यःदाई (नियात्रा) ने.सं. १०८५ या भाषिक आन्दोलनं दनावःम्ह थौंतकं उतिकं छम्ह सक्रिय सचेत श्रष्टा डा. पुष्पराज राजकर्णिकारं च्वयादीगु सफू खः । पलिस्थां ने.सं ११३६ य् पिथंगु मुक्कं झिंगुपु लेखत दुथ्याःगु थुगु सफुलिइ झिंनिपु लेख च्वमिया अमेरिका यात्रा सम्बन्धी जूगु दुसा मेगु न्यापु च्वमिया मचाबलय् निसेंया निजात्मक अनुभूति दुथ्याःगु लेख दु । मेगु निपु लेख चिकंभिसा, दिल्लीनिसें सान फ्रानसिस्को तक, रोटा केयर फ्री क्लिनिकय् अंग्रेजी भाय् मसःपिं ल्वगितय्त नीस्वंगू मध्ये गुगुं नं भाय्या दोभाषे तयेगु व्यवस्था यानातःगु ल्वय्या खँ, भाय्या खँ आदि थुकी दुथ्याः । अमेरिकाय् च्वनाच्वंपिं नेपाःमितसें संस्कृति ल्यंकेगु कुतः बांलाक यानाच्वंसां मांभाय् ल्यंकेगु ज्याय् भचा ल्यूने लानाच्वंगु तथ्यया वर्णन थुकी दुथ्याः । ज्या याये फत्तले ज्या याये दइगु आप्रवासीपिं च्वनीगु देय् जुयाः ज्याथः जिथिपिं नं आपालं ज्या यानाच्वंगु वर्णन थुकी दु । नियात्रा नापं निजात्मक अनुभूति दुगु न्यापु लेखतसें थुगु सफू पठनीय व नियात्रा ख्यः चकंकेत तिबः जूगु दु ।
Leave a Reply