु । लिसें प्रकृतिया विम्व छ्यलातःगु दु ।

मिजलाया जलं भाषाथुवाः मथुरा साय्‌मिया मिजला उपन्यासयाबारे थीथी साहित्यकारपिंसं ब्यूगु लिच्वःत (प्रतिकृया) मुनां बिमल ताम्राकारया सम्पादनय् कुतः पिकाकःया लुखां नेपाल संबत् ११३७ य् पिदंगु सफू खः ।

मिथिला– च्वः प्वः मदुगु लुमन्ति दुने निबन्ध सफू मङ्गलप्रसाद स्यस्यःया वृति खः । ने.सं ११२६ य् प्रसाद प्रकाशनपाखें पिहांवःगु थ्व निबन्ध संग्रह च्वमिं थः तिरि मय्‌जुया लुमन्तिइ च्वयादीगु खः ।