बौ आशामान शाक्य व मां लक्ष्मीमाया शाक्यया क्वखं ने.सं. १०५५ स यलया जावलाख्यलय् भाजु ठाकुरमान शाक्यया जन्म जूगु खः । वय्कलं स्नातकोत्तर पूवंकादीगु दुसा च्वज्याय् वय्कःया ल्हाः नेपालभाषा, खस भाषा व अंग्रेजी भाषाय् नं उतिकं हे च्वन्ह्याः । पाश्चात्य साहित्यय् पिदंगु व्यक्तिवादी निबन्ध शैलीयात झीगु नेपालभाषाय् छ्यलादीपिं निबन्धकारपिं मध्ये थ्वय्कः नं छम्ह खः। भाजु ठाकुरमान शाक्यया न्हापां पिदंगु च्वसु ताफू (नेपाल, ने.सं १०७३) नांगु निबन्ध खःसां फुतिफाति (ने.सं. १०९०) सफूया रुपय् पिदंगु च्वखँ मुना खः । च्वमि भाजु छम्ह प्रगतिशील विचाःयाम्ह जूगुलिं पुलांगु मूल्य व मान्यतायात छखे चिइकाः थौंया ई नापं झी नं हिलावने माःगु सन्देश वय्कलं थःगु निबन्धय् प्वंकादीगु दु । अथेहे ठाकुरमान शाक्यया च्वखँय् विषय ज्ञानया नापं तार्किकता निजात्मकता नं उतिकं हे जाःगु खनेदु । थ्वय्कः प्रसिद्ध प्रवल गोरखा दक्षिणबाहु (स्वंगूगु) पदक पाखें विभूषित जुयादीधुंकूगु दु ।
Leave a Reply