NewaGyanKosh

नेवाः अभियन्ता भाजु यादवलाल कायस्थया जन्म ने.सं.११०० य् जूगु खः । वय्‌कःया मांया नां विमला कायस्थ व बाःया नां शिवलाल कायस्थ खः । वय्‌कःया थाय्‌बाय् क्वाःद्वँ थँहिति खः । न्हापा नेपाली सेनाय् ज्या यानादीम्ह वय्‌कः थौंकन्हे सम्पदा संरक्षण महाअभियानय् आवद्ध जुयाः ज्या याना वैच्वनादीगु दु । भाजु यादवलाल कायस्थ स्वनिगःया ल्वहँ हिति आदि सम्पदाया संरक्षण व मर्मत सम्भारया ज्याय् न्ह्यलुवाः जुयाः ज्या यानाः वैच्वनादीगु दु । भाजु कायस्थ सम्पदा प्रेमी अभियन्ता खः । स्वनिगःया पहिचानयात ल्यंका तयेगु अभियानय् वय्‌कःया सक्रियता व योगदान न्ह्यथनेबहः जू ।

यान्त्रिकपुर सफू मय्‌जु अपर्णा प्रधानं च्वयादीगु चिबाखं संग्रह खः । ने.सं. ११४२ य् पिदंगु यान्त्रिकपुर चिबाखं मुनाया पिकाकः कुतः पिकाकः खः । थुकी सामाजिक कुण्ठा, नारी समस्या, बाल मनोवैज्ञानिक, यौन आदि विषयवस्तुया न्यय्‌पु चिबाखं दुथ्याः । रोबोट अर्थात यन्त्र मानव व यान्त्रिकपुर काल्पनिक स्थलया वर्णन दुगु यान्त्रिकपुर चिबाखं थ्व सफुलिइ दुथ्याःगु मुख्यगु चिबाखं खः । थ्व हे चिबाखंया नामं थ्व सफूया नां नं यान्त्रिकपुर तयातःगु दु ।

आख्यानकार भाजु मथुरा साय्‌मिया उपन्यास खः— यांमिखा । लुमन्ति खलःया लुखां थ्व उपन्यास ने.सं. ११०३ य् पिदंगु खः । मथुरा साय्‌मिया खुसि थें सल्ल बाःवंगु शैलीं च्वयातःगु थ्व मतिनां भय्‌ब्यूगु सामाजिक उपन्यास खः ।