येँ, महाबूत्वाःया भाजु मुक्तिनारायण व मय्जु देवीकुमारीया काय्भाजु उत्तमनारायण सन् १९४७ स बूम्ह खः । भारतया मद्रास विश्वविद्यालयपाखें सन् १९६९ स इन्जिनियरिङ्ग क्वचायेका वःम्ह थ्वय्कः लिपा वेलायतया स्ट्राचलिड विश्वविद्यालयस स्नातकोत्तर तहया शिक्षा कायेत छात्रवृति ल्हातय् लाकूगु खः, तर ब्वनेगुली अतिकं जाःम्ह विद्यार्थी, लिच्वः बांलाःगुलिं उगु विश्वविद्यालयया अधिकारीपिन्सं विद्यावारिधि तहतक ब्वनेत सुविधा बियाः सन् १९७६ स् संरचनागत निर्माणया विधाय् पीएचडीया उपाधि कायेत ताःलात । विशेष यानाः नेपालय् इन्जिनियरिङ्ग शिक्षायात ब्यवस्थित यायेगु व संस्थागत विकासया ख्यलय् थ्वय्कःया अतिकं मूवंगु तिबः दुगु जुल ।
