दुघाः प्रकाशमान नानिचां च्वयादीगु छगू सामाजिक बाखं संग्रह खः । ने.सं. १०९६ य् सानुकाजी हेकां पिथनादीगु थ्व बाखं पुचलय् खुपु बाखं दुथ्यानाच्वंगु दु । न्ह्यानाच्वंगु पलाः, ब्वलसाया आसाय्, ख्युंगु क्वथाय् पिज्वःगु झसुका, ह्यूपाः झ्यालखानाय् दुने थ्वःगु सः, मुखिया साहेब व ख्वबिं ब्वलंगु विश्वास थुकीइ दुथ्याना च्वंगु बाखं खः । बाखं मुनाया सम्बन्धय् थ्व सफुलिइ मथुरा साय्मिं च्वयादीगु दु– खःगु लँय् पलाः तयाः जीवनया आज्जु बः कायेत स्वइपिं मनूतय्त थुनां थुनां चुइक लित्तुमत्तु लीगु, दुदुथे फुफुथे थःगु ज्या यानाः म्वायेत स्वइपिं जनताया अस्तित्व हे मल्यंक नांगां यानाबिउगु घाः हे थुगु दुघाः खः । थ्व हे खः झीगु देय्या सजीव किपा नं ।
Leave a Reply