योम्ह शत्रु नेपालभाषाया नांजाःम्ह उपन्यासकार राज साय्मिया न्हापांगु उपन्यास खः । एच.आर. तुलाधर पाखें ने.सं १०९३ य् पिदंगु थ्व योम्ह शत्रु उपन्यास च्वमि राज साय्मिया जक न्हापांगु उपन्यास मजुसे नेपालभाषाया हे न्हापांगु जासुसी उपन्यास खः । थ्व योम्ह शत्रु उपन्यास हिन्दी भाषाय् आपालं जासुसी उपन्यास पिदंगु खनाः थःगु भाषाय् नं थज्याःगु उपन्यास दयेमाः धयागु तातुनाः च्वःगु उपन्यास खः । थ्व उपन्यास जासुस उपन्यासया अभावपूर्ति जक मखुसे जासुसी उपन्यासय् दयेमाःगु विशेषता अर्थात् मनोरञ्जन बीगु व कौतुहलता थनेगुली नं उलि हे ताःलाःगु उपन्यास खः । थीथी नां बियाः स्वीन्हय्गू शीर्षकय् ब्वथलातःगु थ्व उपन्यासय् वास्तविक हत्यारा सु जुइधकाः पाठकपिनिगु मनय् कौतुहलता, जिज्ञासा थनेगु जक मजुइकुसे पाठकपिनिगु ध्यान छखे पाखे ब्वाकाः मती हे मतःम्ह, मनं हे मखंम्ह पात्रयात हत्यारा कथं पितब्वयाः पाठकपिंत रोमान्चित यायेगुया नापं मनोरञ्जन बीगु जूगु दु । उपन्यास क्वमचातले सफू त्वःते मफइगु पाठकपिंत झुमिं यंकातइगु गुण थ्व उपन्यासय् दु । आकारं उपन्यास चीधंसां पाठकपिंत मनोरञ्जन बीगु जक मखु देशकाल परिस्थिति नाप साक्षात्कार जुइकेगु ज्या नं थ्व उपन्यासं याःगु दु ।