सिद्धीमाः सिद्धिदास महाजुया कृति मुना सफू खः । नेपालभाषा साहित्यया प्यंगः–थां मध्ये छगः–थां सिद्धिदास महाजुं (नेसं ९८७–१०५०) च्वयादीगु नेपालभाषाया न्यय्गू कृतिमध्ये आःतक पीप्यंगू कृति प्रकाशित जुइधुंकूगु दु । नेपालभाषा केन्द्रीय विभागं सिद्धिदास महाजुया आःतक प्रकाशित जूगु तःधंगु चीधंगु पीप्यंगू कृतिमध्ये झिंन्यागू कृति छथासं मुंकाः सिद्धिमाः नामं सफू प्रकाशित याःगु खः । नेपालभाषा साहित्यया इतिहासय् छम्ह हे व्यक्तिया प्रकाशित फुक्क कृति छथासं मुंकाः पिकाःगु थ्वहे न्हापांगु सफू खः । सिद्धिदास महाजुया व्यक्तित्व व कृतित्वया मुल्यांकनया निंतिं थुगु सफुतिं आपालं ग्वाहालि याइ । ने.सं ११४० य् प्रकाशित जूगु थुगु सिद्धिमाः सफुलिइ सज्जन हृदयाभरण, शुकरंभा संवाद (पुनरावृत्ति), संवाद, सत्य मदन, सिद्धिदास थःगु मिखाय् व शिवविलास, सनातन धर्म, सप्त स्तुति, संचय, सिद्धिरामायण (बालकाण्ड, अयोध्याकाण्ड, अरण्यकाण्ड, किस्किन्धा काण्ड, सुन्दरकाण्ड), सरल छन्द बोध व शूक्ष्म छन्द, स्वंगू ऋण, सकतां माः, सर्व कर्म, सर्व बन्धु, सत्यसति (खण्डकाव्य) मुंकातःगु दु । नापं थुकी सिद्धिदास महाजुया फुटकर कविता नं दुथ्यानाच्वंगु दु । थुगु सफू प्रा.डा. ओमकारेश्वर श्रेष्ठं सम्पादन यानादीगु खः ।