सिद्धिरामायण सिद्धिदास महाजुं च्वयादीगु नेपालभाषाया दकलय् न्हापांगु रामायण खः । थ्व सफू सिद्धिदास महाजुं भानुभक्तया रामायण स्वयाः थःगु भाषाय् नं अज्याःगु हे रामायण दयेके धकाः भानुभक्तं थःगु नां क्वकयाः रामायण च्वःथें सिद्धिदासं नं थःगु नां क्वकयाः सिद्धिरामायण नामं रामायण च्वःगु खनेदु । थ्व रामायण सिद्धिदास महाजुं ने.सं. १०३०–१०३५ पाखे च्वःगु खःसा थ्व रामायणया छगू काण्ड किस्किन्दा काण्ड ने.सं १०८७इ च्वसापासाया लुखां भुवनमानया आर्थिक ग्वाहालिं पिदन । थ्व काण्डय् रामं सुग्रिव नापलाःगु, सुग्रिव रामया दथुइ मित्रता जूगु व सुग्रिव व बालिया युद्धय् रामं सुग्रिवयात ग्वाहालि याःगु घटनाया चित्रण दु । थुकी च्वमिं वार्णिक छन्दया प्रयोग यानातःगु दुसां वार्णिक छन्दया छ्यलाय् च्वमिया ल्हाः उलि ज्यःगु खनेमदु ।