थ्व संस्कृतया मुद्राराक्षस नांगु प्याखंया लिधंसाय् च्वयातःगु राजनीतिया ज्ञान बीगु बाखंपुचः खः । संस्कृतया मुद्राराक्षस प्याखं न्यागूगु शदीइ विशाखदत्तं च्वःगु खः । लिपा थ्वयात थीथी इलय् थीथी च्वमिपिंसं टिका च्वल । नेपालभााषायागु मुद्राराक्षसकथा दक्वसिवय् न्हापां ने.सं ८२१ य् च्वःगु खः, गुगु सफू राष्ट्रिय अभिलेखालयय् दु । भाजु छत्रबहादुर कायष्ठं थःथाय् दुगु ने.सं ८३९ मुद्राराक्षसकथाया अन्तिम अंश सम्पादन यानाः ने.सं ११०८ य् साहित्यया मूलुखा पाखें पिकयादीगु खः ।
NewaGyanKosh
-
मुद्राराक्षस कथा
खुगूगु शताब्दीया कवि विशाख दत्तं च्वयातःगु व ने.सं. ८३९ य् नेपालभाषां दैवज्ञ लक्ष्मीधरं ल्ह्ययातःगु थ्व मुद्राराक्षस कथा संस्कृत नाटकयात बाखनय् रूपान्तरण यानातःगु पुलांबाखंया संग्रह खः । हस्तलिखित नेपाल लिपि दुगु थुगु ग्रन्थयात छत्रबहादुर कायस्थं सम्पादन यानाः साहित्यया मूलुखापाखें ने.सं. ११०८ य् पिथंगु खः । छत्रबहादुर कायस्थं थ्व सफू थः अबु नरबहादुर कायस्थया नामय् देछायादीगु दु । आचार्य चाणक्यं भारतं नन्दवंशयात क्वःथलाः मौर्य वंश स्थापना यानाः चन्द्रगुप्त मौर्ययात सम्राट दयेकेत म्हितूगु राजनीति हे थ्व बाखंया विषयवस्तु खः । थुकिया नायक आचार्य विष्णु गुप्त वा चाणक्य खः । पुलांगु नेपालभाषाया रूपकथं च्वयातःगु थ्व सफू थुइकेत सम्पादकं सफूया लिउने अर्थया धलः नं तयादीगु दु ।