चक्रमान शाक्यं च्वयादीगु गुपु बाखं दुगु सफू खः— सिन्हाय्स्वां । त्रिशूली नेपालभाषा पुचलं ने.सं. ११०६ स पिथंगु खः । सिन्हाय्स्वां नं स्वां हे खः धयागु शीर्षकय् माधवलाल कर्माचार्यं भूमिका च्वयादीगु दु । निका लँय्, भूल, धिधिं बल्ला, थसोथुकना, कोँचाद्यःया निष्ठुरता, तिसा, महामन्त्र, जुनेली व नैतिक अपराध थुकी दुथ्याःगु बाखं खः । थःगु जःखः जुयाच्वंगु घटना व परिवेशयात च्वमिया नुगलं खंका मानवीय संवेदनासहित प्वंकेगु ज्या थुकिया बाखनय् जुयाच्वंगु दु । बाखंमिं थुकिया बाखंयात थःगु चीधंगु कुतः भाःपियाः न्ह्यागुसां थ्व नं बाखं खः धकाः धायेत सफूया नां सिन्हाय्स्वां छूगु खनेदु ।