गज्याः गज्याःपिं मनूत दै थन

गज्याः गज्याःपिं मनूत दै थन

लुँमधि अजिमा फिल्म प्रोडक्शनपाखें ने.सं.११३० दँय्‌ निर्माण जूगु थुगु संकिपाया निर्माता दीपक कपाली व धर्मसुन्दर शाक्य अले निर्देशक सनम कुमार श्रेष्ठ खः । सनम कुमार श्रेष्ठया बाखं दुगु थुगु संकिपाया छायाँकार सोहन मानन्धर, मदन महर्जन व सुरेन्द्र ख्वखालि खः । थुकी कलाकारकथं मन्जु श्रेष्ठ, सुनिता श्रेष्ठ, श्यामसुन्दर शिल्पकार, तुलसी नारायण डंगोल, रुपेन्द्र श्रेष्ठ थक्वाः, मानिक शाहीपिं दुथ्याः । संकिपाय्‌ थ्व संसारय्‌ गज्याः गज्याःपिं मनू दयेयः धइगु क्यनातःगु दु ।

गुरुमापा

एस जयापाखें ने.सं. ११२३ स निर्माण जूगु थुगु संकिपाया निर्माता विजयज्योति खः । थुकिया बाखं व निर्देशक शान्तराज शाक्य खःसा कलाकारकथं बिजयज्योति, मधु शाही, बिक्रम बज्राचार्य, नेमरत्न बज्राचार्य, बसन्त शाक्य, किरण शाक्य व भैषज्यरत्न शाक्यपिं दुथ्याः । थ्व ऐतिहासिक पुलांबाखं खः । छगू इलय्‌ येँ्या इतुंबहाःया केशचन्द्र नांयाम्ह जू म्हितीम्ह जुवाःद्यः जू म्हिताः थःगु सर्वश्व पानाः बुकाः दुःख जूगु जुल । लिपा बखुंतपाखें प्राप्त जूगु लुँ गृुरुमापा नांयाम्ह छम्ह राक्षसं क्वबिका हयाः वइत थःगु हे लागाय्‌ केशचन्द्रं थायबाय्‌ बिल । व गुरुमापां त्वाःबहाःया मचात खुयानयाः दुःख ब्यूगुलिं गुरुमापायात तिन्ख्यलय्‌ तयेयंकूगु खँ थुकी न्ह्यब्वया तःगु दु ।

ग्वंगःक्वसः

ने.सं. ११३० दँय्‌ निर्माण जूगु थुगु संकिपाया निर्माता मिन्जु शाही खःसा निर्देशक आर. एम. शाक्य व उपेन्द्र पौडेल खः । नरेन्द्र श्रेष्ठ (पुलां बाखंया लिधंसाय्‌)या बाखं हनातःगु थुगु संकिपाया छायाँकार एम एस माइकल व नरेश शाही खः । थुकी कलाकारकथं सिन्तिया सेन ताम्राकार, बासु शाही, सुरेन्द्र के.सी., पल्पसा डंगोल, श्यामसुन्दर शिल्पकार व अर्नेश्वरी शिल्पकार दुथ्याः । संकिपाय्‌ निग्ति खँय्‌ कलाःभाःत ल्वाये मज्यू धकाः क्यनातःगु दु ।

नटराज फिल्म प्रोडक्शनपाखें ने.सं. ११३१ दँय्‌ निर्माण जूगु थुगु संकिपाया निर्माता परमेश्वर नारायण जोशी खःसा निर्देशक प्रकाशराज मानन्धर खः । थुकिया बाखं राजु महर्जन जुजु, संगीतकार परमेश्वर नारायण जोशी खःसा छायाँकार मदन महर्जन खः । थुकी कलाकारकथं देबिना महर्जन, अन्नपुर्णेश्वरी श्रेष्ठ, कृष्णभक्त महर्जन, सुरेन्द्र महर्जन, रत्न बेहोशी व परमेश्वर नारायण जोशीपिं दुथ्याः । संकिपाय्‌ छखा छेँय्‌ न्हूम्ह भौमचा दुहां वयेधुंकाः वइगु ह्यूपाः क्यनातःगु दु ।

ग्वाज्यःचा

निर्माण आकृति कला केन्द्र, नेवाः आर्टपाखें ने.सं. ११२५स निर्माण जूगु थुगु संकिपाया बाखं व निर्देशक सनमकुमार श्रेष्ठ अले संगीतकार शिव शाही खः । थुगु संकिपाय्‌ कलाकारकथं राजु महर्जन जुजु, ज्ञानी शोभा महर्जन, पल्पसा डंगोल, सनिश श्रेष्ठपिं दुथ्याः । थुकी छम्ह मनू ग्वाज्यः जुल धाःसा छु छु जुइ धैगु खँ क्यनातःगु दु ।

घोषक

चिराग फिल्मस् प्रा.लि.पाखें ने.सं. ११४१ य्‌् निर्माण जूगु संकिपाय घोषकया निर्माता रोशन बज्राचार्य व प्रेमा शाक्य अले निर्देशक अमृतचन्द्र खः । धर्मरत्न शाक्यया बाखं दुगु थुगु संकिपाया संगीतकार जिवित जल्मि व गोविन्द ह्यूमत खःसा छायाँकार लूजः सिंह व रवि साय्‌मि खः । थुकी कलाकारकथं किशोर चिपालु, राजेन्द्रमान शाक्य, पल्पसा डंगोल, अंजली शाक्य, प्रेमा शाक्यपिं दुथ्याः । थ्व बुद्धकालिन ऐतिहासिक संकिपा खः ।

चन्द्रमान

ने.सं.११३० दँय्‌ निर्माण जूगु थुगु संकिपाया निर्माता शुभ तण्डुकार, सुजिता जोशी, सिम्रिक श्रेष्ठ खः । थुकिया बाखं व निर्देशक राजेश मान सिं खःसा संगीतकार कीर्ति श्यामसुन्दर जोशी व राजेश मान सिं खः । संकिपाया छायाँकार देवआनन्द शिल्पकार अले, कलाकारकथं कुमार कार्की, मञ्जु श्रेष्ठ, रोजिना सुवाल, महन्त मल्ल, रुपेन्द्र श्रेष्ठ, हरिश तण्डुकारपिं दुथ्याः । चन्द्रमान नांयाम्ह छम्ह मनूया छुं ज्या मदुगुलिं जीवनय्‌ दुख स्यूगु खँ संकिपाय्‌ ब्वयातःगु दु ।

चरित्र

नेपालभाषाया संकिपा ‘चरित्र’ पि प्रोदक्शनया पाखें रञ्जना जोशिं निर्माण याःगु खः । ने.सं.११०७ दँय्‌ प्रदर्शन जूगु थुगु संकिपाया निर्देशक पवन जोशी खःसा कलाकारपिं विजय मानन्धर, जुनु महर्जन, योगेन्द्रदास श्रेष्ठ, सुलोचना मानन्धर, नविन जोशी व रामकृष्ण धिना खः । थुकी गोविन्द चिकंमूया बाखं, शुभशान्ति बज्राचार्यया सम्वाद अले संगीत गोविन्द ह्यूमत व राजभाइ सुवालं छायांकन यानादीगु खः ।
थुगु संकिपाय्‌ मनूतय्‌गु चरित्रया हुनिं जीवनय्‌ सुख नं सियेफु, दुःख नं सियेफु धैगु सन्देश न्ह्यब्वया तःगु दु ।

चाण्डालिका

बौद्ध चलचित्र निर्माण समितिपाखें बुद्धकालिन बाखंया लिधंसाय्‌ ने.सं. ११२० स निर्माण जुयाः प्रदर्शन जूगु थुगु संकिपाया निर्माता ध्रुवरत्न शाक्य व धर्मबहादुर शाक्य खः । थुगु संकिपाया निर्देशक मणिष कुमार श्रेष्ठ खःसा थुकी धर्मरत्न शाक्यया बाखं दु अले थुकिया संगीतकार किरण शाक्य व छायाँकार एम एस माइकल खः । कलाकारपिं हिसिला महर्जन, स्वयम्भु रत्न शाक्य, मदनकृष्ण श्रेष्ठ, हरिवंश आचार्य, सुभद्रा अधिकारी, नारायणदेबी प्रधान, पवन जोशी, कृष्णभक्त महर्जन खः । थुकिया बाखंचु बुद्धकालिन बाखं खःसा थुकी छम्ह थी मत्यःम्ह धकाः धयातःम्ह मिसाया बौद्ध भिक्षु आनन्दलिसे मन स्वाइगु व थ्व हे खँयात कयाः तथागत बुद्धं कना बिज्याःगु जातिय विभेद नापनापं जीवनया सत्यया खँयात क्यनातःगु दु ।

छ हे मदुसा

ने.सं. ११३१ दँय्‌ निर्माण जूगु संकिपाया निर्माता निलेश शाक्य अले निर्देशक सूर्य श्रेष्ठ खः । थुकी राजेन्द्रमान शाक्य (आरएम)या बाखं दुसा संकिपाया छायाँकार लूजः सिं खः । संकिपाय्‌ कलाकारकथं राजकुमार श्रेष्ठ, मीरा माली, पल्पसा डंगोल, सुरेन्द्र के.सी.पिं दुथ्याः । थन निम्हेसिया यःत्यः जूगु मतिनाय्‌ दइगु त्याग भावनाया बाखं न्ह्यब्वया तःगु दु ।

छंगु लिधंसा मदुगु जूसा


सुकुन्दा फिल्म्स्पाखें ने.सं. ११३० दँय्‌ निर्माण जूगु संकिपाया निर्माता मिन्जु शाही व रिता श्रेष्ठ अले बाखं व निर्देशक बासु शाही खः । संकिपाया छायाँकार नरेश शाही खःसा कलाकारकथं सुरेश शाही, सिर्जना महर्जन, ज्ञानेन्द्र ईशारा महर्जन, रवि महर्जन, राज्यलक्ष्मीशाक्य व नरेश सिंपिं दुथ्याः । छम्ह ल्वचं कःम्ह मिजंयात लिधंसा ब्यूम्ह मनूया बाखं थुकी दुथ्याना च्वंगु दु ।