तुतां नेपालभाषाया नांजाःम्ह आधुनिक बाखं च्वमि यज्ञरत्न धाख्वाःया च्वसां पिदंगु झिगूगु बाखं संग्रह ख । नेपालभाषा एकेडेमिपाखें ने.सं ११३६ य् पिदंगु थ्व बाखं सफुलिइ—तुतां, हापँ, इजलास, हाकुगु पेटी, दुर्घतना, निब्वरा जाकि, सुकाय् तक्यंम्ह म्हय्खा झंगः …. आदि यानाः झिंनिपु बाखं दुथ्यानाच्वंगु दु । थुपिं बाखं च्वमिं ११३४—११३६ दुने च्वःगु सीदु । थः जःखःया, थःत प्रभावित विषयवस्तु व थम्हं बांलाक म्हमस्यूपिं मनूतय्त पात्र दयेकाः जीवनया छगू घटना व मनूया मनोभाव ब्वयेगु हे धाख्वाःजुया बाखंया गुगु विशेषताः खः थ्व संग्रहय् नं अज्याःगु हे विशेषता विद्यमान जूगु दु । सायद च्वमियात दकलय् यःगु बाखं जुयाः हे जुइ थ्व सफुलिइ दुथ्याःगु न्हापांगु मनोवैज्ञानिक बाखं तुतांया नामं थ्व सफूया नां नं तुतां तयादीगु जुइमाः ।
Leave a Reply